عام

كلام الناس



كلام الناس
بريد القراء أعداد: هويدا صابر

لو كل واحد فينا فكر في أللي هيقوله الناس عليه وقت فشلة أو قبل أي شئ بيعمله يبقي يقول علي نفسه يارحمن يارحيم ، لأنه هيخسر كتير واحتمال يخسر أغلي شئ نفسه وثقته فيها ، وهيجني فعلا في الأخرالفشل ومعاه الندم ، هي خسارتك ومكسبك في الحياة حد هيدفع تمنهم غيرك وهمومك ومشاكلك حد شايلها غيرك ، شغل عقلك وأستعين بربك تكسب ، ودايما خليك فاكر مقولة باولو كويلو الشهيرة إذا كنت لاتخاف مما سوف يقولة الناس فأنت قد أجتزت الخطوة الاولي للنجاح.
ودي مشكلة من السألة ف ك:

انا مطلقة عندي 37 سنة وانفصلت عن زوجي من 3 سنين بسبب ظلم وقع عليه منه ماكنش في حل غير الطلاق ، ماكنتش بشتغل ابتديت اشتغل عشان المصاريف لأني أخدت البنتين معايه وكان لازم اشتغل عشان اصرف عليهم ، اتقدملي الارمل والمطلق المقتدر ماديا وسنه كبيرعني وكنت برفض ، لأحساسي بأني ماعيشتش حياتي من الاول زي ما كان نفسي رغم المسؤليات اللي حولية والعيال لكن كنت لسة بفكر في نفسي برضه واتقدملي واحد اصغر مني وعنده بنات في سن بناتي وبيحبني وبحبه رغم ان ظروفه صعبة وشغله النهاردة فيه بكرة مافيش والمسؤلية هتكبر لكن انا ارتحت وقبلت وانا بعرف استحمل وكان كويس فترة وبعدها تحكمات عادية تخص المخطوبين كنت بتقبلها جدا واللي كنت ماقدرش ابعد عنه زمان ممكن استغني عنه لمجرد انه طلب كدة بس في الفترة الاخيرة بدأ يتهرب من اسئلتي اللي تخص اي مسؤلية أو واجبات عشان نبني البيت ونجهزه للاستقرار وفعلا مفيش حاجة بتتعمل والردود كانت جاهزة والمبررات موجودة الوضع الاقتصادي العام كله وحش وكمان عندي مسؤلية بناتي اعمل ايه ، واخيرا مرة واحدة وبمنتهي الصراحة انا مش هقدر اكمل المسؤلية كبيرة وماقدرش عليها ومش مرتاح وموضوع الجواز بقي مستحيل.
السؤال دلوقتي الالحاح مني او المحاولة اكتر من مرة أني أرجعه غلط لاني حاطة في اعتباري كوني مطلقة وليه تجربة فاشلة سابقة فا حسيت اني سيرة الفشل دي هتلازمني والناس هتشمت فيا وهتبلصلي بنظرة شماتة ودي حاجة مخوفاني جدا..
———————
السائلة الكريمة: 
كان من الأهم أنك تخافي علي نفسك وبناتك وأنتي بتقدمي علي تجربة تانية وجديدة ومصيرية مليئة بالتضحيات أكتر من خوفك من كلام الناس هيقولوا أية في لحظة فشلك ، الحب والجواز رجولة ومواقف مش تحكمات بالكلام وهروب لحظة الجد ، أنتي فكرتي في نفسك وعايزة تثبتي للكل هتجوز عن حب وهاعيش سعيدة وهيوصل لطليقي جوازي السعيد وأللي عرفت منك أنه أتجوز خلاص ، تضيعي حياتك وعمرك وبناتك عشان كلام الناس والناس هتقول أية ، ومع واحد عنده بناته وماعندوش أي أمكانيات نهائي وبيشتغل يوم ويوم ، وأول ما أرتبط بيكي بحبك وهأعمل المستحيل عشانك ووقت الجد أتحجج بالظروف وقالك أستوب مش هكمل معاكي وانهي كل شئ عشان غرض في نفسه وأحتمال كبير يكون بيضغط عليكي عشان تساعديه ماديا في كل شئ من ورا أهلك فارمي ليكي كارت الظروف فجأة وأحتمال يكون ظهرت واحده جديدة الأحتمالات كتيرة ، ماهما كان السبب لازم تقتنعي أنه اتخلي عنك وشخص غير جدير بالثقة ، ومافيش مجال أنك تفكري فيه وفي الناس وأزاي يرجعلك عشان خوفك من كلامهم ، سامحيني دا تفكير أناني وأعمي أقعدي مع نفسك وراجعي حساباتك كلها وأنسيه وفكري في بناتك وشغلك وخلي عندك ثقه في ربك ونفسك واهتمي بنفسك وحبيها وحبي بناتك هتشوفي الحياة أجمل ورجااااااء سيبك من الناس هتقول أية ، وخطوة الجواز تاني مش عيب لكن لازم تكون بعقل لأنك مش لوحدك بناتك معاكي وأحتمال ربنا يرزقك بطفل جديد مسؤل منك كأم ، وقصتك دي لو كانت كملت بالزواج كان هيكون الفشل فيها بنسبة90% بسبب تفكيرك الخاطئ ، أفكرغلط ولما أفشل أقول الناس هتشمت فيه ، أتوكلي علي الله وأبدأي من جديد مع نفسك وبناتك وقتها كل الخير هيجيلك أن شاءالله.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: