سر الطبخةعام

طريقه تفريز اللحوم والدجاج والخضروات

طريقه التفريز للصديقه
رضوي توفيق


اللحمة المفرومة:

اغلب استعمالنا للحمة المفرومة المفرزة يكون في العصاج، طيب ليه بدل ما نجمدها لحمه ما نجمدهاش عصاج؟؟
لما تكوني هتعملي اكله محتاجة عصاج نص كيلو او كيلو، بدل ما تشتري كيلو اشتري 3 او 4 على حسب كميتك في الشهر اللي بتحتاجيها
تقطيع بصل سواء على ايدك او في الكبه زودي الكمية بدل من لكيلو خليهم لكمية اللحمة كلها
عصجي كمية اللحمة و كيسيها في كل كيس كميتك اللي  بتحتاجيها في الاكلة
و بكده لما تطلعيها كل اللي عليكي تفك شوية و ممكن تحطيها على نار هاديه و كسريها بالسكين علشان تفكيها بسرعة و تعملي اكلات سريعة زي مثلا صينية الجلاش لو جالك ضيف مفاجئ

البانيه:
برضه تتبيل بتتبيل هاتي كمية البانيه بتاعة الشهر كلها مرة واحدة
و تبلي كل الكمية بتتبيلتك المفضله و سيبيها في التلاجة يوم
تاني يوم شيليها من التتبيلة و حطيها في البقسماط ( انا باحب احط في البقسماط على طول بدون دقيق و بيض علشان تبقى خفيفة لانها ما بتشربش زيت كتير، بس باحط على البقسماط فيجيتار طبعا او بهارات مشكلة و شوية دقيقة ذره علشان تبقى ناشفه شوية)
نيجي بقى للتكييس في كذا طريقة:
لو عندك مكان حطي البانيه مفرود جنب بعضه في صواني مفروشة باكياس بلاستيك و حطيها تتجمد يوم و تاني يوم لميها من الصينية حتبقى كل واحدة لوحدها و حطيها في كيس فوق بعضها و دي انا بافضلها لاني لما باجي اطلع باطلع بالعدد و الكمية اللي عايزاها حتى لو اتنين لساندويتشات الولاد او كام واحدة للكريب او ازود الكمية لو جالي ضيف
الطريقة 
قطعي اكياس بلاستيك قطع بحيث ان القطعة تكون اد قطعة البانيه، و حطي بين كل قطعتين بانيه كيس علشان ما يلزقوش في بعض، و في الاخر حطي طابور الباني في  كيس و اقفليه كويس، و دي مفيدة لو ما عندكيش مكان في الفريزر للصواني كاملة في الطريقة الاولى
اما عن التسوية فمش لازم يفك جامد بس تطلعيه و يفك نص و نص و اقلي على طول، بينفعني جدا لما اكون بره و جيت متأخرة باحط مايه للمكرونة تتسلق و اطلع البانيه على ما اغير هدومي و اجهز اي حاجة اسلق المكرونة و طبعا عندي صلصة مفرزة احطها عليها و اقلي البانيه و اسرع اكله تكون جاهزه
الكفتة:
اعملي خلطة الكفتة اللي انت متعودة عليها برضه بكمية سواء كفتة رز او كفتة للشوي، و صبعي و رصي في صينية مفروش كيس بلاستيك ، الرص يكون جنب بعضه ما تحطيش فوق بعض هاتي صينية تانية لو الكمية زياده عن الصينية
لبسي الصوني اكياس و فرزي في الفريزر ، و تاني يوم هتلاقي كل صابع كفتة متفرز لوحده لميهم و حطيهم في علبه او اكياس ، وقت الاكل طلعي الكمية اللي انت عايزاها من الكيس و حطيها في صينية تفك و بعدين سويها بطريقتك و بكده الكفته متصبعة و جاهزة على التسوية بس فمش بتاخد وقت خصوصا لو كفتة بالبرغل باحطها في الفرن تستوي على ما اقلي بطاطس و اعمل احلى ساندويتشات للغدا، او جنب اكل او لو ضيف طب عليكي تبقى جاهزة
البسلة و البامية:
نضفي خضارك كالمعتاد، اغلي ماية و حطي الخضار فيها ياخد غلوة واحدة و شيليه حطيه في مصفاة و صبي عليه مايه باردة بغزارة و كيسي .
السمبوسة:
احشي السمبوسة بالخلطات اللي تحبيها و حطيها في صينية جنب بعضها و غطي الصينية و فرزيها، تاني يوم لمي السمبوسة كل واحدة بواحدتها في كيس او علبه، و وقت الاكل طلعي و اقلي على طول.
الثوم:
باقشره و اعين شوية متقشرين صحيح زي ما هو في كيس للمدد الطويلة ، و افرم شوية مع ملح و احطهم في برطمان للمدد القليلة و خدي بالمعلقة مع كل اكله بتحتاجيه فيها.
الشوربة
الطريقة الاولى:
بتكيسي الشوربة في كيس، عيبها انك لازم تفكي تجميد كل الكمية حتى لو عايزه حاجة بسيطة لبشاميل مثلا
الطريقة التانية:
اغليها لحد ما تبقى مركزة و حطيها في قوالب التلج و بعدين لميها في اكياس او برطمان، و وقت الاكل زوديه مايه لحد ما يبقى مضبوط
الطريقة التالتة و دي جميله:
اغلي الشوربة لحد ما تبقى مركزة، و في حله تانيه شوحي دقيق على حسب كمية الشوربة بحيث انها لما تتحط عليها تبقى برضه خفيفة مش بشاميل يعني.
و زودي الشوربة شوية شوية، و بهري بقى من بودرة بصل و بودرة توم و فلفل و جوزة الطيب و ملح، كل اللي انت بتحبيه، و حطي في مكعبات التلج تتجمد و بعدين لميها في اكياس او برطمان
الطريقة دي بتخليكي تقدري تقسمي المكعب بسهولة و بيكون طعمه جنان

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock