الأشارة حمراء.
بريد القراء أعداد : هويدا صابر
أنك تحاول ترجع الأمور لطبيعتها بينك وبين أنسان غالي عليك مره تانيه دا شئ جميل جدا ، لكن إذا جتلك الفرصة ورجعته تاني ليه تكرر نفس طريقتك معاه ماهي فشلت ، وقتها تضطر ترجع تحاول من جديد ترجعه بعد ما أنهي كل شئ بينكم للمره التانية بشكل رسمي وقفل كل أبواب الرجوع عليك..
مشكلة السائلة أ م:
أنا كنت متجوزه عن حب وعشنا أيام جميله مع بعض وربنا رزقنا بطفلين ، ودلوقتي مطلقة بقالي شهرين بسبب مشاكل بينا لأني كنت بنقضه في بعض الامور اللي مضيقاني ، زي الشغل ، أو قوم نخرج يمكن تخرج من أللي أنت فيه ، أو لاعب ولادك وكنت شكايه رغم أني عارفه أن ظروف شغله ملخبطه ودا عمله أكتئاب شويه ، طلقني طلقه شفوي في وقت عصبيه وساب البيت وأهلي وأهله تدخلوا وفضلنا منفصلين شهر كامل وسألنا شيوخ قالوا الطلاق دا لايقع ، بعد محاولات كتيره معاه رجع البيت بشرط أني متكلمش معاه في حاجه وأبطل شكوي وزن وقال كفايه أللي أنا فيه ، رجعنا لبعض شهرين لكن غصب عني بتكلم علي أمل أنه يتغير وانا بصراحه بحبه شتمني وقالي مفيش فايده فيكي أنا زهقت وطلقني وحاولنا معاه بكل الطرق قرر أن الطلاق يكون رسمي وجاب المأذون وتم الطلاق رسمي ، بعد الطلاق أكلمه ميردش وعملي بلوك علي الفيس وبلوك لأرقامي ومبيردش علي حد من اهلي وانا دلوقتي في بيت أبويه أنا وولادي وعياط ليل نهار ، بصراحه انا عايزه أرجعله كفايه بس وجوده في البيت مع ولاده ومش هتكلم خالص معاه ولا هقوله يعمل أيه ، بس مش عارفه أزاي يرجع.
السائلة الكريمة:
أنتي في أوضاع في البيت غير راضية عنها نهائي فالطبيعي أنك هتتكلمي فيها ، لكن كلام عن كلام يفرق ممكن يكون أسلوبك في النقض غلط وفيه عصبية معاه فبالتالي بيكون غير مقبول ليه ويرد بعصبية بتوصل لأنتي طالق عشان يتقفل الحوار ويخلص منك وبعد عنك شهرين ورجع تاني بشرط تبطلي طريقتك معاه وأنتي قبلتي ، من غيرفايدة رغم أنك عايزاه يرجع بعيوبه المهم حسه في البيت وبنفس عيوبك في طريقة معاملتك معاه ، وبتقولي أنك بتحبيه والحب أساسه أحتواء وعذرتيه في ظروف شغله ، المره أللي فاتت ساب الباب موارب ليكي ورجع والمره دي قفل كل طرق الرجوع عليكي ، مادام عايزة ترجعي ليه تاني ومن جواكي رافضة الطلاق مافيش مانع أنك تزوريه أنتي وأولادك وحد من أهلك فجأه وتتكلمي معاه بهدوء ، أو تستعيني بحد بعيد عن أهلك وأهله يكون عنده صبر ممكن شيخ أو صديق ليكم يكون من أهل الثقة وتحاولوا معاه أكتر من مره وعلي فترات لحد مايهدي أحتمال يوافق ، وعشان أكون صريحة معاكي لازم تكوني عارفه ومتأكده أنه لو رجع بيته هتكوني زيك زي أي كرسي في البيت مافيش كلمة منك ليه غير صباح خير ، مساء الخير ، أتفضل الأكل علي السفرة فقط مافيش كلام يتقال منك ليه غير كده لحد ما ربنا يهديه ويصلح أحواله وبعدها بردوا هتكوني حذره في تعاملك معاه لأن أشارة الخطر الحمراء هتكون مرافق ليكي مدي الحياة ، وأسأل الهم لكي صلاح الحال.
