شعر وحكاياتعام

كلمتين فى حدوتة ع الماشى مع زوزو

بقلم دكتورة زينب زكى 
طول م ايدى فى ايد اخواتى محدش فى الدنيا هيقدر يدمر حياتى 
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه زمان زمان ست جميلة مؤمنة جدا بالكفاح والعمل واسمها امل وكمان كان فيه اولادها الحلوين احمد ومنير وكمان سمير ايه اللى حصل ؟؟؟؟ تعالوا نشوف …
فى يوم من الايام زرعت أمل شجرة كبيرة فى حديقة بيتها الكبير وكانت تقعد تحتها وتسرح بخيالها وتلم حواليها عيالها يستمتعوا بالجو الجميل وكانوا يجروا حواليها ويلعبوا كتير .. مرات ينبسطوا ومرات يختلفوا كتير .. لكن امل كانت حكيمة وتعرف ازاى تفض مشاكل اولادها مع بعضهم وكانت دايما تقولهم الحب والود اللى بين الاخوات اكبر من كل المشكلات .. ويوم ورا يوم يكبروا الاولاد ويفكروا فى كلام مامتهم امل وكل ما تحصل بينهم مشكلة يفتكروا كلامها وعلى طول يرجعوا يلعبوا مع بعض كتير
وفجأة .. وفى يوم من الايام حصلت مشكلة كبيرة واختلف الاولاد وخاصموا بعض وكل واحد فيهم قرر ما يصالحش اخوه واخدوا عهد ميلعبوش تانى مع بعض .. زعلت امل منهم وبسرعة قالتلهم مينفعش تخاصموا بعض انتوا اخوات والاخوات لازم يكونوا حزمة واحدة علشان بكرة ..
استغرب الاولاد وفكروا .. وبسرعة بدأوا يسألوا عن معنى الكلام .. ويعنى ايه يكونوا حزمة علشان بكرة ؟
اخدتهم أمل عند الشجرة وقالتلهم ايه رأيكم نقدر نكسر منها فرع ؟ قالولها طبعا وبكل سهولة .. 
قالتلهم طيب نقدر نكسر فرعين مع بعض ؟ قالولها صعب ..
قالتلهم طيب لو كانوا تلاتة نقدر نكسرهم ؟ قالولها مستحيل ..
قالتلهم هى دى الفكرة .. 
بكرة هتكبروا ولازم تتسندوا على بعض زى فروع الشجرة .. لما بتكون فى شكل حزمة وفروعها واقفين جمب بعض صعب الايام تتنيهم او تكسرهم لكن لو اتفرقوا وبقى كل فرع وحيد تضعف قوته حتى لو كانت حديد لأن القوة فى اتحاد الاخوات مع بعض ومهما حصل بينهم مش لازم الايام تفرقهم ويقدروا يتحاموا فى بعض ويتسندوا على بعض 
فهم الاولاد احمد ومنير ومعاهم سمير وقرروا يتحاموا فى بعض ويتسندوا على بعض زى مامتهم امل م علمتهم 
ومن يومها وهما ايد واحدة وكل ما تقابلهم مشكلة يفكروا فى بكرة ويرجعوا تانى لبعض اخوات واصحاب يتحاموا فى بعض ويتسندوا على بعض وميقدرش عليهم اى حد طول ما هما ايد واحدة ومع بعض 
وتوتة توتة .. خلصت الحدوتة .. حلوة ولا 
تحياتى للجميع 
ماما زوزو

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: