2054208194886930964305459023536687124329124620425345324432245227212526005525430010231005910972575227800005423858567245242500231905922702611555

5/17/2019

اسكندر كباب

اسكندر كباب



مقادير اللحمه أو الدونر

نص كيلو لحمه مفرومه حمراء نضيف عليها ٣ معالق كبار زبادي وملح وفلفل وزعتر وبابريكا ونعجنهم مع بعض كويس ( هي دي مكونات اللحمه الاصليه لكن لو تحبوا تضيفوا اي بهارات تانيه براحتكم يعني ممكن تضيفوا بصل بودره وتوم بودره ممكن بهار لحمه ممكن شطه لو تحبوا) 
( كمان لو اللحمه اللي عندكم مش حمراء وخايفين تفك منكم ممكن تضيفوا عليهم معلقتين دقيق بس تحمصوهم الاول ولو عاوزين اللحمه تبقي هشه ومش مكتومه ضيفوا ربع معلقه صغيره كربوناتو)
هنعجن كل المكونات مع بعض ونحطهم علي بلاستيك فيلم ونشكلها اسطوانه ونلفها بالبلاستيك كويس مع الضغط من الطرفين عشان ما يبقاش في فراغات وندخلها الفريزر تتجمد وبعدين نطلعها ونقطعها شرايح وهيا لسه جامده ونحمرها وهيا لسه جامده في طاسه فيها معلقه زيت وزبده من الناحيتين لحد ما تستوي ونشيلهم من الطاسه

 مقادير الصلصه:-

في نفس الطاسه اللي شوحنا اللحمه فيها نشوح ٣ فصوص توم مهروسين ناعم ونضيف معلقه كبيره صلصه طماطم ومعلقه هريسه شطه لو تحبوا ونضيف ٥ طماطمات مضروبين في الخلاط ومتصفين وعليهم نص كوبايه ميه ولو تحبوا مكعب مرقه وملح وفلفل وزعتر وبابريكا وجنزبيل بودره ونسيبهم يغلوا شويه ويتسبكوا نص تسبيك كده
طبقه الزبادي :- ٤ علب زبادي هنخلطهم مع ٣ فصوص توم مهروسين ناعم جدا وملح
نجيب بقي خبز البيدا اللي نزلته من يومين نقطعه مكعبات ونحط عليه حته زبده ونحمصه في الفرن او في طاسه واسعه
بعد كده في طبق التقديم نحط مكعبات العيش المتحمص ونوزع عليه معلقتين من الزبادي ومعلقتين من الصلصه وبعد كده طبقه اللحمه وبعدين باقي الصلصه وبعدين باقي الزبادي
نزينه ببقدونس واي مكسرات 
وقرون شطه مشويه وطماطم مقطعه اربع نشويها
وفي الاخر عند التقديم نسخن معلقه زبده ونطشها علي الوش


( في طرق مش بيستخدموا فيها لحمه مفرومه لكن بيعملوه بشرايح لحمه بفتيك رفيعه او فلتو نتبله بمله وفلفل ومعلقتين خل وممكن معلقه زبادي ونشوحها في معلقه زبده وزيت لحد ما تستوي ونكمل الباقي
ولو حسيتوا ان اللحمه بتشد ومش طريه ممكن تضيفوا شويه من صلصه الطماطم عليها وتسيبوهم علي نار هاديه تستوي وتتشربها)
( لو مش هتعملي خبز البيدا اقرب عيش ممكن تستخدميه في الوصفه دي هيا العيش البلدي
وممكن تعملي عجينه بيتزا عاديه وتسويها وتقطعيها مكعبات بنفس الطريقه)
في طرق بتضيف بصل محمر علي الوش عند التقديم
التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين