2054208194886930964305459023536687124329124620425345324432245227212526005525430010231005910972575227800005423858567245242500231905922702611555

2/21/2018

وريقات أربعينية






وريقتي الخامسة من أهم ما أريد مشاركته معكم لأنها سبب هام في بناء شخصيتي و بتخلي كل شئ بأعمله له مذاق و طعم خاص في الحياة، و هي بعنوان "لو فاضي اتعلم تصلح جزم"...

عنوان غريب لكنها جملة هامة في حياتي قالها لي أبي و عمري ٨ سنوات و يمكن الجملة دي سبب في سيرتي الذاتية التي تضم حاجات كتير مالهاش علاقة ببعض و لكن بتظهر في كل تدريب بقوم بتصميمه أو عمله.

و انا عندي ٧ سنوات كان لي أقارب بيشتغلوا كروشيه كويس جدا و حاولت أخليهم يعلموني و لكن معلمونيش و الحقيقة مش عارفة السبب حتي الأن، و لكن رجعت لأبويا و بكيت انهم معلمونيش .. 

و سكت أبويا و بعد كام يوم رجع من الشغل معاه خيط و إبر كروشيه و شاور لي علي بلكونة في البيت اللي قدامنا و قالي اطلعي و قولي لجارتنا اللي في الشقة دي انا بنت فلان و بيقولك علميني بالحاجات دي، استغربت جدا و لكن بفضول الطفلة طلعت و لقيت استقبال حافل من جارتنا العجوزة و بدأت تعلمني و قعدتنا كتير و كتير و أنا فرحانه ، و داومت التردد علي جارتنا الطيبه و بقينا أصحاب معرفش ازاي ... و اتعلمت منها حاجات كتير و الغريبة إن محل الخيوط كان بعيد عن بيتنا مشي نص ساعة و مكنتش بحس بالطريق و أنا رايحة جاية اشتري خيط ، و أبويا بدأ يشجعني و نرسم باترون علي ورق الرسم البياني و اعمله طواقي و اعمل للبيت مفارش و عرائس و شيلان شتوي لأمي .

 و بعد فترة آبويا جه من الشغل و جاب لي ٤ كتب لتعليم الكروشيه بالرسم و الشرح من معرض الكتاب كان ساعتها عندي ١٢ سنة و كان ثمن الكتب ١٦ جنيه و دول يمكن يكونوا مرتب أبويا ، لكن فرحته بفرحتي كانت عظيمه... و المفرش اللي في الصوره ده اول مفرش اشتغلته من الكتاب و عمره دلوقت ٣٣ سنه و يومها آبوياقالي الجمله دي" لو عندك وقت اتعلمي كل اللي تقابليه و لو عديتي علي محل إصلاح جزم و لقيتي عندك وقت اقعدي اتعلمي لأنك لو غنية اوي متعرفيش ممكن يحصل إيه و الفلوس دي تروح لكن لو بتعرفي تعملي حاجه بعقلك و قلبك و ايديكي بتشتغل و تنتج اكيد هتقدري تعيشي في أي ظروف.. و مرت السنين و أمي و أبويا دايما يساعدوني و يشجعونني أتعلم كل حاجه و أي حاجه و هما وقتها اللي كانوا في سن الأربعين...

دلوقت كل اللي اتعلمته باستدعيه و انا بصمم أي مادة تدريبيه و كمان وانا واقفة باشتغل و بدون قصد لأنه بناء كل يوم بيضيف له كتير .

حبيت اقولكم الوقت لسة موجود ليكم و لأولادكم علموهم ازاي يتعلموا و يقرأو و يمارسو اللي اتعلموه مع أصحابهم و جيرانهم و ان كل حاجه هتتعلمها هتخللي حياتكم و شغلكم و ردود أفعالكم لها مذاق و طعم خاص انتم و كل اللي حواليكم هتتذوقوه و تحسوا بطعم مختلف..

و التعلم مش بس الحاجات اللي بتيجي في بالنا بس لأ ده في حاجات غير متوقعه في الزمن ده بس مفيده و بتعلم الصبر و الثقه ...

و ما زلت بعد العمر ده ارفع عيني علي بلكونه الجيران و اترحم علي أبي و جارتنا و كل ما اعدي علي محل تصليح جزم اقف و احاول اتعلم بيعمل ايه و ربنا يبارك في صحتك يا أمي لأَنِّي حتي اليوم أتعلم بين يداها فنحن أطفال نحتاج الأب و الأم ليعلمونا و يدعمونا حتي و لو بعد الأربعين...!
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين