أدم وحواءعام

اشتري ابنك ، وبيع كلام الناس

اشتري ابنك ، وبيع كلام الناس

كتبت شاهيناز عبداللطيف

الكلام ده باقوله لنفسي قبل مااقوله لأي حد ،او بمعني تاني بافكر بصوت عالي، بعد موقفين حصلوا ادامي الفترة اللي فاتت ، وكان لازم اقف عندهم ..هاقول الموقفين وبعدين ااقول ايه اللي استخلصتوا وفطريقي لتنفيذه.
الموقف الاول 
وحده معرفه طبيبة وزوجها طبيب وتكاد تكون العيلة كلها دكاترة والفاشل فيهم دخل صيدله،او هما بيعتبروه كده فشل وماسلكش نفس الدرب ،،ابن الدكتوره دي اللي فأولي اعدادي جاب فماده ما 18 من 20،اتقلبت الدنيا والليل ماطلعلوش نهار بسبب الدرجتين دوول استمرت في شحن الولد وتقطيم وتهزيق لحد مادخل نام و صحي الصبح عنده شبه انفجار فالمخ،، ضغطه علي ولا ماعرفش ايه من الزعل والقهرة ونقلوه عالمستشفي فالانعاش،،عارفين يعني ايه طفل يجيله ضغط وهو فالسن ده والدكاترة قالوا لو عاش هايعيش بعاهة بسيطة فالسمع يا فالنطق.يعني الليل ماطلعلوش نهار اهو بجد ،.واكيد ماحصلوش كده من الباب للطاق ..ده ضغط عصبي ونفسي بقاله فتره وشغال عالطفل،، اه طبعا طفل،وهي طبعا ماجبتش سيرة او قليل من الناس اللي عرف السبب الحقيقي للي حصل للولد…دلوقتي لو خيروها يسقط خااالص ويرجع يسمع ولا يتكلم كويس وانشالله عنه مادخل كليات خالص ..اكيد مش هاتتردد..لكن سبق السيف العزل واللي حصل حصل ،الله يعينها ،درس قاسي.احنا بنعمل ساعات اكتر من كده مع الاصغر من ده للاسف،عشان نمرة او نص،فاعتبروا_يااولي_الألباب.صدق الله العظيم.
الموقف التاني ..
كنا شلة كلنا فالكلية اللي هي كلية قمة زي مابيطلق عليها ،سبعه اوتمانيه واحد مننا والده ووالدته اجبروه عالكلية علشان مجموعه وعلشان يبقي الباشمهندس راح الباشمهندس جه ، سقط التيرم الاول فكل المواد ، وقال لأبوه: مش عاوز اكمل فيها ،ابوه ابدا ، ازاي بعد مادخلت تطلع منها ؟ مانا ماكنتش راغب فيها اصلا،، سقط التيرم التاني بالرغم من اخدانه للدروس بالشى الفلاني ،.وبالعافيه دكتور عندنا فالكلية اقنع والده انه ينقله كلية تاني بمجموع ثانوي لأنه لو استمر هايسقط وهايجبر علي كلية مش عاوزها برده ،التحق بكلية كانت رغبته من البدايه متحديا والده ووالدته، وحزنهم عليه واحساسهم بأنه الفاشل الوحيد وسط صحابه،زميلنا ده شفته من كام يوم فالتليفزيون وبيتكلم كملحق دبلوماسي ورئيس فلجنه خاصة بتحل مشاكلنا المتعلقه مع دول افريقيه .وصلت الرسالة،.اكيد مش امه وابوه بس اللي حاسين بالفخر دلوقتي ده تلاقي عيلته كلها والشارع اللي ساكن فيه بيتمنوا يسلموا عليه بس،اذا كان انا حسيت بالفخر وندهت علي ولادي وجوزي وقلتلهم ده كان زميلي وفشل ،،قصدي ،،نجح ??، وحقق اللي عاوزه…افلا_تعقلون.
خلاصتي بأه واللي باكتب الكلام ده كله عشانه
لازم وضروري نخرج من دايره كله كليات قمه دي ،فكرة عقيمه مريضه ممرضه، يعني تجيب المرض بصراحة.
مش هاستفيد حاجه لما ابني يدخل كليه قمة علشان يرضيني مقابل اني الغي شخصيته ولو نجي من اعاقه جسديه مش هاينجي من اعاقة نفسية بسبب ضغطي عليه دي أنانية.
مش هاستفيد حاجه ان ابني يدخل كلية قمة ويطلع احادي التفكير ويعجز عن حل اتفه المشاكل اللي بتواجهه..لان طبعا انا اللي بادخل بكل تقلي فكل صغيرة وكبيرة فحياته فمستناش رجا منه انه يفكر فكل الاتجاهات دي سطحية.
مش هاستفيد حاجه لما يدخل كلية قمة وهو فاشل اجتماعيا وعاجز عن التواصل مع المجتمع اللي حواليه ..لاني زرعت جواه انه هو الافضل ..ده انت فكليه كذا وغيرك فكليه دون المستوي ده غرور.
مش هاستفيد حاجه لما يدخل كليه قمه وهو فاقد القدرة علي احترام اقرب الناس له ومش عارف يميز بين مين يحترمه وليه ومين يتجنبه خوفا من غضب الله لو تعامل معه ده غشم.
مش هاستفيد حاجه لما يترص فطابور بالآلاف زيه زي غيره علشان يبقي دكتور فلان بالاسم ولا مهندس علان وخلاص ..فحين انه كان متميز جدا فحاجه قتلتها بإيدي لان المجتمع بينظر نظرة مش ولابد للميزه دي او الموهبه دي ده عجز.
اسفه يعني،مش هاينفعني بشئ المجتمع اللي يخليني ادمر نفسية ابني او بنتي او اقف بكل قويتي فطريق مستقبل هو شايف نفسه فيه وانا مش شايفاه غير بالبالطو والسماعه او بالخوزه فالموقع ..وفالاخر يبقي منظر او صورة بس بدون مضمون او روح حقيقية.

مقالات ذات صلة

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock