عام

شماعة الأكتئاب.


بريد القراء أعداد: هويدا صابر
(صديقه ليه كانت بتتكلم مع طبيب نفسي مشهور وصديق ليها ، قالتله بضحك أنا مكتئبه وعايزه حضرتك تعالجني ، قالها لا الكلمه دي مش سهله تتعودي عليها أنا مكتئبه أنا مكتئبه ، فتبتدي تدمري حياتك بالبطئ ، والوهم دا يسيطر عليكي مش هعمل كذا النهارده أصلي مكتئبه و مش نازله شغلي أصلي مكتئبه دايره الأنسان بيدخل نفسه فيها بالوهم ، ومعظم الناس أللي بتجيلي العياده بتقولي أحنا حاسين بأكتئاب يا دكتور مش قادرين نعمل حاجه ، أقولهم مش قادرين تعملوا ولا مش عايزين تعملوا كنوع من أنواع الهروب).
فعلا أحيانا البعض يعلق هروبه من المسؤليات أللي عليه علي شماعة الأكتئاب ، وليه كلمة أنا مكتئب دي بقت زي اللبانه وبتتقال كتير وأغلب الناس أللي بتقولها زاروا أكبر دكاتره نفسيين وقالولهم معندكوش حاجه ، منهم مشكلتنا دي:


دي مشكلة السائلة س ح: 
أنا متزوجه وعندي 333 سنة ومعايه بنتين مشكلتي بدأت من سنتين ، أبتديت أعاني من أكتئاب شديد جدا ، وحاسه أني هموت وأهملت في بيتي وشغلي سيبته بسبب أني مبقدرش أقوم من النوم عشان أنزل ، أقوم الصبح أحس أني مخنوقه وفي ضيق فمنزلش ، حاله من الضيق والخنقه وعصبيه بأستمرار وزعيق في زوجي وبناتي وأمي تقولي جوزك إذا أستحملك النهارده مش هيستحملك بكره يابنتي فوقي لنفسك ولبيتك وعيالك قبل متخسري كل حاجه وأحيانا مبترضاش تجيلي تقولي قومي وأتنشطي وشوفي بيتك ، أنا أغلب الوقت مش عايزه أنزل من بيتي ولا أعمل حاجه في البيت ، والموضوع دا طبعا أثرعلي زوجي وبناتي بسيب بناتي معظم الوقت عند أمي أو بجيبها تقعد معايه هي وأختي الصغيره ، وروحت لدكاتره كتير قالولي مفيش حاجه عندك وأخدت أدويه بلا نتيجه ، وكل يوم الأحساس دا بيزيد عندي ، ومش عارفه اعمل أيه أنا تعبانه جدا ، وزوجي كويس جدا وبيعاملني بحب ومش فارق معاه فلوس شغلي. 
السائلة الكريمة: 
أنا طبعا في البدايه سألتك زوجك بيعاملك أزاي قولتيلي أحسن معامله ، وٍسألتك في مشاكل عندك قولتي لا خالص حياتي كلها مستقره حتي الشغل مكانش فيه مشاكل وفهمت منك أنك لما كنتي بتحسي أنك مخنوقه الصبح ومش عارفه تاخدي نفسك وحاسه أنك هتموتي فتقرري أنك مش نازله الشغل بترجعي تنامي عادي ، أنتي روحتي لأهل العلم طبعا وأكبر دكاتره قالولك مفيش عندك حاجه لأن دي الحقيقه أنك معندكيش حاجه ، أنتي زهقتي من مسؤلية البيت والروتين اليومي المفروض عليكي فهربتي منه بالطريقه دي أنا مكتئبه أنا مخنوقه بدليل أنك لما كنتي بتقومي الصبح لشغلك وحاسه أنك مخنوقه ومش قادره لما مبتنزليش بترجعي تكملي نومك في سلام عادي الخنقه بتروح وأبتديتي تستسهلي أبعت بناتي عند أمي أو أجيب أمي وأختي يشيلوا مسؤلياتي في البيت ، أنتي كنتي في غني عن أنك تدخلي نفسك في الدايره دي ، كان ممكن تعملي لنفسك جو مختلف قولي لجوزك هنتغدا النهارده بره مكانش هيمانع في أي مكان بسيط مش مكلف منها خرجتوا من الروتين اليومي وغيرتوا جو أو أعملي الغدا سندوتشات زي بتاعة بره وأخرجوا كلوه بره البيت ، أو بليل تروحوا أي مكان أبسط شئ أتمشوا وأرجعوا ، شغل البيت دا شئ كل الستات بتعمله بس في ستات منظمه وبتعرف تسعد نفسها لأنها بتعمل الشئ بحب وفي ستات لا ، يعني في ست مثلا وهي بتعمل شغل البيت بتشغل الأغاني أللي بتحبها بصوت هادي وبتكون مبتسمه عشان جواها رضا وبتحمد ربنا علي نعمة البيت والزوج والأولاد خصوصا لما يكون الزوج كويس 


 أعملي لنفسك ساعه في اليوم أقعدي فيها مع نفسك راحه أو أعملي حاجه بتحبيها ، وأعملي ساعه رياضه مش لازم نروح جيم وندفع فلوس ، غيري في شكلك أهتمي بنفسك أكتر وشوفي وزنك لو محتاج رجيم أعملي ، أصل جوزك ملوش ذنب ولو بص لغيرك بسبب تقصيرك أنتي أللي هتندمي وهيكون فات الأوان ، وغيري في ترتيب البيت ضيفي لمسات جديده فيه وأعملي ركن فيه أخضرولو زرع صناعي ، وفي البلكونه أزرعي ريحان أو نعناع حاجه ريحتها تعملك بهجه وخلي البلكونه حتي ولو صغيره ممكله ليكي ، كل دي حاجات بسيطه جدا وغير مكلفه بس بتسعد ، أعملي زي ما مامتك قالتلك أتنشطي وأقومي بيتك لسه في أيدك وفي أنتظارك ألحقيه ، ومادام الدكاتره قالوا معندكيش حاجه مفيش داعي للأدويه ، أستعيني بالله وصلي وداومي علي القران والتسابيح ، ألا بذكر الله تطمئن القلوب ، وأن شاء الله تكوني في أفضل حال ، وربنا يصلحلك الأمور.

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock