أخبار وفنعام

المذيعة هناء عصام ترد على عمرو اديب عبر الفيس بوك




المذيعة هناء عصام ترد على عمرو اديب عبر الفيس بوك

  كتب – سامح عبده 
 كتبت هناء عصام مذيعة الفضائية المصرية على صفحتها بالفيس بوك ردا على هجوم عمرو اديب على العاملين بماسبيرو ببرامجه كل يوم تقول: ماشي يا استاذ عمرو هنستقيل ونروح نفتح اكشاك علي ناصيه بيتكوا نبيع بسكوت وحاجه ساقعه للمدام وهي راجعه من مدينه الإنتاج بعد ما تنتج وتتعب وتدفع بعجلة التنميه !! حاضر يا استاذ عمرو هنروح بيوتنا ونقعد ع الكنب والكراسي لأن مفيش اساسا مكان تاني نروحله بعد ما نمشي.. بس ماتنساش إحياة ابوك وانت بتدعي ومقهور اوي ع الشعب المصري الغلبان اللي سفحنا فلوسه ف جيوبنا انك تدعي للي مش هيقدر حتي يتعالج لما تقفلها وتشرد آلاف الناس !! عينينا يا استاذ عمرو انت تؤمر واللي فوقك يؤمر و30 الف موظف ينفذوا فورا !! بس قبل ما نمشي يا استاذنا كنا بعد إذن جنابك وجناب اللي موصيك علينا عايزين حاجه هايفه كده حلاوة نهايه الخدمه .. ممكن واحنا ماشيين تدونا صحتنا اللي راحت واللي استخسرتوا فيها حتي تمن العلاج لما حد فينا بيقع ..بعد ماضحكتوا علينا سنين بحاجه اسمها تأمين صحي كنا بندفعه من جيوبنا كل شهر ؟؟ ينفع بعد اذنك جزء من أحلامنا وطموحنا و حماسنا اللي اتداس عليه بالجزم يوم ما دخلنا منافسه مع الرقاصات والعوالم والارتيستات عشان هما بيجيبوا اعلانات واحنا لا ؟؟؟ ممكن لو مكنش عندك مانع ترجعلنا فلوسنا اللي اتنهبت علي مدار سنين وبقينا نصرف ع البرامج من جيوبنا والناس فاكرين أننا احنا اللي عاله عليهم علي الرغم من أننا مثلا لسه مقبضناش اساسااااا شهر 11 اللي فات ؟؟ ينفع بس لو مفيهاش سخافة مننا تعوضلنا مستقبلنا اللي ردمتوا عليه التراب من ساعه ماحولتونا لموظفين روتينيين واللي يحاول فينا يتميز ولا يشتغل بضمير بيتضرب بالنار ويتكوم جمب اخواته ! ينفع تقرأ معانا الفاتحه علي كل إبداع اتقتل جوانا وأي حلم كأن نفسنا نحققه وأي رساله كان ف نيتنا نوصلها باحترام ومهنية وصدق واتدفنت تحت اسم سقف المرتب والسبوبه وغيرها من اسلحه الدمار الشامل ! هنسيبهالكوا يا فندم تحت أمرك لأننا أساسا مهما قلنا ومهما حاولنا لا كان ولا هيبقي لينا صوت ولا صدي زي حضراتكوا اصل بعيد عنك تخيلنا الإعلام مهنية مش صوت عالي وجعجعه ومصالح وعلاقات ..ههههه شفت غبائنا ا!! يا استاذ عمرو خدوا الاعلام كله حضرتك وبقيه العشره المبشرين بالشاشه ..خدوا معاكوا كمان الرأي العام اللي متحكمين فيه تماما …خدوا فلوس التلفزيون ومكتبته وتاريخه وامكانياته.. خدوا ماسبيرو واعملوه صاله بلياردو يمكن يزود الدخل القومي …خدوا شهادتنا ودورتنا وخبراتنا وفحت السنين قدام وورا الكاميرا …خدوا كل حاجه واكبروا انتوا كمان وكمان …بس الله يكرمك أدونا حاجه واحدة بس…..بعد اذنك يعني ان مكنش فيها رزاله ياريس …. عايزين عمرنا

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: