( الأبوه الفعاله )
بقلم :نشوي محمد مظهر
اخصائية الارشاد الاسري والتربوي
( احنا روح واحدة في اجساد متفرقه )
جملة اتولدت واتربيت وكبرت ومازلت بتعامل بيها انا ووالدتي واخواتي ..
طول عمري كنت بسمعها من والدي الغالي .. رحمة الله
في اي موقف كان بيمر بينا.
فرح .. حزن .. مرض .. اي مشاعر كان ده شعار بيتنا .
اب برغم فرق الزمن واساليب التربيه عرف بجد يزرع فينا ازاي نكون قريبين من بعض وازاي نخاف علي بعض ..
اتعلمنا تحمل المسئوليه والاحساس بيها .. زرع فينا الترابط الحقيقي بمعني الكلمة .
يمكن ده مش شئ ننفرد به ولا اول مرة نشوف او نسمع ده بس اللي خلاني فخورة بكده انه كان مختلف ان اب مسافر وبعيد عن اسرته فترات طويله بس قدر يكون اب فعال بجد ..
متقلقوش انا مش جايه احكي قصتي ولا ادوشكم بحياتي ..
انا بس عملت مقارنه صغيره بين الاباء من خمسين سنه مثلا ودلوقتي ..
اكتشفت فيها ان الاب حاليا موجود ومش موجود .. واحيانا وجوده غير مرغوب فيه وده اصعب الحقيقه ..
وكثير بتكلم عن دور الام وازاي تتعامل مع اطفالها وانها مسئوله عنهم بس ده مش دورها لوحدها ولا بيقتصر عليها في وجود الاب ..
لان الاب عامل اساسي ومشارك رئيسي لا يقل اهمية ابدا عن دور الام في تربية وتنشئة اولاده وما ينفعش باي حال من الاحوال يكون بره الدايره دي .
وطبعا بتكلم هنا عن وجود الاب بشكل ايجابي لان الحقيقه احنا مس محتاجين اب يفرغ شحنته في اولاده بالعنف الاسري سواء للام او الاولاد ويبقي وجوده هادم وليس بناء .
مسؤلياتك .. مشاغلك .. مشاريعك .. ارباحك او خسارتك اولادك مش مسئولين عنها فبلاش يدفعوا فاتورة عصبيتك وحملك اللي مش قادر عليه ..
يمكن حد هايقولي انتي مش عايشه في كوكبنا وشايفه الزمن اللي بقينا فيه .
وصوت ثاني هايقولي هو انا بتعب علشان مين ما كله ليهم ..
شماعه فاشله ومش حقيقه
التعب مع اولادك يكون مجهود ظاهر في زرع قيم ومبادئ في زرع ثقه بالنفس .. تبادل في الرأي .. اداب الحوار وادارته .
اولادك هما امتدادك اللي مش هتقدر تلغيه فالفلوس الحقيقه لو مش مستثمره في عقول اطفالك يبقي ملهاش لازمه .
لو مقسم وقتك ومش موجود فيه وقت لاولادك يبقي مش مخطط صح .
لو عمرك عدي واتفاجأت بشباب معاك في البيت متعرفش عن ميولهم ولا طموحاتهم شئ يبقي انت مش مربي انت فقط اب بالجينات الوراثيه …
وعلشان مبقاش سودت الدنيا في وجوه الاباء ..
انت لسه عندك فرصه تراجع نفسك وعلاقتك باولادك وهاساعدك بشوية نصايح خليها خطوه اولي وانت كمل بعدها …
١_ لازم تكون علاقتك بزوجتك علاقه فيها احترام وتبادل اراء ومودة ومهما كان الخلاف بينكم لازم يكون بعيد عن اطفالكم وده يعزز صورتك معاهم لانك القدوه ليهم ..
٢_ لازم من اليوم تقسم وقتك ويكون لاولادك نصيب منه ليهم وبس تلعب معاهم .. تسمع مشاكلهم وتتناقشوا في حلها .. تتابع دروسهم ولازم يحسوا انك بتقدر جهدهم في المذاكرة وتشجعهم علي التميز والطموح والثقه في قدراتهم ..
٣_ تساعدهم يتعرفوا علي المجتمع اللي بيعيشوا فيه بمعني انك تكون المرشد السياحي للعالم الخارجي ليهم .
٤_ الحمايه والامان عناصر مش لازم يفقدوها فيك بالعكس انت ليهم الحامي لوطنه المضحي بنفسه في سبيل امانهم وراحتهم ..
٥_ انك تكون قدوه ايجابيه حقيقيه في حياتهم لان اطفالنا بالذات بيتعاملوا كويس اوي بمقولة . ( انا اسمع افعالك لا اقوالك ) وبالتالي كل فعل بتقوم بيه هتشوفه فيهم عاجلاً ام اجلاً .
٦ _ لو انت بقي اب لبنات فانت اول راجل في حياتها شوف ازاي هاتدي انطباع عن الرجوله وازاي هتملي عنيها لان ده عامل مؤثر جدا في شخصيتها كزوجه في المستقبل . بمعني اخر انت اول حب في حياة وقلب بنوتك ..
واخيراً .. لو انت اب مسافر او شغلك فترات طويله وشايف انك بره الدايره فده مش صح .
احنا بنعيش في عصر كله وسائل اتصال مباشره مسموعه ومرئيه ومتطورة جداً .
تقدر تتكلم مع اولادك وتسمعهم وتوجههم وتقدر تتابعهم وتحسسهم بيك وباهتمامك.
ومهما كانت مشاغلك وضغوط الحياه افتكر دايما ان دول الثمرة اللي هتستمر في حياتك وبعد مماتك فخليك القدوة المؤثرة اللي مهما طال الزمن والبعاد تفضل في نظرهم ونظر نفسك نعم الاب ..
( ابوه بجد .. مش تقليد لحد )
دومتم في طاعة وسعادة وراحة بال ..
