أدم وحواءعام

كلمتين فى حدوتة ع الماشى مع زوزو

بقلم دكتورة زينب زكى
اذا اعدت بناء الانسان اعدت بناء العالم
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه زمان زمان ولد شقى لكن ذكى واسمه سمير وكمان كان فيه بابا زكى الذكى .. ايه اللى حصل ؟؟؟؟ تعالوا نشوف ………
فى يوم من الايام بابا زكى كان قاعد فى امان ماسك جرناله وبيشرب القهوة من فنجانه وفى وسط هدوء وسلامه قعد سمير قدامه يتكلم ويحكى فى حاجات كتير وبابا عاوز يركز فى اللى قدامه ومش مستعد يسمع ولا يتكلم معاه ومش عارف يقوله ازاى انه مشغول ومش فاضى 
وبسرعة بابا فكر وقرر يقوله على حاجة يعملها تاخد منه وقت شوية يكون فى الوقت دا خلص قراية لجرناله 
بابا قطع ورقة من الجرنال وكان فيها خريطة العالم جاب مقص وقطعها لقطع صغيرة واعطاها ل سمير وقاله تقدر ترتب خريطة العالم وترجعها زى ما كانت بترتيبها السليم؟
وافق سمير على طلب بابا واخد قصاصات الورق وبعد دقائق معدودة رتبها ولزقها ورجعها زى الاول بالظبط
بابا استغرب وقاله للدرجة دى انت شاطر فى الجغرافيا وقدرت ترتب العالم بالسرعة دى
رد عليه سمير وقاله ببراءة كان على ظهر الورقة صورة انسان لما اعدت ترتيبه قدرت اعيد ترتيب الخريطة
وهنا بابا فهم الحكمة الرائعة من ابنه الجميل سمير 
ان اعادة بناء العالم يرجع فى المقام الاول لاعادة ترتيب الانسان 
وتوتة توتة خلصت الحدوتة ..حلوة ولا ..
تحياتى للجميع 
ماما زوزو

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock