أدم وحواءعام

مفتاح شريك الحياة


مفتاح شريك الحياة

بقلم : نشوي محمد مظهر
اخصائية الارشاد الاسري والتربوي

في حياتنا مفاتيح كتير بتسهل علي كل شخص منا فهم الطرف الاخر والاقتراب منه ومعرفته بشكل اوضح وادق ..

وفي الحياه الزوجيه خاصه مفاتيح بتكون باب سعادة للطرفين واستقرار لاسرتهم ومن المفاتيح دي ( مفتاح الحوار )

الحوار هو القناه الموجوده داخل الاسره اللي تقدر توصلنا بالطرف الاخر شريك الحياه .

الحوار بيساعد انك تعبر عن نفسك .. حياتك .. خبراتك .. وحتي بيئتك .

وفي الحقيقه هو اللي بيظهر رقي افكارنا وبيعبر عن تقبلنا للاخر لانه ببساطه اداه تعارف وفهم لجميع الاطراف في حياتنا مهمه جدا .

بس الحوار في الحياه الزوجيه بيكون مختلف ومش بعتبره اداه للتعبير اللغوي فقط .. لان الحوار هنا بيشمل لغه .. مشاعر .. افكار مشتركه .

ومقدرش اتخيل ان يكون في زوجين بيسعوا لحياه مستقره ومرنه ويحققوا ده من غير ما يفهموا لغة الحوار السليم واهميته .

وللاسف بقابل اسر غاب عنها الحوار والتفاهم بشكل سليم واللي احيانا بيبقي من الاسباب الاولي والمباشره للطلاق .

وعلشان نسرد الموضوع بشكل سليم لازم نعرف ان في معوقات لعمليه الحوار بين الزوجين ..

اهمها الفهم الخاطئ للطرف الاخر بمعني ان كل واحد بيفكر بشكل وطريقه مختلفه ومش بيسمع غير وجهة نظره وخبرته فقط .

فلو مثلا شوفنا الزوج لما بيفترض ان الزوجه بتتصرف زيه بالظبط في طريقة تفكيره وكلامه وردود افعاله فمش هايبقي في تفاهم لان الحقيقه ان دي وجهة نظر غلط الراجل بيفكر بشكل مختلف تماما عن المرأه .

نقطه ثانيه بنلاحظها وهي استهانت الزوج في الغالب بشكوي زوجته من باب انها زوجه نكديه ..
مع ان الزوجه بتتكلم من باب التعاطف والارتياح والمشاعر هي من الناحيه العاطفيه واللي بتقابل بالعقليه الشديده وده بيرجع لطبيعة الرجل واسلوبه في الحياه وتفكيره .

كمان بنشوف في بعض الاحيان الزوج اللي بيستخف باقتراحات واراء زوجته وبيقلل من شأنها وده بيرجع لعدم ثقته بقدراتها علي المشاركه وايجاد حلول لمشكلات تواجه حياتهم واللي بيرجعها لخبرات سابقه خاصه ببيئته وتربيته .

ده جزء خاص بالزوج ومسؤليته عن الفهم السلبي لشريكة حياته..

وللزوجه نفس المسؤليه في تفهم زوجها وبنشوف ده ..

لما الزوجه تقارن تصرفتها بتصرفات زوجها او بتتوقع من الزوج انه يقوم بافعال ترضيها وبتحتاجها من غير طلب مباشر ..

وفي احيان اخري بنلاقيها بتستفزه بحجة انها تخرجه من صمته وتخليه يندمج معها في الحوار ..

وبنشوف كثير جدا ان مع طول مدة الزواج وانشغال كل طرف في مسؤلياته سبب في اختفاء الحوار بينهم والاكتفاء بخبرة كل طرف عن الاخر .

كل الاختلافات السابقه دي وغيرها من صعوبات في فهم كل واحد لطبيعة وشخصية الاخر وعدم وجود لغة حوار بتكون بركان كامن قابل للانفجار في اي وقت وبيوصل الطرفين لطريق مسدود ..

وعلشان نعمل اعادة تفكير في حياتنا الاسريه ونوصل بيها لبر الامان هنتكلم عن شوية نقط تساعدكم علي تجاوز المشكلات وبناء حياه مستقره من جديد ..

_ لازم الطرفين يفهموا ان الهدف من الحوار هو الوصول لخل ونقطة التقاء مش انتصار طرف او رأي علي الأخر ..

_ متحاولش تقرأ افكار الطرف الاخر الافضل تسأله انت بتفكر في ايه ؟

_ بلاش نربط مشاكل حصلت قبل كده بمشكلة او حوار قائم حاليا ونستدعي مشاعر وافكار سلبيه اكثر .

_ لازم نتختار الوقت المناسب لان ده عامل مهم في توصيل رأيك وفكرتك ونجاح الحوار بينكم .

_اسلوب الهجوم في الحوار بيكون عائق وهادم للطرف الاخر ..

انا اسمع ما تقوم به لا ما تقول

_الحوار بشكل ايجابي وليس انتقاد وتعدد اخطاء بيلطف العلاقه في الحوار وبيكون نتيجته افضل بكثييير ..

مثال لو الزوجه هتطلب من زوجها الاهتمام او انه يخرجها ففي طريقتين ..

١_ انت ما بتخرجنيش ليه ؟

وطبعا الزوج سمع ده نقد

او تغير الاسلوب وتقول ..

انا بحب الخروج معاك ايه رأيك لو نخرج اخر الاسبوع ؟

هنا اكيد طريقة فهمه هاتختلف

اخيراً ..
اخلقوا بينكم نقاط مشتركه زودوا رصيد الود والاحترام ده هايساعدكم انكم تتخطوا اي حواجز او ظروف مكانيه او زمانيه …

دومتم في ود واحترام وتفاهم يصل بكم لمفتاح جديد في الحياه .

تحياتي للجميع

مقالات ذات صلة

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock