2054208194886930964305459023536687124329124620425345324432245227212526005525430010231005910972575227800005423858567245242500231905922702611555

2/27/2018

محدش بيتغير عشان حد



بقلم ندى إمام
انا هتغير عشانك .. الجمله دي سواء كان اللي بيقولها راجل او ست مينفعش تتصدق .. لان الواقع و الحقيقه ان محدش بيتغير عشان خاطر حد .. و لا في حد بيغير طبعه اللي عاش بيه سنين كتير عشان خاطر شخص اي كان هو مين .. الانسان لو مش مقتنع ان اللي بيعمله مش صح او مش مقبول عمره ما هيبطله حتي لو حاول يعمل ده لفتره عشان يريح الشخص اللي معاه هيجي بعد شويه و يزهق او يحس بضغط لانه بيكون من جواه مش مقتنع انه لازم يتغير .. 

يعني مثلا الانسان اللي طبعه بيحب الخروج و الفسح بشكل يومي عمره ما هيعرف يكون كائن بيتوتي عشان شريك حياته عاوز كده و لو حتي عمل ده فبعد شويه هيحس بزهق و مش بعيد يتحول لشخص كئيب ينكد علي شريك حياته اصلا .. 

ومثلا البنت اللي اتعودت علي الحريه و السفر و الاستقلال بحياتها صعب تتغير لبنت منكسره بتسمع الكلام و تنفذه من غير مناقشه لمجرد ان شريك حياتها عاوز كده .. مينفعش تطلب من حد يتغير عشان خاطرك او تقتنع ان حد هيتغير عشان خاطرك الا لو هو من جواه عاوز التغير ده يحصل ..

 يعني مينفعش ترتبطي بواحد ملوش في الرومانسيه و تتوقعي انك لما تعملي عشا علي ضوء الشموع في البيت ده هيغير تفكيره .. لا و كمان تضايقي لما يشوف اللي انتي بتعمليه حاجه تافهه, مينفعش تضايقي لانك عارفه شخصيته من البدايه و لازم تتقبليها زي ما هي .. 

من فتره كلمتني صديقه ليا بتاخد رأيي في واحد عاوز يرتبط بيها و قالتلي كل مميزاته و انها معجبه بيه بس في عيب انه مبيعرفش يقول كلام حلو و هي بتحب تسمع كلام حلو و تحس باهتمام و طلبت منه يعمل ده و يتعلم ازاي يقول كلام حلو عشان يفرحها .. وقتها قلتلها رأيي و طبعا معجبهاش لاني قولتلها ان عمره ما هيعرف يكون الشخص اللي هي عاوزاه لانه هيعمل اللي هي طلبته مره او اتنين و لو هي محظوظه هيعمله طول فتره الخطوبه لكن بعد الجواز هيرجع تاني لطبعه اللي هو متعود عليه و ساعتها هي هتحس بزهق و ملل و مش بعيد حياتهم تفشل .. هي كملت معاه و مكنتش مقتنعه بكلامي و كل ما كان يكلمها و يقولها كلام حلو تكلمني عشان تثبتلي فشل نظريتي و ان الانسان بتغير اهو عادي .. بس الموضوع ده مستمرش للاسف اكتر من شهرين بعد الخطوبه و بدأت معاناه عدم الاهتمام و قله الكلام و بالتدريج بدأ الراجل يرجع لطبعه اللي هو بيرتاح فيه و طبعا هي مكنتش مرتاحه و بدأت تعاتبه و تتخانق و تحس بزهق من كتر العتاب اللي مبيجبش نتيجه و في الاخر قررت تفسخ الخطوبه لانها مش مرتاحه و لانه مش هيتغير .. 

و خلاصه القصه دي و قصص تانيه كتير بتنتهي نفس النهايه ان العيب مش في الطرف التاني علي قد ما بيكون العيب فينا من البدايه .. لاننا بنعمل كل مجهودنا عشان نغير الطرف التاني مع ان الاسهل اننا نعمل مجهود عشان نتقبله زي ما هو و نتأقلم علي طباعه بدل ما نحاول نغيرها .. في مثل بيقول ( خد صاحبك علي عيبه ) و الحقيقه المثل ده لازم يتعمم اكتر و يبقي ( خد صاحبك و حبيبك و شريك حياتك علي عيبه ) اعتقد وقتها حياتنا هتبقي ابسط و اسهل و اريح
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين