بقلم داليا طه
في اوقات الواحد بيبقي عايز مع نفسه يظبط اموره اللى ملخبطه يشوف ايه اللى عملوا مظبوط ولا يراجع نفسه دايما ولا يكمل في مشواره ودايما اللى بيعين الانسان في كل شئ ربنا سبحانه وتعالى وتلاقيه مسخرلك ناس يدلوك على الثواب يدلوك على الحاجه الحلوه اللى ممكن تفرح قلبك وحياتك بيسخرلك الصحبه الصالحه اللى يكلمك علشان بس مجرد ياخد رايك في اى خير يفيد حد مش شرط ليه ولا ليك خير لناس لاتعرفهم ولا يعرفوك او تلاقيك قاعد لوحدك مخنوق يقوم حد يقولك ماتيجى نحضر درس نظبط بيه عقيدتنا اهو حنتسال اول مانشوف وجه كريم على صلاه والصوم وعلى صله الرحم وتلاقيك خايف يكون حد متزمت ودنيا مش ناقصه ناس تكلمك على نار وتخوفك محتاج
حد يكلمك عن ربنا ويحببك فيه واد ايه ربنا طيب ورحيم بعباده تبعتلك واحده رساله تقولك ده النهارده بنحفظ قران هو احنا في كتاب تلاقيه اللى يقولك كتاب ايه هو انت طفل وتلاقي عصايا واللى مايحفظش يمدوه على رجليه تروح مقراه تلاقي حب وود وروح تانيه وملكوت تانى كل واحد يقرا جزء وحد يشرحلك وحد يفهمك تلاقيك رايح بيتك اخدت ثواب المجلس تروح البيت زى العيل الصغير تمسك ابنك او بنتك تقوله سمعلى يابنى لحسن اتذنب وابنك يحس في سباق مين فيكوا يحفظ الايه الاول وتقوله انا تعلمت كذا وتحكوا مع بعض حواديت عن الرسل زى ماكنا اهالينا بيحكولنا زمان ويجمعونا بعد مسلسل محمد رسول الله
ووساعات زهقان مش عارف للاكل طعم تلاقي اللى يقولك عاملين دش بارتى وكل واحده عامله طبق علشان توري لتانيه شطارتها واكلها اللى يستاهل ميه بوسه وتلاقيكى عماله تاكلى كانك بقالك سنه ماكلتيش في بيتكوا وكمان تملى الطبق بتاعك ماهو مش حيرجع فاضي باكل اصحابك علشان يجربوا زيك وتلاقي واحده تقولك دى فلانه عامله عمليه وفلانه نقلت في شقه جديده وفلانه ابنها نجح وفلانه حصل كذا وكذا وتلاقي ظرف ابيض مع واحده يجمعوا فيه كل مره لحد لغايه اما خلصوا كل الظروف والواجبات مابتخلصش علشان الصحبه بتكبر وبتكبر معاها مناسباتهم في الفرح مجمعين في الحزن مجمعين حتى الولاده مجمعين يابخت مين ليه
الصحبه الصالحه اللى هو وهما يتحشروا مع بعض في الجنه
تحياتى لكل من لقي صحبه صالحه تعينه على الحياه
