شعر وحكاياتعام

يامايا اسمي شهيد

يامايا اسمي شهيد
بقلم/( شرين سعد أحمد )
شاعرة جنوب الوادي
يامايا أنا مسافر 
ادعيلي يا مايا
أرجع وللآخر 
سلاحي أنا معايا
،،،،،،،،،،،،،،،،،،،
بلدي ومحتاجة 
لدراعي هيدافع
مش راح أقول حاجة
القول وأنا راجع 
،،،،،،،،،،،،،،،،،،
لا تبكي يا أمي 
أصل الخطاوي نصيب
ولا تشيلي همي
وكفاية ياما نحيب
،،،،،،،،،،،،،،،
ياولدي قلقانة 
خايفة عليك م الموت
طول عمري شقيانة 
وبكاي كله سكوت
،،،،،،،،،،،،،،،،،،
سيبها على ربك 
لو ليا عمر هعيش
وطمني قلبك 
يااما ولا تخافيش
،،،،،،،،،،،،،،،،،،،
وادي العدا قبالي 
ودا جمعهم زايف
بيميني و شمالي
بضرب ومش خايف
،،،،،،،،،،،،،،،،،،
لكن الأجل أسرع
من طلقتي يامي
تشهدت وأنا بسمع 
صوت الضرب يمي
،،،،،،،،،،،،،،،،
ياماي إسمي شهيد
كتبوه على نعشي 
دانا مُت يوم العيد 
وعارف قبل مامشي
،،،،،،،،،،،،،،،،،،
اوعوا تقولوا مات 
ولا تقولوا فقيد
وانعوني كده ف سكات
وخدوني يلا بعيد 
،،،،،،،،،،،،،،،،،،،
وف قبري حطوني 
دا أنا شايفه كله نور 
وبعلمي غطوني 
وهاتوا أخويا يزور
،،،،،،،،،،،،،،،،،،
لقبري يجي شوي
يوعد لحقي يجيب
لكن ما يبكي علّي
ويقول فقدت حبيب
،،،،،،،،،،،،،،،،
وادي الملايكة صفوف 
جايه تبشرني
للجنة يلا شوف
بنعيمي تفرحني
،،،،،،،،،،،،،،،،،،،،
وقالولي هشفعلكِ 
يا أمي ولأهلي
وبلهفة راح أقابلكِ
للجنة تستاهلي
،،،،،،،،،،،،،،،،،
مش قلتلك يا ضناي 
قلبي مهوش مرتاح
طب كيف أعيش الجاي
من عمري فرحي راح
،،،،،،،،،،،،،،
طب مين يكفّني 
ما أنت الكبير يا هووه
وفي لحدي يدفني
وياخد عزاي وأبوه 
،،،،،،،،،،،،،،،،
مين اللي هيشيله 
يسند عليه ضهره
في صلاته يدعيله
يطول ف عمره 
،،،،،،،،،،،،،،،،،،،،،
يا أمي خلاصنة 
الحزن ما ينفع
وسيرتي بقيانة 
ولربي أنا هرجع
،،،،،،،،،،،،،،،،،، 
فيه غيري بالآلاف
ضحوا بارواحهم
ولا حد منهم خاف 
والكل عارفهم
،،،،،،،،،،،،،،،،،
دي بلدنا تستاهل 
نفديها بالغالي 
فمش هنتساهل
وفداها أنا وحالي

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock