2054208194886930964305459023536687124329124620425345324432245227212526005525430010231005910972575227800005423858567245242500231905922702611555

7/17/2017

مركب السلايف..؟


بريد القراء أعداد: هويدا صابر.
في مثل مصري بيقول (مركب الضراير سارت ، ومركب السلايف غارت) ، معقوله مركب الضراير أفضل طيب أزاي؟ تعالوا نشوف
 
دي مشكلة السائله........
أناعايزه أحكيلكم علي موقف حصل وقولولي أنا كده غلطانه ولا لا بس معلش هطول عليكم شويه... 
 
أنا من يوم ما أتجوزت وسلايفي أتنين دايما كانت طريقتهم معايا وحشه وخصوصا واحده فيهم بتغير مني جدا وبتقلدني دايما لو جوزي عمل معايا موقف حلو تقول لجوزها شايف بيعمل معاها أيه مش أنت والله قدامنا ومش بتتكسف وكانت تخرج تتكلم عليا أنا وحماتي وحش في البيوت مع أن والله عمري ما عملت لواحده فيهم حاجه وكنت دايما في حالي وحماتي طيبه أوي وغلبانه جدا ودايما يعملوها وحش ويكلموها بطريقه مش كويسه خالص لدرجة بتنام معيطه بسببهم ، المهم أنا عرفتهم وأتقرصت منهم لأنهم كانوا وقعوا بيني وبين حماتي ، وبيني وبين جوزي ، وبيتي كان هيتخرب بسببهم فعلمت عليهم وخدت منهم جنب وبقيت في حالي ومليش دعوه بيهم خالص وهما كانوا هيموتوا مني لأني كنت بخرج مع حماتي وأروح معاها المشاوير وهما كانوا بيخرجوا لوحدهم ومسكوها مرمطوها وشتموها وقالولها كده قدام الناس أحنا ولاد..... وهي اللي كويسه عشان بتخرجي وتروحي معاها المشاوير وأحنا لا ، حماتي قالتلي معلش يا بنتي مش هعرف أخرج معاكي تاني ، المهم واحده منهم كل ما تلاقيني بمسح تنزل عيالها التلاته يطلعوا وينزلوا علي المسح ويمرمطوه ومن ضمنهم بنت في خامسه أبتدائي كل ما تلاقيني تطلع وتنزل وتبهدلي الدنيا ، والسلم والمدخل بيبقوا طينه وتقعد تبص علي علامة رجليها بعد ماتمشي وتضحك وتطلع فبضطر أمسح تاني ومش برضي أتكلم وأعمل عقلي بعقل عيله صغيره بس كنت بخلي حماتي تخرج وتشوف المنظر وكل ألللي باخده منها معلش يا بنتي عشان خاطري يابخت الغلبان
 
المهم البنت دي بتمسح السلم بتاعهم والمدخل في الأسبوع أللي هما تحت عند حماتي فيه ، والنهارده ولادي 7و5 سنين نازلين راحت البنت بتقولهم ماتقلعوا الشباشب أنتوا بهتدلتوا الارض نزلوا وماردوش عليها راحت سلفتي موقفهاهم وقالتلهم أنتوا ما قلعتوش ليه الشبشب بهتدلتوا الارض كده ليه؟ بعد كده تيجوا طالعين ولا نازلين ولقيتوها بتمسح تقلعوا شباشبكم ده مش منظر ، ولادي ماردوش عليها وطلعوا حكولي أنا أستنيت لما جوزي رجع وكنا خارجين تعمدت أخرج في وجودها هي وجوزها تحت وكان الكلام قدام جوزي وجوزها وحماتي روحت سلمت علي حماتي وقولتلها لو سمحتي يا ماما محدش ليه كلمه علي ولادي ولا ليه أمر عليهم ، هي تؤمر أبني بتاع أيه! تيجي لحد ولادي وستوب ولادي خط أحمر أنا ولادي محدش يؤمرهم كان من باب أولي تقول لبنتها الكبيره أللي فاهمه وعارفه أنها بتبهدل الأرض تقلع شبشبها ومرات عمها بتسمح ، وأظن أنتي شهدتي علي أللي بقوله ده وشوفتيه بعينيكي كذا مره وأنا عشان دماغي مش فاضيه مكنتش بتكلم عشان مبقاش بتاعة مشاكل وأبقي بتلكك وعشان مش بعمل عقلي بعقل عيله ، وفي وسط ما أنا بتكلم جوزها غمزلها بطريقه غربيه أنها ماتتكلمش وحماتي قاعده عليها سهم الله ولا نطقت بحرف روحت مأكده علي كلامي تاني وقولت ماشي يا ماما لأخر مره بقول محددددش ليه دعوه بعياااالي عيالي محدش يؤمرهم ولا يقولهم تعملوا أيه وماتعملوش ايه وسبتهم وخرجت أنا وجوزي.
 
جوزي مش معترض ولا زعلان بس بيقولي كنتي خليكي زي ما أنتي الأنسانه الطيبه أللي مابتتكلمش ، قولتله لا أتقي شر الحليم إذا غضب وأنا صبرت كتير وسكت أكتر لحد ما فاض بيه وأخيرا هخرج عن صمتي هو أيه ضربني وبكى سبقني واشتكى !!! هما كده كده أنا في نظرهم وحشه وبيقولوا عليا حاجات ما بتحصلش وبسكت علي حقي لكن عيالي لا أكل أللي يقربلهم بسناني.
انتوا ايه رأيكم؟ بأمانه.

السائله الكريمه: 
أنتي كل أللي بتمري بيه مع سلايفك غيره منهم ، وكلها مضايقات منهم عشان يوصلوكي بيها للخروج عن شعورك والغلط ، بدليل لما أتعصبتي علي موقف السلم عشان ولادك رد فعل أخو جوزك أنه سكت مراته وسابك تقولي أللي عندك وتهددي ألا ولادي ، وولادي خط أحمر ، وتقريبا موقفه دا عشان جوزك موجود كرساله منه ، شوفت أنا سكت مراتي وأنت سايب مراتك تزعق وتعلي صوتها ومش عامله أعتبار لحد ، فالطبيعي أن رد فعل جوزك بعدها كان ليه كده كنتي فضلتي طيبه زي ما أنتي ، مقالكيش عندك حق وعذرك ، وحماتك ردها دايماً معلش عشان خاطري.
بيت العيله بيحتاج ذكاء شويه في التعامل وحدود ، وأنتي كنتي صح لما جنبتي نفسك عنهم ، وبالنسبه لموقف السلم كنتي أكتفيتي بأن ولادك مردوش علي مرات عمهم ، وبعدين أنتي بتمسحي السلم ولقيتي تعمد من بنتها بتبهدلك الدنيا أدخلي شقتك وأقفلي ومتكمليش ، وبعدها عادي جدا بهدوء نجيب حد وندفعله كلنا يمسح السلم أنا تعبت ومش صغيره علي لعب العيال دا ومش همسح سلالم ، وراعي ربنا في حماتك وأقفلي علي نفسك وزوجك وأولادك وأهتمي بيهم وبنفسك وخليكي ذكيه في ردود فعلك وهاديه ، لأن شكوتك هتكون من غير نتيجه وأحتمال كبير جوزك يبتدي يزهق ، وخليها قاعده في دماغك الرجل مبيحبش مشاكل مع أهله ولا شكوي منهم حتي لو غلطانين ، وبعدين ينفع جوزك يقولك تعالى خارجين نغير جو تنتهزي الفرصه وتزعقي قبل الخروج أختيارك للتوقيت غلط ، هل الخروجه كان ليها طعم بالنسبالكم ولا كان معظم وقتها تعليق علي الموقف وعليكي وأكيد كنتي بتتكلمي بعصبيه ودا مينفعش ، والقاعده التانيه سعادتك تخلقيها جوه شقتك وأكسبي جوزك في صفك بأهتمامك بيه وحبك ليه ، وأنسي سلايفك كل واحده فيهم بتستفزك وتدخل بيتها تهتم بيه وبزوجها وتنسي أللي عملته معاكي، وزي مقولتلك رد فعلك يكون هادي وفكري قبل متردي وردك يكون علي قد الموقف ، وربنا يصلحلك الأحوال..
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين