2054208194886930964305459023536687124329124620425345324432245227212526005525430010231005910972575227800005423858567245242500231905922702611555

8/15/2018

حكايات ماما زوزو

حكايات ماما زوزو

عصفور أمل 

بقلم دكتورة زينب زكى

عصفور واثق فى قدراته .. وعارف إزاى يحافظ على حياته .. وبنظرة أمل .. إتعلمت منه أمل .. تكون فى الحياة عندها أمل .. يا ترى ايه هى حكاية عصفور أمل ؟؟!! 

تعالوا نشوف ...

كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام 

كان فيه زمان زمان عصفور جميل .. كل يوم يرفرف ويطير .. وعلى غصن شجرة كبيرة ..عند شباك أمل البنوتة الجميلة .. يقف يصوصو ويغنى .. وأمل بنوتة جميلة وذكية .. لكن مترددة وهايبة الحياة .. رغم إن فى ايدها طوق النجاة .. 

كل يوم الصبح تصحى أمل على صوت العصفور الجميل .. وتتفرج عليه وهو بيرفرف بجناحاته .. وتستغرب هو إزاى مش خايف يقع من على غصن الشجرة الكبيرة .. 

وفى يوم من الأيام .. وأمل واقفة تتفرج على العصفور .. لقت الغصن بيهتز بقوة وعنف .. صرخت أمل .. وحست ان العصفور هيقع من على الشجرة .. 

لكن فجأة لقت العصفور مش خايف .. ولطريقه عارف .. وبسرعة إعتمد على جناحاته .. وقدر يحافظ على حياته .. رفرف وطار فوق فى السما .. وموقعش من على الشجرة .. زى أمل ما كانت فاكرة .. قعدت أمل تفكر كتير .. إزاى العصفور رغم كل الخطر دا مش خايف يقع .. وازاى طار بثقة ورفرف لفوق لفوق فى السما .. وبعد تركيز طويل وجدت السر الخطير.. 

السر فقط فى إنك تثق فى قدراتك .. وإنك هتقدر بالارادة تحافظ على حياتك .. ومن اليوم دا .. إتعلمت أمل إنها متهابش الحياة .. علشان عرفت إن فى إيدها طوق النجاة.. والطوق هو إنها تثق فى قدراتها علشان تقدر تحافظ على حياتها زى العصفور الجميل اللى وثق فى جناحاته وعرف يحافظ على حياته. 

وتوتة توتة خلصت الحدوتة

ماما زوزو
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين