عاممقالات

انتي ملكه لعام 2017



انتي ملكه لعام 2017
زي ما قرأتي كده انت تقدري تكوني ملكه لعام 2017
الموضوع مش صعب وفي الحقيقه بردو مش بسيط.
ازاي يعنى !!!!
الموضوع بس محتاج اراده منك وكمان تطبيق.
يعني حضرتك ارجعي بالذاكرة كده للسنه اللي فاتت وخليها تمر عليكي زي شريط السينما…
وخليكي صريحه مع نفسك واسأليها ..
هل انتي راضيه عن نفسك وذاتك ؟
طيب زوجك وحياتك الزوجيه هي دي اللي بتتمنيها ؟
اولادك اللي بتربيهم هل راضيه عن معاملتك معاهم .. عن مستواهم .. طباعهم .. تفكيرهم ؟
اجتماعياتك واصدقائك ضفيتي ليهم ايه ؟
محاور كتير لازم تراجعيها مع نفسك
اهمها وقبل كل ده هي علاقتك مع ربنا ايه؟!
يعني عباداتك … معاملاتك
وخلينا ناخد اخر نقطه دي ونبدأ بيها العام الجديد ..
_ انك تصلحي علاقتك مع ربنا بجد ..
كام مرة قلتي هاظبط وقتي علي صلاة الفجر وهتلتزمي في صلاتك وكسلتي .
طيب كام مرة نويتي تحفظي القرآن الكريم او حتي تختميه بتدبر ومحصلش غير في شهر رمضان الكريم وبردوا الوقت عدي من غير ما تحسي …
الوقت بيعدي بسرعه لا ده بيتسرق مننا طالما هو المتحكم فينا .
ايوه سمعاكي ياللي بتسألي متحكم فينا ازاي !!!
اه لما تكوني مش عندك خريطه واضحه لاهدافك محدده باوقات ومنظمه فيها جدولك بالطريقه اللي تناسبك ..
طول ما انتي مش حاسه بقيمة الوقت وانك هتسألي عن عمرك اللي بتعيشيه .
طول ما انتي سايبه حياتك ماشيه حسب الظروف والصدف واللي ياجي في طريقي هايفضل هو متحكم وسايق طول الطريق .
امتي حضرتك تبقي متحكمه لما دلوقتي تجيبي ورقه وقلم وتبدأي تحطي خطوط عريضه للعام الجديد وهنبدئها زي ما قلنا كالتالي :
١_ علاقتك بربنا وازاي تحسنيها وتشتغلي عليها اكثر من الاول وتجاهدي نفسك فيها .
٢_ نفسك اللي هاتدلعيها … 
اااه ما تستغربيش لازم قبل اي اهداف جايه تكوني انتي مستعدة صحياً .. نفسياً .. عقلياً 
لازم تهتمي بتفاصيل نفسك وترضيها وتطوري نفسك دايما علشان تقدر تكمل معاكي للآخر ..
مش معقوله تبقي شايفه انك مهمله من الناس ومحدش مقدرك وانتي نفسك بتعملي ده ..
لان ببساطه لو انتي اهتميتي بيها مش هايبقي عبء عليكي انك تلاقي تقدير من الخارج او لا .
٣_ زوجك وحياتك الاسريه .. ياتري هتفضل مكمله كده لامتي يعني لو مش راضيه عنها ايه الخطوات اللي اخذتيها علشان تغيري الوضع ده ؟ 
لو ما فيش يبقي ما تلوميش حد غيرك مؤقتا
ابدئي راجعي نفسك وافتكري ان ده مستقبل وعمر بيعدي فمش سهل يبقي بالروتين والرتابه دي ..
صلحي من نفسك مع زوجك ولا اقصد هنا الشكل برغم اهميته ولكن الجوهر اهم فعلا.
افهمي نفسك وطباعها وكمان افهمي طباع زوجك واقرأي عن السمات الشخصيه لكل فرد هتفهمي ان كل واحد له طريقة معاملة ومدخل تقدري تتكيفي مع اسلوبه ومعاملته طالما في اطار الاحترام المتبادل والاختلاف في الطباع والاراء كمثال ..
ده هايفرق معاكي كثير ومع اولادكم اللي بيشوفوكم قدوة ليهم ..
٤_ اولادك بقي وطريقة تربيتهم ..
خلينا متفقين من الاول ان التربيه مهمه صعبه جدا وخاصة في الوقت الحالي ..
بس كمان هنتحاسب عليها وهنحصل فاتورتها في حياتنا
فكري كده هتفضلي في الصراعات دي مع اولادك لحد امتي ولامتي هتبقي شد اسلحتك ليهم ومحتاجه قوات حفظ السلام في بيتك علشان الوضع لا يسوء اكثر ..
ولادك انهاردة ضيوف عندك .. بكره هايكبروا وكل واحد هايبقي ليه اهتمامته .. وهاتحني انك تبقي جزء من تفاصيل يومهم .
خليكي نقطه مؤثره في حياتهم ميقدروش يستغنوا عن حكمتها .. مناقشتها .. حنيتها .
٥_ اجتماعياتك واصحابك لازم يبقي فيها تغيير مش مجرد لمة صحاب وغيبه ونميمه سامحوني بس في الغالب ده اللي بيحصل .
خليكي شخص فعال ومؤثر في اللي حواليه .
خليكي مبادرة بينهم واطرحي افكار وتعاونوا فيها .
اتعلمي وعلمي غيرك .
خلكي دايما مصدر امان وراحه ليهم .. البسمه اللي بينهم ..
فرحي اطفال بيتألموا وكوني البهجه ليهم .
استغلي وجود ناس مشجعه في حياتك وساعدوا بعض علي كل ده .
وهاتستغربي لو قلتلك استغلي وجود ناس محبطه بردو واشتغلي علي نفسك اكثر واثبتي لنفسك انك الوحيدة المسئوله عن حياتك وما فيها من نجاحات وانجازات ..
كلمة اخيره …
يمكن الكلام ده مش جديد واكيد سمعتيه وقرأتي زيه قبل كده ..
بس الفرق انهاردة انك تصدقي النيه مع ربنا فعلا وانك هاطبقي كل ده ..
لو قدرتي تحققي كل اللي فات واللي خططتيه لنفسك وبدأتي فعلا بالهمه العاليه والنيه الصادقه في التطبيق ..
اؤكدلك انك هتكوني عند ربنا وقدام نفسك
ملكة لهذا العام
كل عام وانتم بالف خير وصحه وسعادة وطاعة وعبادة وعملاً متقبلاً بإذن الله …
نشوي محمد مظهر 

اخصائية الإرشاد الاسري والتربوي

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: