بقلم : داليا طه
التخاطر
ماحدش يعرفها إلا اللى أتعلق بشخص وحبه جدا ، وحس ان هما اﻹتنين روح واحد ، روح واحده وقلب واحد في جسدين مختلفين ، ممكن يكونوا عكس بعض في التفكير والقرارات ، ممكن يكون بنهم مسافات بعيده ، وممكن يكونوا لسه على اتصال او بعاد ولكن في حاجه جوا واحد فيهم ان بيحس بالتانى ، انه ممكن يجيله في احلامه ان ممكن يحصل حاجه للشخص التانى وقلبه يحس بنغزه ، دمعه تنزل وقت اما يحس بيه ، تخاطر ممكن يكون بين اتنين حبوا بعض وعشقوا بعض و نصيبهم ماكنش لبعض ، التخاطر كلمه مايعرفهاش غير اللى حب اوى ، اما يكون في مكان يحس ان حبيبه مش من المكان ده او كان لسه موجود او لسه حيجى ، اما يفاجا حبيبه بهديه او كان بيفكر في اى حاجه بسيطه ورده شيكولاته يلاقيه جايبها من غير اما يقوله ، يبص على السماعه ويحس ان تليفون حيرن ويسمع صوته رغم انه مستحيل يكون فاضي علشان يتصل ويلاقي فعلا التليفون يرن ، اما يكون مش شايفه وفجاءه يحس انه مش عارف ينام ومش مرتاح وقلقان ويسمع بعد كده ان حبيبه الفتره دى كان عنده مشكله ، اما القلب يتوجع والعين تدمع و يجى على باله حبيبه مريض ولاتعبان ولا مهموم و هو متاكد انه في الوقت ده سليم ، وبالصدفه يعرف ان اللى وجع قلبه ان حبيبه قلبه موجوع ، في زمن اللى احنا فيه صعب انك تحس بتخاطر مع حد الا اذا كنت عاشرته 24 ساعه ومتوقع هو ايه في اى وقت وبيعمل ايه ويحس بايه في فرق ، مابين عشت مع فلان وخلاص اتعودت على كل شيء فيه ومابين شخصين بيحبوا بعض وفي مسافات مابينهم ولايمكن يتقابلوا وحاسين ببعض ده حاجه وده حاجه ، رحم الله قلوب حبت وأبتلت في حبها .
رئيس قسم هو وهي : داليا طه
