كتبت / أماني خليل
ناسها بيقولوا البلد دي
صاله و أوضه
و الوشوش تميز بعضها
بضحكة ودوده
و الفن شرع البلد دي
و دليل لناسها و أهلها
مهرجان كرنفال
نادي سيما
بيوت قديمه
احنا فعلا حته منها
و أحنا أصلا أصلها
شكل الجناين مالي عيني
و السمسميه ماليه ودني بالغنا
تبقى عيبه و تبقى عاره
لو في يوم تكسر اشاره
و الجمعه تجمع بينا دايما
ف الغدا بوري و دوباره
برازيل في الكورة
باريس في البخت
و أوروبي الجو
لكن بلا بخت
عندنا صيف الغلابة
و الشتا علي أرضها
روشتة بتشيل الكآبة
عملنا كورنيش مستجد
حاجه عظمه و شيك بجد
بس برضو نمره سته
ليها حتة في أي قلب
في حاجات واخدينها مقاوله
اللون الأخضر ف الدولة
إن كان مانجة و لا فراولة
و القطر اللي بيجيلنا علاوله
و اسألوا شم النسيم
و روعته علي أرضها
مين فرش فوق النجيل
و شاف جمالها و سحرها
أستادنا دايما عنده هيبه
أحنا بنصدر لعيبه
لسه فاكره ماتش كوره
و علامة الدراويش محفورة
بصفار المانجه و لون الشط
و عيال في الحاره بترسم خط
و يرصوا الطوبتين العارضة
أنا بلدي بحالها بقت شاهده
لعيبة الشارع جابوا أجوان
و نجوم الكورة و فراودة
مكتوبه بالبونط العريض
يافطه عاديه
ابتسم ..
انت في الإسماعيلية
