أدم وحواءعام

فكري ووفري

..

بقلم الخالة وداد
طبعا يحابيبي كتير طلب من خالتكم حبيبتكم افكار نوفر بيها في الايام الضيقة دي.
طيب تعالي كده يحببتي انت وهو نشوف كمية البذخ الي بتعملوه
ياستي بدل ما تروحي للكوافيرة مره ولا مرتين في الشهر اتعلمي انتي ازالة الشعر والصيغات مع نفسك وهتطلعي زي القمر وكده وفرتي وفي نفس الوقت اتعلمتي حاجة جديدة تضيف لثرائك النفسي
وانت ياسيدي بدل ما كل صغيره وكبيرة تبوظ في البيت تجبلها واحد شكل اتعلم وافحص مع نفسك وعالج بيتك مع نفسك وبكده وفرت وفي نفس الوقت اضفت لعقليتك شئ جديد.
انا افتكر ستي وجدي الله يرحمهم بقي كانوا اسطوااات ميدخلوش حد البيت ابدا اتعلموا كل حاجة مع نفسهم عشان كده مكنوش بيشيلو امراض وعاشوا سعدا.
المهم بدل ما بتبعزي في الفلوس او مصروف البيت اتعودي تحوشي منه دايما ان شاء الله ١٠ ج وشهر علي شهر هتعملي مبلغ يسند.
كمان بلاش تجيبي من كل حاجة كيلو واتنين كفاية نص ولا ربع وكده بتوفري وبتكسبي وبتعودي نفسك وولادك التصرف في المواقف الحرجة وكمان التعامل علي اد الموقف ..
لو ليكي مصروف خاص بلاش تضيعيه كله علي اللبس والمكياج دكني جزء للعوزة ومش كل شهر يبقي رفاهيات يعني ثقفي عقلك واستثمري في نفسك…
اما انت ياسيدي مش لازم تتفشخر وانت مش معاك عشان الجيران ولا الصحاب يحترموك .انت ادري بظروفك ومتبعزئش علي التافهات.
لو بتحلق بره اتعلم تحلق لنفسك في البيت هتوفر وتكتسب مهنة ومعلومة جديدة..
مش لازم تاكل اكل غالي مشيها مره فول ومره لحمة ولو جدع بلاش دهون خالص وخليك نباتي ورياضي كده ذي خالتك.
اصرف بس علي الاولويات الضرورية .هتقولي والولاد اما تعودهم او تعملهم مصروف وكل واحد يحوش والي نفسه فيه يبقي من تحويشته
بدل ما بتركب تاكسي بالشئ الفلاني اركب ميكروباص والاحسن امشي لو مسافه بسيطة
خليك بسيط هتعيش
الي عاوز يعيش بقرش ياولدي هيعيش والي اقصده الي عنده ثقافه التوفير والبساطة هيعيش باقل الامكانيات ومش هيشتكي..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: