شعر وحكايات

تجربتى (كفاح مع الحياة )

أنا أم نورا،، اسمى ايه؟ مش مهم !

لكن يكون لتجربتى اسم،،، دا الأهم،،، هاسميها (كفاح مع الحياة )

* إيه والله،، كفاح مع الحياة،،، لأنى من يوم ما عرفتك يا دنيا وانا فى كفاح مع الحياة،،، عشان اعرف اعيش الحياة

* بداية حياتى طفلة بين عدد من أخوة واخوات لأب مريض بسرطان المثانة وأم مكافحة،، ابتلاها الله أن تفقد اتنين من فلذة كبدها

لما رجعت يوم من شغلها لقت اختى 6سنين محروقة،، وبعدها بفترة مات اخويا بنزلة شعبية

* حطت الأم المكلومة همها فى شغلها والكفاح لتربيتنا أنا واخواتى الباقين

شقيت وكبرتنا وشالت همنا لغاية لما توفت رحمها الله رحمة واسعة

* المهم الحياة معايا مكنتش على طول قاسية،، برضه كان فيها بصيص أمل ونور لما تزوجت من قريبى اللى كان ومازال زوجى وحبيبى

*وربنا تم نعمته رزقنا بولد وبنت،، احمد ونورهان

ولأن كان رزقنا محدود فضلت اكافح مع زوجى عشان نربى أولادنا عشان لما نكبر يكونوا خير سند

*عشت مع زوجى حياة نمطية لكن هادية

وكبروا الاولاد وبقى احمد شاب يملأ العين،، ونورا بقت فتاه أمورة * لكن الحياة رجعت تعاكسنى تانى لما زاد وزني واصبت بمرض السمنة وقلت حركتى وبقيت قعيدة

وكان ضناى حبيبى أحمد يساعدني في تصريف أمور حياتى كلها

*لأنه كان إنسان حنون،، محب للحياة،، خدوم ودايما مبتسم

بتسألني ليه يقول كان،،، ايوه كان،، قبل اصابته بمرض فشل فى النخاع،، وبعد 6 شهور يقابل رب كريم

الكلام ده منذ 5سنوات

* ومن شدة حزنى على فراقه نزل وزنى 15 كيلوا،، ورجع زاد تانى وكنت اخدم نفسى بالعافية

اقترحت اختى عليا اعمل عمليه تكميم معدة 36000 جنيه

ولضيق ذات اليد والعملية مهمةعشان اخدم نفسى،، اخذت قرض من البنك بضمان اختى،،، الحمد لله سددت معظمها

 عملية المعدة ونزول الوزن حسيت بالتعب ووجود اشياء غريبة بجسمى،، ذهبت لمستشفى بهية،، واكتشفت ان عندى سرطان

فى المستشفى ساعدونى واعطونى علاج هرمونى لأن مرضى انتشارى (فى صدرى،الرئة، وتحت الرقبة )

* ولأن ربنا كريم زرع الحنية فى قلب زوجى اللى دعمنى وعوضنى خير،، بوقفته جنبى

يوم ما يكون عندى مستشفى يخلى شغله وردية ليل،، ويحضر معاى المستشفى بالنهار،، وأثناء انتظارى ينام ع الكرسى من شدة التعب

لكنه لا يمل ولا يكل،، ربنا يبارك فيه ويحفظه

**اعتبر ان المرض تجربة مش لذيذة لكن مفيدة خرجت منها بتغير فى حياتى :-

= كنت عصبية جدا طول عمرى أصبحت اتصرف بهدؤ وسكينة وشئ من الصبر

= من رحمة ربنا علي أنى استعوضت ابنى عند الله وبفرح قوى لما أشوف أصحابه ويزرونى فى الأعياد والمناسبات

= أصبحت بنتى الوحيدة هى كل حياتي وبتحضر دراسات عليا،، اتمنى تكون في أعلى المراكز،، ويرزقها ربنا بالزوج الصالح

=بحس بالرضا بما قسم لى،، لأنك لما بترضى بنصيبك،، ربنا بيجعل الحياة مقبولة فى عينك وتشوف مزايا نصف الكوب المليان

= أمنية حياتى هى الستر وافرح ببنتى

يارب تستفيدوا من تجربتى وتعرفوا إن الرضا لمن يرضى

إقرأ المزيد د. علاء رجب..تجربتي مع مرضى السرطان تجربة ممتعة و التكنولوجيا ” سبب أساسي فيما نعيشه الأن

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: