شعر وحكاياتعام

الفيلم الرومانسي



علا السنجري
النهارده اليوم الرياضي والأولاد رايحين النادي ومن فرط سعادتي قرر والدهم يروح معاهم ويريحني و يمارس حبة رياضة معاهم،،،، يا سلام وماله يا أخويا يلا قضوا وقت جميل ……. قفلت وراهم الباب بالمفتاح ياااااااااه هدوء الله ،،،، بسرعة نظفت البيت واخدت صينية القهوة والسبرتاية …. اه سبرتاية اصل القهوة مزاج تاني بيها ،،،،،، قعدت قدام التليفزيون وقلت ادور على فيلم ابيض واسود من الزمن الجميل اللي بحبه……. ويا سلام على فرحتي .
 
لقيت فيلم لعمر الشريف و فاتن حمامة ……. الله على الرومانسية…. اخر روقان . اندمجت مع الفيلم و انا بشرب القهوة وفجأة يطلع مارد يقول فاصل ونواصل….. ماشي يا عم نتحمل شوية اعلانات عشان خاطر الروقان يكتمل.
 
لكنه لم يكتمل،،،، اه والله ،،،، كم إعلانات لسلع استفزازية ……للبان اللي بيتطرقع وايه الإستوك ده والبسكوت اللي يدوب في البق و الشيكولاتة و المحمول ،،،،، يالهووووووي ،،،،،، ياعم الحج انا ست مريضة هات الفيلم يلا ،،،،،، تتوالى الإعلانات بأمتلك شقة والسعر حكاية و المنطقة هادية بس على البحر في أخر الدنيا …… نهاررررررك مالوش ملامح …… الناس عاوزه تسكن مش تصيف.
 
رضيت بالأمر وقلت هانت ودلوقتي يجي الفيلم ،،،، لكنه لحقني بإعلان تاني عن فعل الخير ،،،، وماله ياخويا شيء جميل و ساعد في بناء قرية في الصعيد….. و مرضي القلب … والسرطان…كتبت الارقام وقلت حساهم وربنا يشفي كل مريض.
زاد الامر عن حده بإعلانات الزيت والسمنة و التجميل …… ونسيت أنا كنت بتفرج على ايه . استمرت الإعلانات اكتر من ساعة .
 
وزادت الحكاية بالشريط اللي في آخر الشاشة تحت كله برضو إعلانات عن بيع شقق و أراضي و عيادات التجميل والتخسيس و العلاج بالأعشاب.
كله كوم وإعلانات الدجل والشعوذة والشيخ المغربي اللي بيجلب الحبيب في ساعتين …… أعوذ بالله من السحر ،،، للدرجة دي هما جهلة .
اللهي تتوكسوا يا بعدة ،،،، يعني الواحد لما يبعد عن البرامج الحوارية والإخبارية اللي عاوزين جنازة ويشبعوا فيها لطم حسب مصالحهم ،،،،، يقع في قنوات بتبيع الوهم وتغسل الدماغ . منكم لله يا موكسين ضيعتوا ساعتين الروقان ،،،، حسبي الله ونعم الوكيل في ده إعلام….
تحياتي
بنت_سلطح_بابا

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: