مقالات وحكايات ماما زوزو
بقلم دكتورة زينب زكى
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه زمان زمان امير واميرة .. من عيلة كبيرة .. قاعدين فى القصر متهنيين .. ولكلام ماما وبابا سامعين .. وكان اسمهم مازن ورزان الحلوين .. يا ترى ايه اللى حصل ؟؟؟؟؟؟؟؟؟؟ تعالو نشوف ……..
فى يوم من الايام خرج مازن ورزان يتفسحوا فى الوديان ويدوروا على وردة حمرا يهدوها لجدتهم اللى بيحبوها وبدأوا يجمعوا الورود من الحديقة الكبيرة اللى حوالين القصر بتاعهم ..
وفجأة وصل بابا من شغله ونادى عليهم فى القصر مش لاقيهم .. وقعد يدور ويدور ويدور ويسأل عليهم ماما وجدو وكمان جدتهم والكل مش عارفين هما راحوا فين !!
وفجأة جدتهم اقترحت يدوروا عليهم فى الحديقة الكبيرة يمكن يكونوا بيجروا ويلعبوا.. وبسرعة خرج بابا محمود يدور عليهم فى الحديقة الكبيرة
وفعلا لقاهم تحت الشجرة الكبيرة بيلفوا الورود اللى جمعوها من الحديقة علشان يقدموها هدية لجدتهم الجميلة .. وقرب منهم بابا .. وبعصبية قالهم .. قلقتونا كلنا عليكم .. ليه تخرجوا من غير اذن ماما ؟ هو فيه أولاد شاطرين تخرج من غير اذن الكبار؟؟؟ مازن ورزان حسوا بغلطهم وسكتوا خالص ما قدروش يتكلموا
وبابا قالهم .. كدا غلط .. وكان ممكن يقابلكم شئ يزعجكم او يخوفكم .. مازن ورزان .. اخدوا بالهم من غلطتهم وقرروا يعتذروا ل بابا محمود بسرعة .. وقالوله
احنا يا بابا اسفين .. ومن غير اذن تانى مش خارجين .. بس كان نفسنا نقدم الورود الحمرا هدية لجدتنا الجميلة علشان هى بتحب الورود الحمرا ..
قالهم مهما كان الهدف نبيل لا يعفيكم من الخطأ بخروجكم من غير اذن .. لازم الكبار يعرفوا انتوا خارجين فين ومع مين لأن غلط خروج الأطفال لوحدهم.
المرة دى خلاص سامحتكم ما دمتم بغلطكم معترفين .. الاولاد الشاطرين هما اللى يسمعوا كلام باباهم ومامتهم وميخرجوش ابدا من غير اذنهم
ووعد مازن ورزان بابا محمود ان خلاص مش هيغلطوا تانى ويخرجوا من غير اذنه هو وماما
وتوتة توتة خلصت الحدوتة
ماما زوزو
إقرأ المزيد
