يكتبها / علاء حلمى
فارس : ألووو إزيك يا فايز عامل إيه ؟
فايز : تمام الحمد لله ولادك عاملين إيه ؟
فارس : الحمدلله كويسين .. قولى إيه أخبار رحيم معاك لسه بردو مش بيكلمك ؟
فايز : أنا إتصلت عليه كتير بس مفيش رد وعديت عليه النهاردة وانا طالع على الشقه ورنيت الجرس وندهت بصوت عالى وهو مردش ولا حتى بنته ردت .. قولت يمكن يكون نايم بس سمعت صوته بعد كدا .. تفتكر هو مسمعنيش ؟
فارس : معرفش هكلمه وأقولك المهم إنك إتصلت بيه ورنيت الجرس وعملت اللى عليك الباقى بقا سبهولى
فايز : طيب كلمه وشوف الوضع كدا وقولى
… نشبت خلافات بين زوجة رحيم ( علياء ) وزوجة فايز (منال) وكان رحيم يميل الى زوجته كثيرا على حساب الجميع الأمر الذي بسببه قاطع أخيه فايز ولكن فارس كان يفهم بان الفكرة فى الاساس لا تتعدى غيرة نساء ولذلك فكان يلطف الامر بين رحيم وفايز
يتصل فارس بأخيه رحيم
فارس : إزيك يا رحيم عامل إيه .. شوفت فايز بيحبك إزاى إتصل بيك كتير وحاول يعدى على شقتك علشان يشوفك مالك وعلشان يراضيك
يقاطع رحيم فارس ويتحدث بصوت غاضب ومرتفع : مين اللى إتصل ومين اللى عدى عليا .. أخوك مش بيكلمنى يا أستاذ ولا عدى عليا ولا عبرنى وكأني مليش لازمه ولا كأنى الكبير …. أخوك بيدوس عليا وبيخلى مراته تدوس عليا هى كمان
فارس : إزاى !!!!!
رحيم : إسمع فهم أخوك إن دخول البيت يكون بإحترام ولو مراته وهو مش هيحترموا نفسهم ويحترموا مراتى يبقى يبحث عن مكان تانى
فارس : هو إنت شايف إن الموضوع مستاهل كل ده يا رحيم دول ستات وأى حد يدخل بينهم هيخسر كتير
رحيم : إنت قليل الأدب بتقول على مرات اخوك ستات دى أفضل منك الف مرة
ويغلق الهاتف فى وجه فارس …..!!!
كان رحيم مثالا يحتذي به برجاحة العقل والإتزان وحل المشكلات ولكن
تحول رحيم بعد زواجه من (علياء) الراقصه إلى إنسان أخر فكل أهل القريه يعرفون انها راقصه وعانس وقد تزوجها بعد ان فشلت زيجته الثانيه رغماً عنه وبإلحاح من أخته
فلم يكن رحيم يراها كأنثى حتى بعد ان انجب منها ولكن ما جعله يتبدل ويتغير معها هو أنها إكتشفت علاقاته بزوجته الأولى التى كان يعيش معها بعد زواجه من ( علياء الراقصه )وساومته بين ان يصبح عبدا لها أو أن تفضحه بين أهل القريه الامر الذي جعله يتبدل معها
فيما قامت أم علياء الراقصه بالذهاب مع إبنتها لرجل يقوم بعمل أعمال سفليه بقريه مجاورة تطلب منه أن يقوم بكتابة عمل سفلى لرحيم كى يكرة كل من حوله من أهله ولا يري غير الراقصه .
يعاود فارس الإتصال بأخيه فايز حتى يتأكد بأنه قد إتصل بأخيه رحيم أم لا وقد أكد له فايز بأنه إتصل ومر عليه فى شقته أيضا ولكن لم يرد عليه رحيم …..
فهم فارس بأن رحيم يريد ويرتب لأمر ما وهو ان يبعد فايز عن شقته فهو يعرف عقلية علياء الراقصه التى تريد ان تستولى على كل شيي ما يخص زوجها وما لا يخصه فلذلك قرر فارس أن يسافر الى القريه حتى يفسد ترتيب الراقصه الشيطانى
ركب فارس سيارته متجها الى قريته وعندما وصل الى المنزل سأل على رحيم فوجده داخل غرفته يجلس على كرسيه ويتابع التلفاز
فارس : مالك يا رحيم إنت ليه بقيت عصبي كدا اليومين ؟!
رحيم : أنا عمري بيجري وعاوز أربي أولادى زى ما ربتكم كفايا كدا بقا
فارس : ربنا يطول فى عمرك وكويس إنك بتقول كدا يعنى إنت تكبر دماغك بقا وبلاش ندخل نفسنا فى مشاكل أصلا مش موجودة ومع ذلك الحل سهل وبسيط إتعامل مع ( منال ) كأنها أحد الجيران مش عاوزين منها غير سلام ربنا المهم علاقتك باخوك فايز تفضل كما هى … إنت عارف فايز بيعزك وبيحترمك قد إيه
رحيم : نعم إنت مجنون لازم منال تيجي وتبوس دماغ مراتى وتطلب السماح كمان ولو مش عاجبها تاخد جوزها وتخرج بره البيت
فارس : ينظر بتعجب لاخيه ويقول له هو إنت ليه كل كلمه تقول بره البيت يا رحيم هو مش قاعد فى شقتك هو قاعد فى شقته إحنا بنتكلم عن علاقة الاخوه مش على البيت
يثور رحيم : لاء يا حبيبي دا بيتى ولو مش عاجبك أخرج بره إنت كمان
فارس : طيب انا هسيبك تهدى شويه وهجيب فايز علشان نشوف إيه الحل اللى يرضيك إنت عارف إننا بنحبك ومش فارق معانا غير رضاك
يخرج فارس مسرعاً قاصداً أخيه فايز…
…..إلى اللقاء فى الحلقه القادمه
