سالي سليمان
شيف شطورة
ينفع ابني يفطر كب كيك قبل ما يروح المدرسة؟
سؤال بسمعه كتير ، و معظم اللي بيسألوني بيكون عندهم ثقة 90% اني هقول ايوة طبعا كده تحفة ، استمري
بس……….
تعالوا نحسبها كده سوا
الولاد اتعشوا و ناموا الساعة 8 او 9 بالليل بالكتير ، صحيوا الساعة 6 متسربعين و يلا يلا الباص جاي، خدوا الكب كيك دي كلوها بسرعة (يمي يممممي)
ستوووووب، نو نو نو نووووو
زي ما باص المدرسة محتاج بنزين عشان يجيلكم لحد البيت ابنك كمان آخر وجبة اخدها كانت على الاقل من 8 ساعات ، يعني خلاص تانك البنزين فاضي و لازم يفول عشان يفوق قبل ما يروح المدرسة
تانك البنزين بتاع الطفل فوق 7 سنين محتاج 2200 كالوري خلال اليوم ، و عشان نملاه الصبح محتاج ياخد حوالي 35% من ال2200 كالوريز دول في الفطار
بشرط مايكونوش دهون و لا سكريات صناعية ….يعني مش كب كيك
لازم يكون في وقت للفطار
و لازم يكون فطار حلو كده و مفيد فيه على الأقل واحد من أغذية التركيز ( هتكلم عنهم في مقال لاحق)
بيني و بينكم أنا عندي ياكلوا علبة زبادي متقطع فيها تفاحة و معاها معلقة صغيرة عسل نحل و زيها شوفان و زيها عين جمل مش محمص و مطحون ، أحسن بكتير من الكب كيك
طيب و بالنسبة لأولادنا الحلوين اللي ما بيحبوش يفطروا قبل ما ينزلوا للمدرسة ؟
أول حاجة جربوا نصيحة شطورة أنكم تبدلوا وقت استخدام الفرشة و معجون الأسنان لبعد الفطار مش قبله
سمعاكي ياللي بتقولي ياااااع هياكلوا كده من غير ما يغسلوا سنانهم طيب و البكتيريا ????? هقولك أول ما يصحوا يتمضمضوا كويس جدا من 8-12 مرة بمية و بس كده هيشطفوا أسنانهم من اي بكتيريا و في نفس الوقت مفيش معجون له طعم نفاذ يغير طعم الأكل و يسد نفسهم ، ده غير انهم طبعا دعموا أسنانهم قبل النوم مباشرة
جربوا بأه تدوهم موزة واحدة حتى بس يبقى خير و بركة لحد ما يتعودوا يفطروا كويس ، و في المقابل لازم اللانش بوكس يكون مليان مغذيات و مش لازم كميات كبيرة المهم النوعيات
و ارجعوا للمقالات السابقة عشان تعرفوا اكتر محتويات اللانش بوكس المتكامل
و عندي اقتراحين ممكن تعرضوهم على مدارسكم و أتوقع أن المدارس هتتعاون خصوصا في الاقتراح التاني
أولا أن يكون في بريك قصيرة بعد ساعة بالكتير من بداية اليوم الدراسي ماتزيدش عن ربع ساعة و تكون من غير ما يخرجوا من الفصل، الهدف منها ان اللي تانك البنزين بتاعه فاضي يملاه، يعني اللي ما بيفطرش قبل ما ينزل الصبح ده يكون ميعاد فطاره
و الاقتراح التاني ان لو الطلبة احتاجوا ياكلوا اي وقت خلال الحصص طول اليوم الدراسي يكون مسموح لهم بشرط أنهم ياكلوا فاكهة أو خضار بسسسسس يعني اللي هيطلع اي حاجة تانية خلال الحصة ممنووووووووع ، و ده يشجعهم و يعودهم ان السناكس يعني خضار و فاكهة
رئيس قسم هو وهى : داليا طه
