شعر وحكاياتعام

مش جميله

بقلم هاله فتحي



====


مش جمـــيله

بس انا باشعر و احــــب
مش جميله
بس عندي يا خلق قلـــب
ليه نصيبي تمــللي جارح
يكفي قسوة دي الملامـح
زيكم و ف قلبي روح
نبــض يعشق أو يـــبوح
ليه تقـــابلوني بجروح
و اعتــبرتوا الشكل ذنـــب
هي غلطــه لوني أســمر
أو عــيوني ماهيـش بتســحر
ما تقيســوها بلون دموعي
لما نظـــراتكم بتكــسر
و الألم ده بجــد صعب
ذنــبي اني مش طويـــله
و ابتســـامتي مش جميله
اعتبرتوا الحســـن فضل
و الوحاشه بقت رزيــــله
و القبيح مالهش قلـــــب
بس قلبي .. رغم قبحي .. لسه شايل نبض شوق
لسه بتحرك مشــاعري اي بسمه تاخدني فوق
فجأه اطير و أفرد عـــنادي
و أنســي تفاصــيلي و ملامحي
ألقي قسوتكم قصـــادي
و النتيجه بتبقي جرحــي
خدتــوا مني الحق اني أكون حبــيبه
شكلي .. وسط الخلق خلا غـــرامي .. عيــبه
و المصـــيبه
ان عندي م المشــاعر كم فوق طاقه البشــر
بانسي نفسي و اما اقرب .. قلبكم زي الحجـــر
خليــتوني شايله وصمه .. ذنب ومحــال يغـتفر
م المرايه بقيت باخـــاف
نفسي أحس الاخـــتلاف
نفسي تشوفوني بقلوبكم
مش ورا حروفي الـ خفاف 
ما أســتخباش م العيون
و لا تقتلني الظــنون
نفسي أتحرر و أخـــــرج
بره سجن …. التليفون
مش جميله
بس أنســـانه و بحــــــب
مش جميله
بس عندي .. يا خلق … قلب

مدير قسم الأدب والشعر


علا السنجري


مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock