عام

البيه مش رومانسي



بريد القراء أعداد : هويدا صابر.
يا جماعه لااااازم فترة الخطوبه بين أي أتنين تطول عشان يعرفوا بعض أكتر ويدرسوا بعض كويس جدا بلااااااش تسرع ، لاا يا جماعه أوعوا تطولوا فترة الخطوبه خير البر عاجله دي فترة الخطوبه لما بتطول المشاكل والخناقات بتكتر شهرين تلاته بالكتير وتجوزوهم…

وبعدين بقي أيه الحيره دي نطول فترة الخطوبه ولا نقصرها ولا نلغيها من أساسه أصل في ناس بتعمل كده فعلا ، المهم نشوف مشكلتنا دي وبعدها نحكم.

دي مشكلة السائله……

السلام عليكم أنا متجوزة من فترة مش كبيرة أووي ، وجوازي جه بسرعة جداا ملحتقش أتعرف علي جوزي كويس ، هو طيب أووي وحنين جدااا ، بس عيبه أنه مش رومانسي خالص ولا يعرف أي حاجة عن المشاعر والحب ، أنا طول عمري نفسي أتجوز حد يحتويني ويكون حنين عليا لأني تعبت كتيير جدااا في حياتي قبل ما أتجوزه ، أنا سألته أنت أتجوزتني ليه ، قالي لو مكنتش بحبك مكنتش أتجوزتك بس أنا كدة مبعرفش أتكلم ، الموضوع ده مأثر جداا عليه نفسيااا ، وخصوصا أن بعد ما أتجوزنا فضل معايا فترة صغيرة أووي وبعدها سافر علي طول ، هو دلوقتي بعيد عني ومستخسر حتي يقولي كلمتين حلوين في التليفون ، المشكلة بقا أني ساكنة في بيت عيله وأول الجواز كان لازم ننزل أول ما نصحي تحت عند حماتي طول النهار لحد بليل ولا بقعد معاه ولا بتكلم معاه ولا حتي خروج زي أي أتنين عرسان ، وهو مش بيحب الخروج كمان الجواز جه بسرعة ملحقتش أعرف طبعه ولا شخصيته ، وفيه عيب قاتل أنه مرتبط جداا جداا بأمه بشكل مرضي وبيقولي لو كسبتيها كسبتي الدنيا كلها ، وأنا علي طول تحت معاها وبعمل كل حاجة ومش عجباها ، وأي حد من صحباتي لما أحكيله يقولي حماتك جامدة جدااا وشخصيتها قوية وهي فعلا كدة ، هو دلوقتي بعيد عني وأنا حماتي مطلعة عيني وهو يقولي ربنا فوق وأمي تحت ، وأنا تعبانة وزهقانة وحاسة أن الدنيا كلها سودة في وشي ، ومن وقت الجواز وأنا كل يوم عياط لحد متعبت جدااا ، حتي قولت يمكن أكون حامل لأن نفسي جدااا أخلف وأقول البيبي هينسيني كل المشاكل ويهون عليا مطلعتش حامل وأنا بعشق الاطفال جدااا.

أنا عارفة أن جوزي عمره ما هيتغير مهما عملت معاه ، والظروف كمان أللي أنا فيها عمرها ما هتتغير أنا عايزاكي تنزلي المشكلة من غير أسم.

———————-

السائله الكريمه: أولا مفيش أطفال لما بتيجي بتنسي مشاكل يعني هو مش هيبقي رومانسي فجأه لما تخلفي لأن دا طبعه وكتير من الرجاله كده مبيعرفش يقول كلام حلو ، ولا أمه هتتغير معاكي في معاملتها عشان بقي في طفل ، دا طبع والطبع غلاب ، فالبتالي في أطفال أو مفيش أنتي هتفضلي مشحونه بمشاكلك معاهم لأن طباعهم مش هتتغير ، وأنتي مشكلتك زي غيرك بيت العيله نتجمع كل يوم طول النهار تنضيف وتحضير أكل للعيله كلها أو بمعني أصح البيت كله من أول دور لأخر دور ، وأخر اليوم كل واحد يطلع شقته تعبان وهلكان وعايز يستريح ، لا في راحه ولا خصوصيه ، وللأسف مفهوم بيت العيله بقي غلط جدا بدل ما ألم أولادي حواليه عشان بكبر في السن وكل واحد يكون ليه شقته وخصوصيته ، لا بيكون روتين وشغل يومي في بيت الأب من زوجات الأبناء وكمان شغل بيتها دا غير أن طول اليوم بملابسك الرسميه ، الحياه مش كده دا أحنا بالطريقه دي بنعجل بالتعب والمرض ، وكل واحده أكيد هتجيلها لحظه عايزه تلبس أو تقعد في بيتها براحتها تستقبل جوزها ، ولو في أطفال هتحتاج مجهود من الأم مع المجهود اليومي حقيقي كتير أوي ، الأب والأم لو لقدر الله تعبوا وهيحتاجوا حاجه أكيد محدش هيتأخر عنهم خصوصا لو في بيت واحد ألا لو كان أنسان غير بار بيهم أو جاحد ، وأنا بصراحه شوفت بيوت عيله كتير كل شقه مقفوله علي نفسها بمشاكلها بأكلها بشربها ، والأم والأب لما بيحتاجوا حاجه أو بيتعبوا بيقسموا مع بعض كل واحد يوم.

ومن وجهة نظري بالنسبه لفترة الخطوبه طولت أو قصرت مش هتفرق أحيانا بتطول وبتظهر عيوب والبنت بتعديها والأهل كمان بحجة أن الخطيب بعد الجواز هيتغير ، أنا شايفه أن مشكلتك الأساسيه مع أمه وهو فارض عليكي التواجد معاها بأستمرار ، وموضوع أنه مش رومانسي دي ماهو ممكن يقولك كلام حلو جدا قبل الجواز وبعده متسمعيش منه حتي كلمة شكرا ، فلو أنتي حاسه أنه بيراعي ربنا فيكي وبيخاف عليكي وبيكلمك يطمن عليكي بأستمرار وبيبعتلك مصاريفك وبيعاملك بكل أحترام وبينفذلك طلباتك المشروعه فترة تواجده معاكي وعلاقتكم الخاصه كويسه ، يبقي عدي أنه مش رومانسي خليكي أنتي رومانسيه معاه وواحده واحده من غير متقوليله قولي كلام حلو أنت بتحبني ولا لأ واتجوزتني ليه أرجوكي أنسي الأسئله دي خالص ، كلمك في التليفون خليكي هاديه ورقيقه معاه وصلي ليه أن عدم وجوده فارق معاكي وهكذا …. وبعدين هو أتجوزك عشان شايفك مناسبه ليه أكيد وزوجه وام لأولاده ، تعاملي من غير عصبيه منك وأن شاء الله هيتغير معاكي ، أما أمه حاولي قدر الأمكان تجاهل تصرفاتها أللي بتضايقك وكبري دماغك معاها زي مبيقولوا روحي بيت أهلك كام يوم وأرجعي كأنك تعبانه أو عايزه تغيري ، ويبك من كلاااااام صحباتك عشان أحيانا الصحبات هتقولك كلام هيخليكي تشيلي أكتر من حماتك وجوزك ، أنتي يكون عندك عقل وفكري بهدوء وصح في حياتك ومصلحتك.

ولو حاسه أنك متضرره ومش متقبله حياتك معاه ومع أمه أنتي ليكي حق طلب الطلاق منه ، ومحدش يقدر يحاسبك علي طلبك دا لأنه حقك ، لكن فكري وراجعي نفسك الأول وحاولي قبل قرار الطلاق ، وربنا ييسرلك الخير.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: