سر الطبخةعام

طريقة متميزة لعمل الكنافه بالمانجو


طريقة متميزة لعمل الكنافه بالمانجو
اهم شى في الكنافه بالمانجا هى الكريمه ناس كتير بيعملوها بكريم شانتي او كريمه لباني مخفوقه وخلاص لكن انا مش بحبها كده ولو جربتوا دي هتعرفوا الفرق وتحبوها اكتر بأمر الله

الطريقه:-

أول شئ هنحتاج نص كيلو كنافه توضع في الفريزر تتجمد شويه ونطلعها نفركها بايدينا هنلاقيها اتفتت بسهوله حتت صغيره
نضعها في صينيه او حله واسعه ونضيف عليها ٤ معالق كبار سكر بودره وحوالي خمس معالق زبده ونقعد نقلب فيهم علي النار لحد ماتتحمر كويس
وممكن نحطها تتحمر في الفرن بس كل شويه نقلبها
ولما تطلع وهيا سخنه نضيف عليها الشربات البارد والشربات هنا مش تقيل ومش خفيف نعمله وسط يعني تقريبا كل كوب سكر عليها كوب الا ربع ماء وعصره ليمون
نرش الشربات علي الكنافه علي خفيف مانغرقهاش اوي ونسيبهم علي جنب يبردوا
لو لقيتوها بعد مابردت مسكت في نفسها كده واتكتلت افركوها بايديكم تاني هتبقي زي الفل ومفرفره

نيجي بقي للكريمه

الكريمه دي اسمها شوبست كريم
وهى خليط من كريم شانتي ( او كريمه لباني مخفوقه) وباستري كريم
(الباستري كريم بيتباع عند محلات الحلوانيه هو زي بودره الكاسترد بس بيتعمل علي البارد يعني مش بيحتاج يتحط علي النار خالص
يدوب بيتدوب بلبن بارد لكن هنا بندوبه في عصير مانجو مركز مع لبن )
هنحتاج تمن كيلو (١/٨) بودره باستري كريم هندوبها في كوبايه عصير مانجو مركز يعني نضرب المانجه في الخلاط بدون سوايل
ونخلطها مع بودره الباستري ونقلب بمضرب سلك ونضيف كمان عليهم نص كوب لبن حليب عليهم
وهنحتاج ربع كيلو بودره كريم شانتي او بودره كريمه لباني ونخلطهم بمضرب البيض مع كوب لبن حليب مثلج و٤ معالق سكر بودره لحد ماتوصل للقوام المناسب نضيف عليهم خليط الباستري كريم وتبقي كده الكريمه جاهزه
( لو مش متوفر سكر بودره دوبي السكر العادي في اللبن المتلج الاول قبل ما تضيفيه علي الكريم شانتي )هنجيب طبق زي اللي في الصوره او بوله او كاسات او اي حاجه متوفره عندك الطبق هنحط فيه نص كميه الكنافه 
وعليه نص الكريمه
ونقطع مانجو طازه قطع ونحطها علي الكريمه وبعدين باقي الكنافه وبعدها باقي الكريمه وعلي الوش قطع مانجو طازه
وعشان نخلي المانجه بتلمع بجيب جيلي مانجو واعمله بالطريقه العاديه بس يكون مركز اكتر واسيبه يبرد خالص بس بره التلاجه وبالفرشاه المع المانجو اللي علي الوش
ولو عاوزين تضيفوا مكسرات ضيفوا
علي فكره المقدار دا بيعمل طبقين زي اللي في الصوره
ولو مش عندك باستري وعاوزه تعملي الوصفه دوبي الكريم شانتي بعصير مانجو مش لبن بس الاحلي والاحلي انكم تعملوا الطريقه اللي قلت عليها تحفه تحفه

مقالات ذات صلة

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock