شعر وحكاياتعام

مين بهية




مين بهية



قصيدة ( مين بهية)
بقلم/ ( شرين سعد أحمد)

شاعرة جنوب الوادي
#شرين_سعد_أحمد
***************
كل ما أغمض عنيا
تيجي صورتك يا بهية
يتخطف قلبي ف ساعتها
أصلي عارف مين بهية
،،،،،،،،،،،،،،،،
قول يا قلمي قول واكتب
للحقيقة واوعى تكذب
عرف الدنيا بهية
ذكرها للموت هيغلب
،،،،،،،،،،،،،،،،
هى روح بالطيبة هامت
لما من آلامها عانت
قررت للغير تساعد
والحياة في عنيها هانت
،،،،،،،،،،،،،،،،،
قلبها مليان إيمان
والعنين بتفيض حنان
أما تنظر ليها تلقي
صبر مزروع من زمان
،،،،،،،،،،،،،،،،،،،،،،،،
وأما حست بالنهاية
قررت تبقى البداية
ما في واحدة غيري تاني
تبقى عايشة دي الحكاية
،،،،،،،،،،،،،،،،،،،
ربي نادى قلت قدري
قلت لازم امد عمري
وبحياتكم هبقى عايشة
يوم ما تشفوا يبقي فرحي
،،،،،،،،،،،،،،،،،،
وأما جات للروح تسلم 
بالوصية جات تعلم
ليلى ويّا هند لازم
للرسالة في يوم تكمل
،،،،،،،،،،،،،،،،
يابناتي مدوا ايدكم
للي محتاجة طاقتكم
للي من آلامها تصرخ
وبوجعها يوم نادتكم
،،،،،،،،،،،،،،،،،،،،
تأمري يا أمي حاضر
المرض دا أصله غادر
نوعدك لازم نكافح
وبجهودنا راح نبادر
،،،،،،،،،،،،،،،
دمعة العين ما تشوفيها
يوم ما نمسح من عنيها
كل حزن سكنها لحظة
بألف ضحكة هنراضيها
،،،،،،،،،،،،،،،،،،،،
هيلا هوب ونبني يلا
صرح شامخ زاد وخلا
المرض يرجع بحسرة
والشفا بالفرحة علا
،،،،،،،،،،،،،،،،
علا من امال حياتهم
رجعوا للدنيا وبيتهم
أقوى أكتر ألف مرة
والحماسة قوام خدتهم
،،،،،،،،،،،،،،،،،،،،،،،
يلا نجري نروح بهية
هى حالة مش عادية
هى درع لكل واحدة
هى دين أبدي عليا
،،،،،،،،،،،،،،،،
وف رقبتي اوفي ديني
عهد والله بينك وبيني
أبقى جنبك يا بهية
أقل حاجة اديكي عيني
،،،،،،،،،،،،،،
أما تدخل تلقى عيلة
وابتسامة كمان جميلة
طبعهم هادي ورايق
شالوا والله حمول تقيلة
،،،،،،،،،،،،،،،،،،،،،
تحت امرك كل يوم
كل ما تزيد الهموم
هتلاقينا ف لحظة جنبك
لجل دي الضحكة تدوم
،،،،،،،،،،،،،،،،،،
دول ملايكة في المعاملة
دي حقيقة مش مجاملة
وبتعبهم ياما ساعدوا
لجل أرجع تاني سالمة
،،،،،،،،،،،،،
إقرأ أيضا

إهداء إلى أختي الغالية/

**( كريمة يوسف أحمد فؤاد )**

وإلى كل سيدة تعاني من ألم مرض السرطان 

( شرين سعد أحمد )

(شاعرة جنوب الوادي)

21/5/2018

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock