2054208194886930964305459023536687124329124620425345324432245227212526005525430010231005910972575227800005423858567245242500231905922702611555

12/01/2017

في وشوش اصحابي بتوع زمان





بقلم دكتورة / إيمان الريس

سنين طويلة مرت علي اخر لقاء بِينا، جمعتنا الظروف الان في لقاء غير متوقع ولكن سعادة الصدفة كانت اقوة من اي صدمه في تغيير الملامح والوشوش في اللقاء.

بعد سنين في وشوش اصحابي ، شوفت فيهم اللي الحزن في عنيها بعد ما كانت وردة في بستان .

شوفت فيهم اللي عايزةً تقول انا احسن منكم كلكم بعد ما كانت نكرة داخل الشله دون سبب لتجاهلها.

شوفت فيهم اللي بتقول سعديني عندي جبل من الحزن و هم واكتئاب عايزةً اخدك في حضني وأعيط .

شوفت فيهم اللي عرفت تتفوق علي نفسها وحققت أحلامها عكس ما كنت أتوقع لها زمان،.

شوفت فيهم اللي بتتحسر علي عمرها اللي ضاع من غير اهداف ولا سعادة .

شوفت فيهم اللي بتجري ورآه العيال ومش عارف تقعد معانا دقيقه ، عايزةً تقول انا احسن ام فيكم.

شوفت اللي بتتفاخر بأولادها والمدارس والنوادي .

شوفت فيهم اللي المرض سرق منها لحظات السعادةً وبدلها بالخوف من الرحيل وهي كلها إيمان وبتحمد ربنا بمنتهي القناعة والامل مع ضحكة مرسومة علي وشها كلها رضا وطمع في الشفاء

شوفت اللي بتكره شغلها بس عايزةً تنزل و خلاص تهرب من البيت والسئولية.

شوفت اللي ضحت بشبابها وسعادتها لخدمة الام والأب عشان هي الصغيرة او الكبيرة.

شوفت اللي بتربي اولاد اختها اللي ماتت وأصبحت ام صغيرة لشباب كبار.

شوفت اللي نجاحها في شغلها وطلقت الجواز بثلاثة وسعيدة .

شوفت المتحرره والمتفتحه شكلا و موضوعا بطريقة مبالغة جدا .

شوفت اللي طول ماهي قاعدة بتتكلم عنshopping بس.

شوفت فيهم اللي السكوت اصبح عنوانها بعد ما كنت بقولها اسكتي من كتر الكلام ،.

شوفت فيهم اللي بتضحك علي الفاضي والماليان حتي تأكد ان الحزن في قلبها معشش .

شوفت فيهم اللي شالت الهم وحمل الجبال وعجز السنين بان عليها في عز الشباب .

شوفت فيهم المحرومة من العيال وبتقول ياربً عيل ولو معاق .

شوفت فيها اللي لسه عايش علي امل فارس الأحلام اللي بالحصان لحد ما العمر جري بيها وهي في الأحلام .

شوفت فيهم اللي بقت رابعه في زمان الكفار في النصح والإرشاد بأكره .

شوفت فيهم اللي بتحسد بكل ناظرة وتقول كتير عليكيً اللي انتي فيه .

شوفت فيهم اللي حياتها انتهت بخيانة علي سرير الزوجية من حب عمرها .

شوفت فيهم اللي اصبحت مدمنه بعد صراع مع الحياة .

شوفت فيهم الأرملة في عز شبابها عايزةً تقول انا احسن الحمد لله وعنيها كلها حزن ووحده وألم من الحمل التقيل عليها .

شوفت فيهم اللي الزمن خالاها اجملً واشيك من الخارج ولكن اخلاق وسلوك زبالة .

شوفت فيهم اللي بتخون بمنتها البجاحة ومبرر كمان .

شوفت فيهم اللي طول ماهي قاعدة عايزةً تحط همها في الاكل و خلاص .

شوفت فيهم اللي اصبحت اسامة أطيب بعد ما كنت مش بتعرف تسلق بيضه لان جوزها بيعشق الاكل كمان .

شوفت منهم اللي طول ماهي قاعدة بتلعب بمفتاح العربية اخر موديل مع تحريك الخاتم السوليتار عشان تقول انا هنا شايفني .

شوفت فيهم من تتحمل اهانة زوج اناني عشان تعيش ومش عايزةً ترجع بيت أهله ويقولها يا مطلقه .

شوفت فيهم اللي بتحقق حلمها وذاتها في زوجها وأولادها بكل رضا .

شوفت فيهم اللي عيونها علي جوز صحِبتها .

شوفت فيهم اللي قاعدة تنصح وتنتقد بس عايزةً تقول انا بفهم اكتر منكم.

شوفت فيهم اللي بتخاف من الحسد حتي من القطة اللي في الشارع .

شوفت اللي نفسها تخطف لحظة حلوةً وبتقول يا تفتكري هنشوف بعض تاني .

شوفت اللي صبرا مستحمله الزوج الكسول اللي بتصرف عليه وعلي عيالوا دون ملل وبتكسب رضا بالفلوس .
شوفت فيهم اللي أهل جوزها مطلعين عنيها زي الكتاب ما قال.

شوفت منهم اللي جوزها مدلعها والسعادة في كل جزء من ملامحها .

شوفت اللي شايله هم مرض جوزها او ابنها مش عارفهً تعمل حاجة في انتظار قضاء الله .

شوفت منهم اللي عايزةً تتكلم وخايفه تكون اقل من اللي قاعدين .

شوفت فيهم اللي كانت هانم في بيت اَهلها اجملً لَبْس وماك اب أصبحت زي الشغالة شكلا وموضوعها اصبحت مهلهله .

شوفت منهم اللي حلمها ضاع في البامبرز والمطبخ .

شوفت فيهم اللي اصبحت زوجة تانيه تحت حكم الظروف الاجتماعية .

شوفت فيهم اللي متجوزة زوج قد ابوها عشان محرومة من حنان الاب .

شوفت فيهم الزوجة القدرة المفتريه .

شوفت فيهم اللي اصبحت نكديه و بتشك في صوابعها .

شوفت اللي السياسة اكلت دماغه وقاعدة علي قهوة في وسط البلد اصبحت بتها بتحاول تعوض الناقص والفراغ.

شوفت اللي اصبحت اخوانية وسيساوية وأبناء مبارك وأحباء شفيق وبتوع التحرير وبتوع الكنبه.

شوفت وشوفت بس بحبكم بحبً ذكرياتي معكم طفولتي، بحبكم لان مفيش زيكم تاني

شوفت وشوفت وسعيدة اني شوفت شوفت وفضلت ملامحهم القديمة في خيالي .طول الوقت .
ولكن اصحاب ملامحهم اختلفت بين العجز والشباب والحزن والسعادة واليأس و الخوف والامل و الاكتئاب ، شوفت و ياريت ما كنت شوفت وكانت فضلت صورة زمان زي ماهي ، بين وجع قلبي علي البعض وسعادتي بالبعض وصدمتي في البعض ولكن بقول دي الحياة ولازم نقول الحمد لله .

شوفت شوفت وشوفت في وشوش. اصحابي القدام.

دكتورة / إيمان الريس
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين