عام

كنتي فين يا لأه



بريد القراء أعداد: هويدا صابر سرور.

بعض الزيجات بتبدأ بالتنازل أللي مالوش أي مبرر من البنت غير لأنها بتحبه ومش شايفه غيره أو عايزه تتجوز زي قرايبها وصاحباتها أو تنازل من البنت وأهلها عايزين نفرح ببنتنا ، فقلبنا موازين الجواز بدل ما الرجل بقي هو المسؤل الأول والأخير عن بيته للأسف بقت الزوجه هي المسؤل الأول والأخير عن مصاريف كل شئ في البيت معتمده في دا علي شغلها أوعلي أبوها أو علي ورث وفي بيوت مخبيه مهازل ، بعض الزوجات ألللي دي حياتها بقت مصاحبه الندم ياريتني كنت فكرت شويه ياريتني كنت أخدت موقف قبل فوات الاوان وقولت لأه للجوازه دي ، لكن أللي حصل حصل وخلاص وأحنا في بريد القراء بننشر مشاكل أصحابها محتاجين حل ودعم نفسي أو تجارب شخصيه لبعض الأشخاص يمكن تفيدنا ، ماهو أحنا يا بنستفيد من تجاربنا يا من تجارب غيرنا ، دي تجربه شخصيه لسيده مطلقه وحابه أنها تحكيها لكل بنت خصوصا بعد ما قرأت تجربه أتنشرت في بريد القراء بأسم من بدري ..

أنا ….. عندي 31 سنه مطلقه من سنه أنا متابعه لبريد القراء وكنت قريت تجربة س أ أللي كانت بعنوان من بدري ، أنا مريت بنفس أللي مرت بيه في فترة الخطوبه كان يستخسر يجيب عربيته وأنا أللي أتصل بيه وهكذا… ، وللأسف كنت أنا وأبويه وأمي عايزين نتمم الجوازه بأي طريقه عشان أنا بنتهم الكبيره وعايزين يفرحوا بيه وأتخطبت مرتين قبل كده ومحصلش نصيب ، هو كان أكبر مني ب 3 سنين وكنا بنحب بعض وكان بيسمعني أحلي وأرق الكلام ويحسسني أني أجمل مافي الكون وعمره ما بص لأي واحده وأنا معاه وأصحابه فين لما يشوفهم أغلب وقته معايه أنا وأمي في أي مشوار أو مع بابا في مشاويره لو فاضي المهم مش بعربيته متداخل معانا ، قولنا عليه هو حريص بس جدع بكره هيتغير وهيكون مسؤل عن بيته وأولاده ، أتجوزنا بعد ما بابا جاب الشقه وأتوضبت وكل شويه أجيب منين أللي معايه علي القد وأنا والله هخليكي أسعد أنسانه في الدنيا بس ربنا يديني ، أدي بابا عشر ألاف جنيه للفرش والجهاز وقاله هو دا كل أللي معايه دلوقتي ياعمي والله العظيم لو معايه أكتر مش هبخل عليها بابا كمل بتشجيع من ماما وأصرار مني ماهو يا بابا يكمل يا الجوازه تتأجل لحد ميحوش ، الجوازه تمت وعملنا أحنا الفرح عشان نفرح ما نكونش أقل من حد عزم كل قرايبه وأصحابه مفكرش يلم العدد ويقول أنا مش دافع ، وأتقفل علينا بابا واحد ، في بداية الجواز أول 3 شهور كنت بصرف من الفلوس أللي معايه وفلوس المباركه علي جوازي وبابا كان مديني مبلغ وكنت حاطه الفلوس في درج في الدولاب كان بيسحب منه ماكونتش بركز معاه وأقول وماله دا بيموت فيه ، لحد ما جيت أقوله عايزه مصاريف لللبيت يديني 500 جنيه ويقولي الباقي يدوب مواصلاتي والله العظيم كل حاجه كان يحلف ، أقوله أتصرف أزاي أحنا محتاجين يرد أنا لو معايه مش هستخسر فيكي أنتي تستاهلي نجمه من السما كلام كلام مش باخد منه غير كلام ، أتخانقت معاه في مره وقولتله أنا حامل وفي طفل جاي أحنا هنفضل كده وزعلت ورحت بيت أهلي بابا رجعني لبيتي وقالي ميصحش الناس تقول أيه وبقي بابا بيبعتلي مصروف كل شهر وربنا رزقني بمولوده وبابا أللي دفع مصارف متابعة الحمل والأدويه وحساب المستشفي ولبس البيبي وكل أحتياجاته هو فين هو أو أبوه أو أمه مفيش حتي 50 جنيه من أبوه للبنت المولوده محصلش رغم أنه مبسوط وعنده عمارات وأراضي ، جوزي بيرمي ال500 جنيه بس ويسمعني أحلي كلام ، قعدت وأتكلمت معاه وقولتله بابا وراه مسؤليات أخواتي كده كتير عليه لازم أحنا نحس ، قالي أنزلي أشتغلي وهاتي فلوس ، قولتله بيع عربيتك أللي كل فلوسك رايحه عليها ومحدش بيركبها غيرك وبتشتري أغلي الماركات كل دا ومش معاك فلوس ، يقولي العربيه دي وجهتنا واللبس دا بشتريه في وقت التخفيضات أروح شغلي أزاي يعني مبهدل ، أنا بصراحه فاض بيه وأبتديت أحس بالقرف كل ما احتاج حاجه أكلم ماما تقول لبابا وهو أبتدي يزن الشقه عشان بأسمك بتعايريني أنتي وأبوكي لو واثقين فيه كنتوا كتبتوا الشقه بأسمي وهو عشان أبوكي بيصرف في البيت وأيه المشكله المليان يكب علي الفاضي ما كله ليكي ، وكل يومين عايز عقد الشقه هو فين ، وفي مره نزل بسرعه ونسي يلم ورقه ويحطه في خزنه صغيره في الدولاب أو بياخده وهو نازل ، فضولي خلاني بصيت في الورق لقيت عقد شقه بأسمه في كومباوند معروف وجوابات من البنك برصيده بتجيله علي عنوان شغله دا غير ورق تاني ملحقتش أشوفه ، سيبتهم زي ما هما ودخلت عملت نفسي لسه في الأوضه لأني سمعت صوت باب الأسانسير بيتفتح قولت أكيد رجع تاني ، وفعلا كان هو دخل وأخد الورق وجالي الأوضه يشوفني بعمل أيه ، وقالي أنا رجعت نسيت ورق شغلي ونازل دلوقتي ، فيلم عايشه فيه حسبي الله ونعم الوكيل فيه ، هو غير شغله بيعمل شغل خاص بيه بس دايما يقولي خسرت فيه وأخر مره دخلت فيها في حاجه أخد كل الدهب أللي معايه وسألني إذاكان ليه دهب عند ماما ولا لأ دا غير 25 ألف جنيه كان بابا حاططهم ليه في البنك قولت لنفسي بعد أللي شوفته فعلا بتخسر ، عملت نفسي ولا شوفت حاجه وبعدها بأسبوع أتكلمت معاه في مصاريف البيت وأحتياجتنا ، قال نفس كلامه أجيب منين وكل ما أدخل شغل لحسابي بخسر فيه ويحلف بالله العظيم وبعدين أنا مش قولتلك ميت مره عايز عقد الشقه ، أرفت منه ولميت هدومي ورجعت بيت أهلي قولتلهم علي كل حاجه كانوا مصرين أرجع مخربش بيتي خصوصا أن عندي بنت وأنا أصريت علي الطلاق وأخد شقتي وكل حاجاتي لأن الدور جاي عليهم ودا أللي قولته لأبويه وأمي هيبيع الشقه والبديل أنتوا اللي هتجبوه لأن انا وبنتي هنكون في الشارع ، طبعا ظهرعلي حقيقته عايزه تتطلقي تتنازلي عن كل حقوقك وليكي مني ال500 جنيه كل شهر زي ماهما لبنتك ، تم الطلاق وعملت شغل من البيت خاص بيه أتوفقت فيه وبكسب منه كويس وحاسه أني مستريحه جدا وفي حمل وضغط نفسي كانوا عليه أتخلصت منهم ، هو حاول أكتر من مره يرجعني وبعت مامته وأبوه يشوفوا البنت ويتكلموا في رجوعنا ، لكن أحنا بيعنا الشقه والعفش وكل حاجه ، وقولت لنفسي أللي يجي بالساهل يروح بالساهل عايز ترجعلي أدفع وكون ليه رجل وسند قبل أي حاجه تانيه الجواز مش كلام حب وخلاص الجواز مسؤليه ، ما تفرحيش بالكلام الحلو والعريس أللي دخل البيت وانك هتتجوزي وتعملي فرح وتلبسي الفستان الأبيض وكل دا فواتيره علي حسابك أوعلي حساب أهلك ، أتجوزي رجل وقولي لأ من بدري لما تشوفي أي غلط أو أستغلال.

مقالات ذات صلة

شاهد أيضاً
إغلاق
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock