عام

دا أخونا ياناااس.



بريد القراء أعداد : هويدا صابر.
أحنا في أيام الغلطان فيها شايف نفسه صح ، لا دا كمان بيبرر غلطه ، رغم أن طول النهار برامج دينيه وتوعيه علي الفضائيات بتتكلم في كل حاجه وأيه يصح وأيه لا ، ماهو مش معقوله نكون في الأنفتاح دا كله وفي 2017 ومش فاهمين أيه حدودنا في كل تعاملتنا ، ولا فاهمين …..؟ علي العموم تعالوا مع بعض نشوف المشكله دي.
دي مشكلة……
لو سمحتى عاوزة أعرف رأى الستات أيه دلوقتى في المشكله دي ، أنا أخويا متجوز مع أمى فى نفس الشقة ومراته بنت عمتنا ، بس أخلاقها غير أخلاقنا خالص طالعة لأهل أبوها ، كل ما نروح لأمى نزورها ونقعد معاها لازم نتشتم أنا وأختى وخالتى ، والأسباب حاجات هايفة وملهاش لزمة أصلا ، يعنى ليه وليه نقعد قدام أخونا بقميص نوم مثلا كت ومرة كنت برضع أبنى قدام أخويا برضه قلة أدب وشتيمة قذرة أول مرة نسمعها ، دا أخونا يا نااس يعنى محرم علينا البعيدة مبتفهمش يعنى معقول أخويا حيبص لى بنظرة شهوة هي بتغير مننا أنا وأختى عشان هي رفيعة جداا وأخويا مش بيحب الرفيعين بس أتجوزها عشان بنت عمتنا ويتيمة ساعتها قولنا نعمل خير ، ده الجزاء نتشتم هو بيضربها وبرضه الضرب مش بيجيب نتيجة بتقل فى أدبها أكتر ، قولناله يطلقها ويرميها فى الشارع ، خايفة على بنته تتبهدل عشان معندهاش مكان تربى البنت فيه ، ومرات أبوها قاعده فى بيت أبوها ، أنا أكتر شئ مضايقنى أنها مطلعة البنت زيها البنت مبقتش تحترمنا خالص ولا بتحب وجودنا ولا وجود عيالنا فى بيت أمى وأخويا مينفعش ياخد شقة برا عشان ظروفه وحشة مش عارفة أيه الحل معاها يعنى بجد حاجة أرف أحنا محترمين وهي كل مرة معانا بتكون ……. بسبب حاجات غريبة زى ما قولت لكم. –
السائله الكريمه: 
أنتي عايزه رأي الستات في المشكله أللي طرحتيها علينا ، أنا عن نفسي مش عارفه أقولك أيه ، أنتي بصراحه حرقتي دمي وهقولك ليه ، أولا أنتي وصفتي بنت عمتك أن أخلاقها غيركم وهو يا عزيزتي من الأخلاق أن أخوكي يشوف جزء حساس من جسمك وبتبرري دا أخونا يا نااس ، أنا مش بتكلم علي اللبس كل أنسان حر في لبسه أنا بتكلم في نقطه محدده ، دا أ ب تربيه وأخلاق محدش يشوف أي جزء حساس من جسمك لا أخوكي ولا أبوكي ولا المفروض أبنك أو أبن أختك أو أبن أخوكي ، ثانيا يتيمه فعملنا خير جوزناها لأخونا دا جزائنا هو الجواز أيه صدقه ، أخوكي لو مش عجباه مكانش أتجوزها دا رجل المفروض ومحدش بيفرض عليه حاجه ، ثالثا بتغير مننا أصلها رفيعه وأخونا مش بيحب الرفيعين هو دا بيت بتتجمعوا فيه كأخوات وتبروا أمكم ولا عرض للأجسام مين جسمها أحلي أه أحنا الأحلي ، رابعا بقي وأخيرا أيه طلقها وأرميها في الشارع بس عندها بنت ومالهاش بيت أيه القوه في خراب البيوت دا ، ما هي وأخوكي مع بعض زوجين يتخانقوا يتصالحوا يضربها هي متضرره من عيشتها معاه تطلب الطلاق منه ، لكن الطلاق أنتوا أللي بتشجعوا عليه وطرف في المشاكل كمان ، للأسف دي مشكلة شباب كتير بيضطر يتجوز مع أمه الزوجه بتكون مراقبه من الحما وأخوات الزوج وخالاته وجيرانهم وكل المحيطين بالأسره وبيكون بيت لا فيه خصوصيه ولا حريه ولو شدوا مع بعض علي حاجه بسيطه الموجودين في البيت مش هيسكتوا وهيكبروها ، الغريب بقي أنك بتلوميها علي عصبيتها ورد فعلها ، لا علي فكره هي مش غيرانه منكم ومن جسمكم الأحلي هي بس المشهد أستفزها ومش واخده عليه ، وأي واحده طبيعيه هيكون دا رد فعلها ، المهم يااااااااااريت تبعدوا عنها وتتجنبوها وتسيبوها تعيش حياتها بحريتها قدر الأمكان حددوا يومين في الأسبوع تزورا في والدتكم ، أظن دا كفايه لأن كل واحده عندها بيتها أكيد وفي زوج ليه متطلبات ، أمكم مش لوحدها معاها أبنها وبنت أخوها ، نراعي ربنا في بعض شويه وندي فرصه لغيرنا يكون ليه خصوصيه زي ما لينا خصوصيه ، راجعي نفسك لأنكم غلط وحتي لو هي غلطانه بلاش نستفزها بتفاهات ، نبدأ أحنا ونعمل لنفسنا حدود في اللبس وفي الزيارات ونحترم البيت أللي بقي بيتها المفروض.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: