شعر وحكاياتعام

الصديقان


ثروت بديع

كابوسك ناموسك صناعة إيديك

تصاحبه ويصاحبك ويبقى خليلك

ويبقى الصديق ويبقى الشريك

تبوسه ويبوسك يطبطب عليك

يزود جروحك يمصمص ف روحك

تجز ف شفايفك تقطع فى نابك

لو ياكل منابك برضه تراضيه

لو سابك وهاجرك تجرى تقاضيه

تحس انه منك و واخد ملامحك

وساعة ماتصحى تطمن مخاوفك

تدور لحسن يفلفص يضل الطريق

ونعم الصديق ونعم الرفيق

وخوفك غموسك تاكله وياكلك

تحلف عليه ومايحلف عليك

تسن ف ضروسك وتعمل جَرِيء

مرايتك تلاعبك وتضحك عليك

تسمع صريرك كأنه زئير

تكبت شهيقك وتُنكت كتير

تنحت خنوعك بذمة وضمير

تحرس عبوسك وكإنك غفير

تشجب ظروفك تلعن حظوظك

تشكى وتبكى بشهقة وزفير

ف بورصة رضوخك

رصيدك متلتل رقمك كبير

سعيد لو وحيد !!!

سعيد لو فقير !!!

!!! بتكدب كمان

وكدبك غريب !!!

إكدب وإكدب وإكدب كمان

أُسكن ف زيفك قول مش جبان

تلقى ف خريفك راحة وطمان

قول ان زمنك مغفل

معاند مقاوح حقير

قول ان حظك منيل

مشاغب مشاكس سئيل

قول انك طويل والعالم قصير

هاتفضل إرادتك رافضة المعافرة

رافضة المناكفة إرادة تيوس

وكل مشاغلك نقش الكابوس

هاتذاكر وتفشل و تفضل مغفل

وعمرك ماتنفع فيك الدروس

مدير قسم الأدب والشعر

علا السنجري


مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: