2054208194886930964305459023536687124329124620425345324432245227212526005525430010231005910972575227800005423858567245242500231905922702611555

5/17/2018

الصرخه



فضفضة


فضفضه ... مع /حاتم رأفت

جوه كل واحد منا صراع كبير . خناقات بتشعلل جوانا .لو عاوز تعمل حاجه معينه او تقدم على خطوه في حياتك بتحس ان جواك ثوره . جواك ناس كتير . منهم اللي بيشجعك ومنهم اللي يخوفك . 

اوقات كتير تحس انك متناقد . بتكون حاسس بحاجه وتعمل حاجه تانيه خالص . 

اوقات تحس ان قلبك مسيطر عليك واوقات تحس ان عقلك هو المتحكم الحقيقي في تصرفاتك . وتفضل مشاعرك وعواطفك مذبذبه بين الاثنين . قلبك يمشيك تلاقي عواطفك ومشاعرك رقو واحيانا دموعك تنزل وتحس بانهيار داخلي . ولو عقلك هو اللي اتحكم فيك تلاقي مشاعرك اتحجرت وعواطفك بقت قاسيه . 

بس غي كلا الحالتين ديما جواك صرخه نفسك تطلعها . كل واحد بيكون جواه صرخه مختلفه حسب احساسه . لو بتحب بيبقى نفسك تصرخ وتصرح بحبك . لو موجوع بيبقى نفسك تصرخ وتقول آآآه . لو حاسس بالقهر والظلم بيقبى نفسك تصرخ وتقول حرااااااام . 

وفي الاخر بتفضل صرخاتنا محبوسه جوانا . بنخاف نطلعها علشان ماتاذيش حد يهمنا او بنحبه . او نأذي بيها نفسنا . وكل ما تقعد مع نفسك تحس ان الصرخه المحبوسه جواك بتتحول لبركان بيحرق فيك من جوه . 

بس عارفين اصعب صرخه في الدنيا ايه ؟؟؟؟؟ لما بتكون واقف مع حد جواك ليه كلام كتير نفسك تطلعه بس لسانك بيتشل والحروف مابترضاش تطلع وتتلجلج في اللام . عينك تزوغ في اي مكان حوليك عدا انك تبص في عين اللي قدامك . بتحس انك عاوز تشق جلدك وتفتحه بايدك للقدامك علشان يقرا اللي جواك . وتحس ان كل حرف من الكلام اللي جواك بتتحول لصرخه وكل صرخه بتتحول لبركان وكل بركان بيحول حته منك لرماد . احساس بجد صعب جدا . وتفشل محاولة اخراج اللي جواك وبعدها تختلي بنفسك وانت مشطايق روحك ويبدأ صراع جديد بين قلبك وعقلك . قلبك يأنبك علشان ماتكلمتش . وعقلك يصبرك ويبررلك سكوتك . قلبك يتهمك بالجبن وضعف الشخصيه . وعقلك يدافع عن موقفك . 

ولما تحتاج تفضفض برضه تخاف تتكلم . بيجي قدام عينك مليون اعتبار واعتبار يمنعوك من حتى الفضفضه لحد بتثق فيه وبتعزه . وساعتها تلاقي روحك مخنوقه جواك . قلبك نفسه يسيبك ويهجرك . مزاجك بقى في منتهى العصبيه . نار بتحرقك من جواك ومش عارف تطفيها ولو حتى بدموع عنيك . 

الاحساس ده تقريبا بيكون شبه يومي لحد ما خلاص اتعودنا عليه ووصلنا لمرحله اننا بقينا بنتهكم على نفسنا ونتريق عليها ونضحك . نضحك علشان نداري الدموع . نضحك علشان نبان اقوياء . بتضحك وانت حاسس ان لو بقك انفتح هيطلع من جواه نار البركان زي التنين وبتفضل قافل بقك علشان النار مانحرقش اللي حوليك . وتكتفي ان النار تحرقك انت وبس .

يالا كل واحد يصرخ بكلمه تعبر عن اللي جواه . 

آآآآه وألف آه . 

واهي . مجرد فضفضه
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين