بريد القراء أعداد: هويدا صابر
الصراحه والمواجهه أحيانا في بعض علاقات حياتنا بتكون راحه ، زي مابيقولوا كده أقطع عرق وسيح دمه ، ماهو فيها أيه لما أصارحك بأللي جوايه علي الأقل هكسب نفسي ووقتي وهعرف قيمتي عندك أيه ، حد فاهم من كلامي دا حاجه ، علي العموم دي مش دعوه عامه للصراحه دي خاصه بالتجربه دي.
دي تجربة الأستاذة ش ب:
أنا أنسة عندي 32 سنة بحب زميلي في العمل جدا وهو بيبادلني نفس الشعور ، كل واحد فينا مقالش لتاني بحبك لكن تصرفاتنا مع بعض وخوفنا علي بعض أكبردليل ، ودايما كل كلامه أنتي اغلي حاجه عندي ربنا ميحرمنيش منك دعواتك وحبك هما أللي بيفتحوا أبواب الرزق ليه ، وكان كل أللي بينا تليفونات وبنتقابل في الشغل بس ، الكلام دا عدي عليه سنه ودخلنا في السنه التانيه ومفيش أي خطوه إيجابيه بياخدها نحيتي ، واحده صحبتي أقترحت عليه أقطعي عرق وسيحي دمه واجهيه وقوليله أنت مش ناوي ترتبط أنا بحبك وأنت عارف ، أترددت كتير لحد ما السنه بقت سنتين وداخلين علي التالته ، أتشجعت وكلمته بصراحه وبسطت الأمور أيه المشكله أننا نبدأ واحده واحده وربنا يكرمنا أن شاء الله ، اتكلمت بطريقه مهذبه ومحترمه ، قالي سبيها علي الله محدش عارف بكره فيه أيه وانتي شايفه الظروف أللي جاي علي قد أللي رايح متقلقيش خير أنتي أي حد يتمناكي ، وخلص الحوار علي كده أتصل بيه بعدها ميردش أبعتله رساله مفيش قولت يمكن محرج عدي 3 شهور ببعتله رساله علي الواتس لقيته كل يوم يغير صوره ليه أتفجأت انه مردش علي رسالتي وغير الصوره بصورته هو وخطيبته أللي اتجوزها بعدها بشهر ، رغم النار أللي جوايه بعتله رساله قولتله مبروك وربنا يتمم لكم علي خير رد قالي ربنا يكرمك دنيا وأخره والله يبارك فيكي وعقبالك. بقيت بضحك وبعيط في نفس الوقت مش عارفه أقول لنفسي أيه ولا أصبرها أزاي ، فقولت أقوي وفوقي ولازم تقفي علي رجلك وميعديش الأسبوع دا غير لما أكون أنسانه تانيه وجديده ويشوفني في كامل قوتي وأناقتي كأن مفيش حاجه حصلت والحمدلله علي كل حال ربنا هيعوضنى
أختى الكريمة
الحمدلله فعلا علي كل حال ، هو خسر أنسانه حبته وكانت هتكون معاه علي الحلوه والمره حبك بان لما بسطتي الأمور ليه لكنه لايستحق ، أنتي ريحتي نفسك وكسبتيها وكان ممكن السنتين يكونوا أربع أو خمس سنين وأحتمال أكتر ، والحمدلله أنك كنتي قويه ومتماسكه رغم البركان أللي جواكي وبمنتهي القوه قولتيله ألف مبروك وفكرتي في نفسك وأهتميتي أنه يشوفك في الصوره دي ودا أللي المفروض تعمله كل بنت لما يخذلها أنسان حبته تكون قويه ومتماسكه جدا قدامه لكن الضعف مش في صالحها وبيسعد أحيانا كتير الطرف التاني للأسف ، بيلاقي غروره في ضعفها ياه دي بتعيط عشاني ومش عارفه تعيش من غيري ، والشاب المستهتر أللي زي دا ولا بتفرق معاه أو تصعب عليه البنت ، يبقي قوتك فيها سعادتك ونجاتك ولا لأ ، وكل بنت مرت بنفس تجربتك أو تجربه شبهها دا لازم يكون موقفها بجد مفيش بديل ، لأن حياتك وعمرك وصحتك أغلي من الدنيا كلها وأوعي تهون عليكي نفسك عشان خاطر أنسان أساء ليكي وباعك عن قناعه ورضا كمان ، وربنا يحفظك ويعينك ويعوضك بكل خير وسعاده وبقلب يحبك بجد مش يلعب بيكي أنتي وكل أللي زيك.
