2054208194886930964305459023536687124329124620425345324432245227212526005525430010231005910972575227800005423858567245242500231905922702611555

6/08/2018

مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي





مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي




حوار/ فاطمة عبدالحميد


نشأتي كانت ما بين 3 أماكن "شبرا .. الزيتون..مدينة نصر"
أول شخص تنبأ بموهبتي كان مدرس الموسيقي الكفيف وأنا في أولى إعدادي
مشهد "يا عمري" مع الفنان كريم عبدالعزيز في فيلم أبو علي وش الخير عليا لحد النهاردة
الفنان لازم يكون متنوع في عمله..لكن الكوميديا هي أحب الأعمال لقلبي
أرفض الأدوار الهابطة والغير هادفة مهما كان حجمها..وراضي عن كل أدواري اللي مثلتها..وإشتغلت مع عمالقة الفن والإخراج
بحلم أجسد سيرة الفنان أحمد زكي منذ طفولته إلى يوم وفاته
لكل شخص بيحبني "إنت دعوة أمي المستجابة"..ولكل شخص حقود "حقدك مش هيفيدك..خليك واثق في نفسك وفي ربنا"
المرأة هي نص الدنيا..مفيش راجل من غير ست ..ﻷن الحياة اتخلقت راجل وست


إنسانيته سبقت فنه بمراحل، فكان لابد لفنه أن يلمس قلوبنا جميعاً، أدواره كلها أثبتت قدرته على تجسيد أشكال الفن وألوانه، رغم أنها قد تكون مشهدا واحداً في بعض الأحيان إلا أن ذلك المشهد قد يعادل لدى الجمهور مقدار عمل كامل، يمتلك قلباً يشبه في نقائه براءة الأطفال بدون مبالغة، لديه رساله ساقته موهبته لتأديتها فجد واجتهد ليعمل على إتمام تلك الرسالة على أكمل وجه، إنه الفنان الجميل "مصطفى عباس"، الذي كان لابد لنا من إجراء ذلك الحوار الممتع معه.



أين ولدت ونشأت؟ وما تأثير تلك النشأة على شخصيتك؟


نشأتي كلها كانت مابين 3 أماكن "شبرا..الزيتون..مدينة نصر"، أنا اتولدت في شبرا وعيشت فيها لحد عمر 4 سنين وبعدين اتنقلت للزيتون لحد عمر 17 سنة وأخيراً اتنقلت لمدينة نصر ومقيم فيها حتى الآن...طبعاً ولادتي وتربيتي ونشأتي في شبرا وبعدها الزيتون علمتني إني أكون راجل وابن بلد وابن أصول جداً وجدع وأحب الناس، بإختصار طورت ونمت فيه الصفات الحلوة اللي شايفينها دلوقتي في مصطفى عباس.

من أول شخص تنبأ لك بمسيرتك الفنية وآمن بموهبة حضرتك ودعمك للوصول لحلمك؟


أول شخص كان مدرس الموسيقي بتاعي في أولى إعدادي، كان بيألف لنا الأغاني والمسرحيات اللي بنعملها في المدرسة، كان إسمه أ.وليام ورغم إنه كان كفيف ومش بيشوف وعمره ما شافني إلا إنه دايماً كان بيميز نبرة صوتي جداً وبيقولي صوتك مميز وبيقول إنك هتبقى فنان يا مصطفى. 
وأول شخص ساندني ووقف جنبي في السينما أ.محمود عبدالشافي الله يرحمه، وأول من ساندني في التليفزيون أ.نادر جلال وإشتغلت معاه مسلسل إسمه "أخر المشوار" ومسلسل إسمه "كفر عسكر" وكان بيشجعني جداً وتنبأ لي بمستقبل عظيم، أما المسرح كان أ.محمود أبو جليلة أول من دعمني وساندني فيه هو والحاج حسن عبدالسلام.

