عام

أياكي وحرف الهاء




أياكي وحرف الهاء 

 بريد القراء أعداد : هويدا صابر
الحياة خطوات وكل خطوة لازم تكون محسوبة ، لأن في خطوات بيتحدد فيها مصير أسرة كاملة مش مصير فرد واحد ، ولو أستعملنا حرف الهاء قبل كل خطوة ها أعمل ها أطلق ها أتجوز…ألخ ، يبقي مافيش خطوة هتتاخد في حياتنا وهنضيع عمرنا وأحنا بنسنع الحرف دا بس من غير أي تغير ومعلقين عليه أمالنا وأحلامنا ، إذا عزمت فتوكل علي الله.. ودي مشكلة السألة و أ:


أنا أنسة عندي 33 سنة أرتبطت برجل متجوز وعنده طفلين في بداية تعارفنا كان مقيم عند أمه يخلص شغله يروح عليها لأنه كان فيه خلافات بينه وبين زوجته ، قالي أنه حبني وهيرتبط بيه لما يطلق كمان 3 شهور ، قولتله أشمعني 3 شهور علي الطلاق قالي برتب أموري وفي حاجات ليه لازم أخدها ، وبعدين هطلق من هنا هخطبك علي طول ، صدقته وكان بيهتم بيه جدا ومعايه في كل مكان و ال 3شهور بقوا 9 شهور وهو يعتذر أصل الأمور متلخبطه لحد ما فوجئت أنه بيروح بيته عند مراته بعد ما يسبني ويقولي أنا هطلع أنام لأني تعبان نتكلم الصبح وأنا رايح الشغل ، وفعلا لما بينزل شغله بيكلمني وهو في الطريق وأبتدي يقل في المقابلات والكلام وعصبية ، وفي مره خلص شغله مشيت وراه بالعربيه عشان أتأكد وفعلا لقيته راح علي بيته مش بيت أمه وفضلت واقفه براقبه ركن عربيته في مكان خاص بيها وطلع البيت ، كلمته علي الموبايل أنت فين قالي أنا لسه في الشغل وعندي أجتماع الساعه 5 ، واجهته بكذبه وقولتله أنت قولت 3 شهور هطلق وهخطبك وفي خلافات لايمكن تتحل والفترة الأخيرة كل واحد فينا في أوضة ، دلوقتي بتروح بيتك ومع مراتك طول الليل ، هو فضل يبرر ويتحجج أنا رجعت أشوف ولادي لكن والله بنام مع الأولاد ، وأنتي حبي وحياتي ماأقدرش أستغني عنك أبدا وأصبري عليه ويقابلني يترجاني أكمل معاه ، وأخوه أكدلي أنه فعلا في خلافات بقالها سنين مع مراته وهو مش مرتاح بس في أولاد كانت بتخلية يصبر ، لكن أنا عايزه أسيبه وانا راضيه لأني شايفه أن دا الصح أيه رأيك أقطع معاه أزاي؟

السائلة الكريمة:
 أنتي مش محتاجة تسألي أعمل أية أنتي لازم تقطعي معاه فورا وتخرجي من حياتة عن قناعة ورضا كامل منك ، ومع الوقت هتتعودي علي عدم وجوده والفترة الأخيرة كان مقصر معاكي في الخروج علي حد كلامك يروح انا تعبان هنام للصبح وابتدي يقلل في كلامه معاكي يعني كنتي زي المريض أللي بيتسحب من جسمه الدوا واحده واحده ، وأيااااكي وحرف الهاء ، أللي عايز يعمل شئ بيعمله لكن هاااا دي الشماعة أللي بيطول بيها المدة معاكي ، هو صبر سنين وما أخدش خطوة الطلاق لأسباب كتير جواه مش هتعرفيها ، أنتي لسة قدامك فرص الحياة لية تضيعي عمرك مع رجل عندة بيتة وأولاده ، ويكون حلمك علي حساب خراب بيت حتي لو أخوة قالك دا ، لكن رجع بيته تاني وأحتمال يكمل باقي عمره فيه ، عيشي حياتك وأهتمي بنفسك وفوقي عمرنا غالي ليه نضيعة علي أوهام ، وللأسف دي مش مشكلتك أنتي بس مشكلة بنات كتير غيرك بتقع في فخ الرجل المتزوج وبتصدقة ولازم تكونوا عارفين أن الرجل المتزوج خط أحمر لايجوز الأقتراب منة..

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock