2054208194886930964305459023536687124329124620425345324432245227212526005525430010231005910972575227800005423858567245242500231905922702611555

7/23/2018

طلاق التيك اواي



طلاق التياك أوأي



دكتورة / إيمان الريس


اصبح الجيل الآن من الشباب العشرينات جيل السرعة المطقه، جيل يحتاج الي الصبر والاستماع  والخبرات الحياتية ، جيل السوشيال ميديا جيل  يعتمد علي السرعة في كل شيء مثل سرعة الميديا ، ونتوقف هنا داخل ظاهرة للطلاق المبكر.
  تقوم البنات الآن بتطلب الطلاق بمنتهى السهولة و على حاجات فى منتهى الهيافة.

هناك  مشكلة فى جيل من الشباب من الجنسين
الجيل أهله دلعوه و لم يحملوه أى مسئولية قبل الزواج
و الى بيتفاجئ بمسئولية الزواج بعد مافرح بالشبكة و الفرح و الفستان .

زى الى عمره ما اتعلم العوم و رموه فى البحر
بيعد يعافر و يحاول لحد ما بيغرق

الجيل دا طول عمره متلبى  طلباته من أهله اللى طفحانين الدم علشان خاطره و عايش لنفسه تماما
لم يتعود انه  ييجى على نفسه فى أى حاجة
لم يتعود على الحرمان المؤقت لتحقيق هدف أبعد
لم يتعود على انه يتخذ قراراته مع حد ....كل قراراته من دماغه لم يتعود انه ممكن يقدم تنازلات   فى بعض الاحيان علشان يحافظ على علاقة مهمة فى حياته

مش حاسس انه محتاج للتانى فى حاجة  طالما بابا و ماما بيعملوله كل الى هو عايزه 
لسة لم يصل لدرجة من النضج و الخبرة تخليه يعمل توازنات و مفاوضات او حتى يحب
هو مش بيحب فى أغلب الاحوال ...هو بينتظر حد يحبه  و يلبى كل طلباته و يكون بديلا لبابا أو ماما
 و يوم ما بيلاقى شريك حياته ما بيعملش زيهم يقوله مع السلامة

جيل متدلع
هم دول الى غالبا بيفشلوا فى  أوائل جوازهم
و خاصة لو هم الاتنين كدة بيبقى الفشل اسرع بكتير

و الحل  من الأهل أصلا
الا يسرعوا فى تجويزهم قبل ما يتحملوا اى مسئولية و يتعودوا عليها

علشان كدة بقول لولادى مفيش جواز قبل ما تتدرب على تحمل مسئولية شغل  و تنجح فيها لان دا اختبار جيد

هل هيتحمل المسئولية الى عليه بكفاءة   ؟
هل هيقدر يتفاهم مع زمايله و مدرائه  ؟
هل هيقدر ييجى على نفسه فى بعض الاوقات  علشان خاطر يحافظ على شغله ؟
هل هيقدر يعمل علاقات جيدة مع زملائه 
هل هيقدر ينجز فى شغله و يبقى عنده رغبه حقيقية فى النجاح ؟ 

و مش  المسئولية المادية كمان
مسئولية العلاقات
و جيل الموبايلات و التابلت

الابن الى طول عمره عايش مع موبايله و ملوش علاقات انسانية باصدقاء  على ارض الواقع  بيبقى صعب عليه اوى يعمل علاقة انسانية طبيعية مع شريك حياة
هو لم يتعلم و يتعود على علاقة وثيقة بحد الا على وسائل التواصل
المشكلة دى عالمية و العالم كله بيتكلم عنها دلوقت

هو اتعود على التواصل الكتابى الى مفيش فيه قراءة لمشاعر  الآخر من خلال لغة الجسد  و نبرة الصوت
علشان كدة صعب يفهم التانى و يقراه

كمان الحرية و الاستقلالية التى تمتعت بها الفتاة الحالية
 و الى لسة الشاب مش قادر او مش عايز يتعامل على انها حقيقة واقعة  مهم يتعامل معاها بمرونة  على اساس ان الجواز شراكة حقيقية
البنات دلوقت بتقرأ و تتعلم و تكتسب خبرات و بقوا انضج بمراحل من الشباب  الى لسة بيضيع وقته على القهاوى  او ادام البلاى ستيشن 

الاسباب كتييييرة اوى يصعب حصرها
و خاصة اننا بقينا جزء من مشكلة عالمية و ليست محلية فقط

و حلها مش هييجى باصلاح العالم و لا الدولة و لا السياسة و لا الاقتصاد و لا التربية
مش هننتظر العالم يتغير حوالينا علشان ننجح

حلها هييجى ان كل واحد يتعلم و يفهم و يقرأ ويختلط بالعالم الحقيقي 
و ياخد خبرات و يهتم بالعلاقات  و يتوازن فى طلب الماديات   و استخدام التكنولوجيا
علشان يكتسب القدرة على تكوين علاقة ناجحة 
دى مسئولية اى واحد مقبل على الزواج من الجنسين دلوقت

كان رد ١ / بعض البنات 


يعني ايه جيل متدلع احنا الحقيقة الجيل اللي ملاقاش جيل محترم مسؤول ومدرك يعني ايه تربية ..يعني ايه تربي إنسان سوي واثق في نفسة عارف هو عايز ايه عنده مسؤولية وقيم واخلاق واعيها وماشي بيها ...جيلنا ده كتر خيره اوي لانه وبالرغم كمية الصدمات اللي عاملين ناخدها فوق دماغنا لِسَّه بنحاول نكمل ونصلح كل اللي انكسر جوانا بس معاملتنا وكاننا آلات مش بشر ...كل الاهتمام بينا كان عبارة عن ماديات وفلوس وإزاي شكلنا يبقى كويس قدام الناس بس لكن النفسية اخر حاجة يهتموا بيها ده اذ اهتموا بيها اصلا ...احنا مش جيل متدلع احنا جيل ان شاء الله هيبقى منه التغيير للاحسن عشان احنا مش عايزين اللي حصل معانا يحصل مع ولادنا .

رد ٢/


احنا فعلا جيل أهله بيعامله معاملة ذوي الاحتياجات الخاصه من النواحي الماديه اغلب الاهل بيعملوا كل حاجه لولادهم ورغبه غريبه من الاهل للسيطره على الاولاد انا كنت كبيره في الجامعه وماما دايما في خلاف دائم لاني بنزل اشتري لبسي لوحدي وانا كده بنت سيئه وغير باره بأمها لاني ما أخدتش رأيها وأخويا عظيم ورائع لانها بتشتريله اللبس لوحدها بدون تدخل منه
احنا جيل مشوه من نقد الكبار واللوم والتأنيب وتعليق فشل علاقتهم ببعض علينا.
 احنا نتاج لافشل جيل في التربيه وأهم شيء انهم مقتنعين انهم عملوا اللي عليهم جدا.
احنا فعلا اترمينا في البحر وما بنعرفش نعوم وكمان من يوم مااتولدنا بيقوللنا عمركم ماهتنجحوا هتغرقوا يعني هتغرقوا
احنا الجيل اللي أهله حبسوه في البيت قاعد في مكانه قدام التلفزيون
الجيل اللي حبسوه في المدارس قدام السبوره
الجيل اللي بيسمع كلام الكبار حتى جوه شقته
كل كلامك صح لكن دلع مريء مادي وليس معنوي جيل محطم معنويا وماديا
لكن برضو احنا الجيل اللي بنقرا في العلاقات الزوجيه وبنقرا في التربيه وبنقرا في الطبيخ وبنقرا في تنظيف البيت وبنقرا في التجميل والميكب وبننحت في الصخر عشان مانغرقش

رد ٣/


مش حقيقي ..الفكره كلها ان البنات دلوقتي عندهم كرامه وعزه نفس وعارفين قيمه نفسهم كويس اكتر من امهاتهم اللي تخلوا عن حريتهم وارتضوا ظلم بعض الازواج وسوء اخلاقهم وانحطاطهم بمنطق السلبيه والاستضعاف وضل راجل والواحده مالهاش غير بيتها ولازم تضحي تضحيه غبيه ماتتقدرش وتضرب وتتهان عادي كأنها جاريه وده سببه اهالي ظالمه ومجتمع جاهل وعدم شغلها فبالتالي محتاجه اللي يصرف عليها..
نادرا دلوقتي اللي تقبل الاهانه والذل التضحيه والتفاني المطلق غباء وظلم النفس مش شطاره ...
كل اللي طلبوا الطلاق من اللي حوليا حاولوا مرات كتير يحافظوا عالحياه  مش من السهل اللي تهدم بيتها وتستغني عن الاستقرار الا اذا استحاله حياتها وماقدرتش تتحمل ..الاغلبيه العظمي من البنات بتميل للاستقرار والهدوء والطلاق اخر حل بتوصله مش اول الحلول..
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين