ازمه أخلاق
بقلم. نادية إسماعيل
للاسف بقا عندنا ازمه فى الأخلاق لا صغير بيحترم كبير ولا كبير بيعطف على صغير ولا ابن بيهيب ابوه ولا بنت بتخاف من امها وده حالنا دلوقتى للاسف انعدم الاحترام ما بنا حتى لو حد حب يقول رأيه فى موضوع يتهاجم و يتشتم بافظع الالفاظ مبقاش عندنا قبول الرأى والرأي الآخر للاسف افتقدنا روح النقاش ما بنا حتى لو مختلفين فى الرأى زمان كان لما بنت او ست تكون راكبه وسيله مواصلات ومفيش مكان كان كل الشباب والرجاله يتسابقوا على مين يقوملها عشان تقعد ومتقفش دلوقتى بيعملوا نفسهم مش شايفين ولا سمعين حاجه بيبصوا من الشباك ويعملوا مش من هنا
فين النخوه والرجوله والجدعنه خلاص ماتت انعدمت فى ميدان عام ايه يا ناس ايه ناس هو حصل ايه فى الدنيا خلاص اتقل خيرها تحرش واغتصاب وتعدى بألفاظ بذيئة ايه مش خايفين من ربنا مش خايف يحصل فى أمك او أختك او مراتك او بنتك كدا هقولك أفعل يا ابن آدم كما شئت فكما تدين تدان
للأسف بقينا فى مجتمع منحدر أخلاقيا المحترمين فيه بقوا عمله نادره حاجه تحزن والله لا وايه كمان الشباب اللى بقت تتشبه بالبنات والبنات اللى بتتشبه بالشباب طيب مش مكسوفين من نفسكوا انتوا متخيلين انكم حلوين ولا حاجه فين الشباب اللى كان يتقال عليهم رجاله والبنات الرقيقه الجميله خلاص انقرضوا ولا الشتايم اللى بقت علنى وكأنها حاجه طبيعيه لا و المصيبه كمان أنها بتطلع من البنات مش الشباب بس لا وكمان الصوت العالى و الضحكه الجرس اللى فى الشارع ولا اللبانه يختاااى على اللبانه والبلونه اللى بتعملها ببوقها ايه يا بنتى محدش قالك ان كدا ميصحش محدش علمك احترام وآداب الشارع محدش علمك الأصول ويعنى ايه عادات وتقاليد هتردى بكل بجاحه وتقوليلى انا حره يا حبيبتى لو انتى فاهمه الحريه كدا تبقى غلطانه والله الحريه عمرها مكانت قله احترام او آداب او أخلاق الحريه يعنى احترام يعنى اعمل الصح مش الغلط الحريه يعنى أقبل رأيك باحترام او ارفضه بأدب و ابتسامه الحريه كلمه بسيطه بس معانيها كبيره اوى الحريه عمرها مكانت جرآه بوقاحة الحريه يعنى اعبر عن رأيي و شخصيتى بس بأسلوب مهذب و جميل حتى لو حد انتقدنى الحريه ان اتقبل الانتقاد بصدر واسع وبابتسامه رقيقه
فين الحياء يا بنات و يا شباب ايه انعدم من عندكم نترحم على الأخلاق و الاحترام يعنى فوقه لسه معاكوا وقت مش عيب اننا نصلح من نفسنا للأحسن نقول الكلمه الحلوه بس البنت تكون أنثى جميله والشاب يكون راجل مهذب والله لو كلنا احترامنا بعض واتكلمنا مع بعض بأسلوب مهذب استقبلنا الرأي والرأي الآخر
هنصبح من أقوى شعوب العالم دى ثقافه بلاد يا شعب
ياريت نبتدى احنا نقدر عشان احنا شعب جبار يقدر يعمل المستحيل فأعتقد ان ده بالنسباله لعب عيال يعمله وهو مغمض وربنا يصلح أحوالنا جميعا 
??
