اسم ابنائك امانه
ﻷ بجد كده كتير .. هو انا كل ما أسأل واحدة اليومين اللي احنا عايشينهم عن اسم بنتها تبهرنى بأجابتها ومعنى الاسم .. اللي تقول ليا ده صوت البطريق بالفارسي والتانية ترد ان اسم بنتها ده نعناع الجنينة باللاوندى والهانم الثالثة تقول ليا ضحكت يعني قلبها مال بالهنجالونالتى .. ياريت يبقي عندهم الشجاعه ويقولوا الحقيقة اننا لعبنا لعبة القص واللزق في الحروف وان والله يا حبيبتى احنا مش عارفين معنى الاسم بس احنا ركبنا شوية حروف مالهاش علاقة بعض جمب بعض لحد ما طلع لها شكل كويس وبقت شبه أسماء شخصيات ألف ليله وليله بتاعت شيريهان..و اتكلنا علي الله و سمينا البنت ! خد عندك مثال روفان و خضرهان ونورشهان و بيسان و سويهان .. وبتنجان … و سنتيبال .. هنتريساك .. ريمانهان .. و ريتال وريتاج واسماء ستارة الكعبة و قفل باب الكعبة ومفتاح قفل باب الكعبه وبوز مفتاح قفل باب الكعبة نموذجا ! منتهى الفرحة والسعادة تلاقيها في الام لما تفشل انك تردد الاسم وراء الام من اول مرة وتقعد تعيده وتزيده ليك بفخر وانتصار وفي هذه اللحظة الحاسمة تحس الام انها انتصرت في مهمتما كأم ونجحت في اولي معارك الامومه ! و كل ما واحدة تتفوق على بقية اصحابها في إنها تسمي بنتها إسم مالوش معنى .. كل ما تبقى إنتصرت عليهم بالضربة القاضية ! اما اسماء الاولاد ده موضوع تانى خالص تحس ان اسم الولد ده عدوى جيل بيضرب الجيل كله .. هتلاقي جيل بحاله اسمه عمر و يوسف و خالد ..و الجيل اللي بعده حمزه و مصعب و نصار .. لدرجة انك تحس ان الاسامي دي وكأنها كانت نازله على بطاقة التموين احنا فين من قول النبى صلى الله عليه وسلم : إنكم تدعون يوم القيامة بأسمائكم وأسماء آبائكم , فأحسنوا أسماءكم . يدرك النبى صلى الله عليه وسلم أهمية الإسم فى تكوين الذات , فالإسم الحسن يساعد على تكوين انطباع وصوة حسنه عند الذات , وكان صلى الله عليه وسلم يكره الأسماء القبيحة . ونعلم أن النبى صلى الله عليه وسلم غير أسماء قبيحة الى أخرى جميلة ليه بنكابر علي الاسماء الجميله مفهومة المعنى وفين قدوتنا من اهل العلم والدين وليه تناسينا ان أحسن الأسماء ما كان مأخوذا من أسماء أهل الدين , من الأنبياء والمرسلين وعباد الله الصالحين . اختيار الأسماء لاولادنا ليس عمل ترفيهى او لعبة بنلعبها , ولكنه واجب دينى ومطلب تربوى وله أهداف وعليه آمال … فقد قال الزبير ابن العوام – رضى الله عنه :” إن طلحة بن عبدالله التيمى يسمى بنيه بأسماء الأنبياء وقد علم أن لا نبى بعد محمد صلى الله عليه وسلم , وإنى أسمى بنىّ بأسماء الشهداء لعلهم أن يستشهدوا ” … الطفل لما يتسمى بأسم احد العظماء فضوله هيجعله يقرأ سيرته وهيحاول يعيش حياته ويتحرك بعزته وينطق بحكمته .. فكر لمولودك فى أجمل اسم و فكر فى اسم الدلع كمان مش عيب .و ابتعد عن الاسماء الأجنبية اللي مالهاش لها معنى عندنا في مجتمعنا غير التقليد الاعمى فابنك سيعيش فى مجتمع عربى فلا تجعل اسمه مسار انتقاد دائم أو سخرية . ابتعدى عن الأسماء القديمة التى نختارها فقط لأنها اسم والدك او جدك او ستك فاولادنا في زمن غير زمان جدهم او ستهم .. اختار اسم يعكس هويتك وثقافتك ومجتمعك .. ويكون اسم له معنى يسهل على الطفل لفظة . استشر أصحابك ومن حولك فى اختيار الاسم واستفد من مقترحاتهم هو مش مفاجاءة ولا سر حربي من اسرار شويبس ويكون دعاؤنا أن يكون لكل طفل نصيب من اسمه .
بقلم
مها حامد