ما هو أول دور فني قمت بتجسيده سواء سينما أو مسرح أو تليفزيون؟


أول دور في السينما كان فيلم خالتي فرنسا مع العظيمة الأستاذة عبلة كامل واللي كان مرشحني ليه أ.محمود عبدالشافي، والتليفزيون مسلسل أخر المشوار مع الأستاذ نادر جلال، والمسرح مسرحية الرقص على القمر أ.محمود أبو جليلة.

حضرتك صرحت أن  مشهد "يا عمري" الشهير في فيلم "أبو على" مع الفنان كريم عبدالعزيز رغم إنه صغير جداً إلا إنه أقرب دور لقلبك..هل وجدت رد فعل كافي لدى الجمهور على المشهد جعله أحب مشهد ليك؟


طبعاً مقدرش أنكر إن مشهد "يا عمري" ده أجمل دور لقلبي وإنه حبب فيه الناس وخلاها تعرفني بيه أكتر..لدرجة إن الكوميكس بتنزل لحد النهاردة على المشهد ده رغم إن الفيلم بقاله 13 سنة تقريباً، إلا إن المشهد ده معلم في الفيلم جدا والناس حبته جدا جداً لدرجة إن الناس بتقولي هنتفرج على الفيلم عشان المشهد ده مخصوص ..إلى جانب إني سعيد جداً بكوني فنان كوميدي برسم ضحكة على وشوش الناس وده من أكتر الحاجات اللي بتسعدني بجد خاصةً إني بضحكهم بطريقة محترمة تخلو من أي سفاهة أو انحطاط بالعمل، ده غير إن فعلاً المشهد ده وش الخير عليا لحد النهاردة.

مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي

هل من الممكن أن تقبل دور درامي أو اكشن أم لابد أن يكون دور كوميدي فقط ؟


طبعاً الممثل بشكل عام لازم يكون متنوع في أدواره ويمثل كل اﻷشكال..صحيح إن الكوميديا أصعب أنواع التمثيل، في إنك تمتلك القدرة على إنك تضحك اللي بيشوفك ويقتنع بأدائك ده صعب جداً، لكن برده أنا مثلت فعلا مشاهد درامية وعلمت مع الناس جدآ زي مسلسل "طرف تالت" كنت عامل فيه شخصية "نحلة" ومشاهد المسلسل فيها دراما حلوة أوي والناس حبته جدا وصدقته جدا، وخاصةً في المشهد بتاعي أنا و"ياسمين رئيس" لما عرفت إنها بتحب حد تاني واستنيتها عند القهوة وعملنا مشهد جامد جدا، علم مع الناس جدا ولحد النهاردة بتتكلم عنه.
وكمان في فيلم "فاصل ونعود" مع كريم عبدالعزيز لما خطفت ابنه في الفيلم، ومكنش فيه أي كوميديا خالص، أنا مقتنع إن ربنا مديني نعمة لعب اﻷدوار حلو اوي ولكن بعترف إن الكوميديا أحب المشاهد واﻷدوار فعلاً لقلبي.

ما هو الدور الذي لا تقبل أن تجسده وترفضه تماماً ؟


الأدوار الهابطة واللي تحت المستوى وبتحتوي على مشاهد خليعة، وده بيتعرض عليا كتير فعلاً بس أنا برفضها لأن أنا التمثيل بالنسبالي حاجة بحبها أوي وعايز اعملها حلو، مش عايز أقبل أي دور وخلاص، حتى عشان ولادي واحفادي في المستقبل يتشرفوا بـ "مصطفى عباس" وبمسيرته المهنية..حتى في الوسط كلهم عرفوا إني ف نوع معين مش بقبله وببعد عنه تماماً..والحمد لله أنا بمثل بقالي 19 سنة، من سنة 99 ولحد النهاردة مفيش دور قبلته كان هابط أو مش هادف..وكمان مش هينفع بعد ما اشتغلت مع عمالقة مصر من مخرجين وفنانين إني أقبل حاجة تشوه مسيرتي الجميلة دي.


هل هناك دور خلال مسيرتك المهنية تندم الآن على أدائه ؟


لا خالص ..كل أدواري راضي عنها جدا الحمدلله..أنا مثلت مع عمالقة الفن واﻹخراج..وكل دور جسدته عيشته كأن أنا البطل وخرجت فيه أجمل وأفضل ماعندي..عشان يوصل للناس..والحمدلله كان بيوصل وكنت بفرح جدآ بردود الفعل لكل أدواري.

من أكثر فنانة تريد مشاركتها في دور بطولة مطلقة؟


حلمي مش منحصر في فنانة معينة أشتغل معاها ..حلمي أعمل حاجة أكبر من كده بكتير، تعيش مع الناس ووقتها الدور هو اللي هيحدد الفنانة اللي تقدر تقوم بيه وأنا هبقا مبسوط جدآ بيها سواء مشهورة أو لسه بتبتدي ومش معروفة أوي..مش هيكون فارق معايا مين قدامي قد ما هيكون فارق إن الفنانة اللي معايا حابة الشخصية جدآ ومصدقاها وعايشة كل تفاصيلها، لأن النجاح لازم يكون بينا كلنا مش شخص واحد هو اللي هيقدر ينجح عمل لوحده ..ولكن بشكل عام برده أنا نفسي أشتغل مع كل فنانة من الفنانات الموجودين على الساحة، وبحبهم كلهم لأنهم أساتذة محترمين طبعاً.


مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي

إذا سنحت لك الفرصة لإختيار سيرة ذاتية لفنان أو شخصية مهمة في المجتمع لتجسيدها..من تكون تلك الشخصية؟


أولاً على المستوى الفني أنا بحلم إني أجسد السيرة الذاتية للفنان "أحمد زكي" -الله يرحمه- وأعيش قصة حياته كلها من بداية طفولته ليوم وفاته ..لأن الفنان "أحمد زكي" حقيقي يستحق إننا نعرف الناس أد أي كان مجتهد وأد أي كان بيحلم إنه يوصل فنه للدنيا كلها.
أما على المستوى السياسي مفيش حد معين إنما لو في شخصية سياسية مهمة اتعرضت عليا وعارف إنها تستحق التجسيد وتستاهل الناس تعرف مكانتها وقيمتها الحقيقة هوافق طبعاً سواء كانت شخصية محلية أو عالمية برده.

كيف تستطيع أن تفصل بين حياتك المهنية وحياتك الشخصية؟


بكل بساطة حياتي الشخصية دي بتاعتي أنا لوحدي إنما المهنية دي لكل الناس وأنا فعلاً فاصل بينهم جدآ، أنا بحب أبقى في حالي والناس في حالها على المستوى الشخصي.ً

هل تقبل انتقاد جمهورك؟


طبعاً لازم أقبل انتقاد جمهوري..وبركز جدآ مع النقد البناء..لأن الناس دي بتحبني وعايزة تشوفتي أفضل فا مينفعش أهمش كلامهم ولا رؤيتهم..ف طبعاً كلامهم على عيني وراسي،ً لأن مفيش فنان من غير جمهور، فالجمهور هو كل حاجة للفنان طبعاً وبحترم جمهوري جدآ وبحب إني أرضيه لأن الممثل اللي يهمش كلام جمهوره ومش بياخده في عين الاعتبار ويكمل بدماغه لوحده يبقا ممثل غبي جداً. ً

لمن توجه رسالة بها كلمة شكر ؟


هو مش شخص واحد..شكراً لكل شخص وقف جنب مصطفى عباس بكلمة حلوة ولا موقف حلو ولا حتى إبتسامة. .بقوله شكراً من قلبي..شكراً لكل شخص كان دفعة ليه عشان أطلع لقدام..أنا مش ناسيه ولا ناسي دفعته اﻻيجابية لمصطفى عباس..ومسيري في يوم هكتب ورقة بأسماء كل الناس اللي ساندتني ووقفت جنبي وأقولهم شكراً بجد لأنكم في حياتي.



مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي

من هو أكثر شخص دعمك خلال مشوارك الفني من عائلتك؟


والدي ووالدتي توفوا قبل دخولي المجال الفني أصلا كنت لسه طفل...وأخواتي وقرايبي في البداية رفضوا دخولي المجال، لأن أنا أول فنان في عيلتي وكلهم كانوا مجالات مختلفة وبعيدة عن الفن جدآ..فكانوا خايفين عليه إني أفشل أو ما أنجحش وما أوصلش وأضيع عمري بجري ورا سراب..لحد ماشافوا موهبتي فعلا وءامنوا بيها وبدأوا يدعموني وكان على رأسهم أخويا الصغير "عمرو" يمكن هو أكتر واحد شجعني ووقف جنبي فعلاً.

إذا امتلك أحد أبنائك الموهبة..هل سترفض دخوله المجال الفني؟


ﻻ ﻻ.. طبعاً هشجعه وهدعمه بس أهم حاجة إنه يكون مخلص تعليمه ومعاه شهادته..أنا أصلا كلية تجارة جامعة عين شمس..ومش دارس تمثيل أصلاً..ولكن خلصت دراستي اﻷول وبعدين اتجهت للموهبة حبيت أكتسب الخبرة من أرض العمل أكتر..فا دي أهم حاجة عندي لكن طبعاً هدعمه وهقف في ضهره وهصدقه جدآ وها ءآمن بحلمه طبعا.

بعد دور حضرتك الوحيد السنادي في ربع رومي..هل هناك مشاريع عمل جديدة ؟


اتعرض عليا حاجات كتير في رمضان ده بس أدوار مش مناسبة ليا لأن السنة اللي فاتت كنت عامل دور حلو أوي مع "حورية فرغلي" في مسلسل "الحالة ج"، فمكنش ينفع أقبل أي دور وخلاص يقلل من قيمتي..الإنسان بيتقدم مش بيتأخر..فقبلت بس دور ضيف شرف في الحلقة 14 في مسلسل "ربع رومي" وحبيت أكون مع اصحابي مصطفى خاطر وبيومي فؤاد ومحمد سلام حتى لو بدور بسيط جداً..وفي السينما آخر حاجة عملتها كانت "بث مباشر" مع سامح حسين..وربنا ييسر اﻷحوال في مشروع جديد هنبدأه بعد العيد إن شاء الله بس مش حابب أحرقه دلوقتي. ً
ً
مصطفى عباس: أهلي في البداية رفضوا دخولي مجال الفن..مشهد "يا عمري" وش السعد عليا..وبحلم أجسد سيرة أحمد زكي

ماذا تعني لك المرأة في الحياة؟


أهم حاجة طبعاً ..ربنا سبحانه وتعالى خلق الدنيا راجل وست..فالست مهمة جداًً في حياة أي راجل..هي اﻷم واﻷخت والزوجة والبنت..هي نص الدنيا فعلا ..فالراجل من غير ست مالوش ﻻزمة ..والعكس كمان..لأن الدنيا راجل وست مع بعض..فالست مهمة جداً في حياتي خاصة إني والدتي متوفية -ربنا يرحمها-.



_وجه رسالة لكل من


●شخص حاقد عليك

مش هيفيد حقدك في حاجة ..بالعكس هيقلل منك..خليك واثق في نفسك وفي ربنا

●شخص بيحبك جداً

بشكره جداً ..وبقوله إنت تاج على راسي وإنت دعوة أمي المستجابة لأنها كانت دايماً تدعيلي "ربنا يحبب فيك خلقه" وده بيأكدلي حب ربنا ليا لأن اللي ربنا بيحبه بيحبب فيه خلقه.



التعليقات
0 التعليقات

كافة الحقوق محفوظةلـ سحر الحياة 2016
تصميم : أر كودر I تعديل: حنين