أدم وحواءعام

اخلاقيات









اخلاقيات

كتبت/ شاهيناز عبد اللطيف


بأت بايخه وسخيفة اوي علي فكرة… لما تكون واحدة كسرت التلاتين او قربت منها وكل ماتشوفيها ..تسأليها ..هاااااا هانفرح بيكي امتي…؟؟ …انتي لو قلبك عليها اوي مش هاتسألي سؤال زي ده ..وتأكدي ان اول ماهيحصل هاتكوني اول العارفين علشان تخلص من زنك عالاقل..ده غير ان فكره الجواز عامه مابقتش غايه المني لكتير من البنات..نجاحها في
مجال دراستها او عملها بأه هو شغلها الشاغل..ماتشغليش دماغك انتي بيها…
بقت بايخه وبلدي اوي علي فكرة… واحده متجوزه بقالها فتره كبيرة ..وكل ماتشوفي وشها تسأليها …..هااا مافيش حاجه جايه فالسكه ..؟؟….ماهو لو في حاجه جايه ..اكيد مش هتداري ..ولو اتدارت النهارده مش هتستخبي بكره …
بأت بايخة ومملة اوي علي فكرة…. واحده ربنا رزقها بزربة عيال ….كل ماتشوفي وشها تقوليلها ..احساسك ايه وانتي عندك العدد ده كله …؟؟….ماسمعتيش عن وسائل تنظيم الاسرة …لا والله يا ماما كريمة مختار..لسة ماجبناش تلافازيوون….!!…ماهو اما انها جيباهم بارادتها وفرحانة وده رزق من ربنا ..اما انها خلفتهم بغير ارادتها وبرده رزق من ربنا واكيد حامدة وشاكرة……هاتشحتهم مثلا ولا تدخل بيهم جمعية …..ادعي بس انتي الله يعينها .وتربيهم بما يرضي الله ورسوله…..نبقي شاكرين مهللين..
بأت بايخه وخنيقة اوي علي فكرة… واحده معاها طفل او طفلة عنده اعاقه معينه سواء ذهنيه اوجسديه..او من ذوي احتياجات خاصة ..واللي كله دلوقتي بأة يقول انهم اصحاب مهارات خاصة .. ..وأول ماتشوفيها ..تقوليلها مابتكشفوش عليها ليه ولا ماودتوهاش للمكان الفلاني ليه ..ماهو اكيد مش قاعدين مستنين طلتك البهية علشان تفيضي عليهم بعلمك ومعرفتك باللي هما مش عارفينه ولفوا وداخوا عليه .وممكن يكونوا ماناموش بسببه شهور….وبالمناسبة بأه.الاعاقة في النفس المريضه مش في العقل ولا الجسم..ياست الناصحين
بأت بايخة ومحرجة اوي علي فكرة… واحدة مطلقه…تتهربي من صداقتها او تنهي علاقتك بيها..علشان خايفه عالمحروس ..اطمني التجربه اللي مرت بيها كرهتها فالصنف كله..وهاتفكر بدل المرة الف قبل ماتكررها تاني…وغالبا هايكون المحروس ده هو اللي بيلأح جتته عليها ….وقفتك وفرد عضلاتك تبقي معاه مش معاها هي…يا حريصه بالأوي..
بأت بايخه ومزرية اوي علي فكرة.. ودي كتيرة اوي..واحدة كل خلفتها بنات..وانتي تعملي ان قلبك عليها..وتقوليلها..هاااا..مش ناويه تخاويهم….؟؟…لا ياستي.. بناتها عندها بالدنيا ومافيها…في قاضي كان بيقول ..اتعجب من اللهفه علي انجاب الذكور ..ومع ذلك لم تأتيني قضية اعاقه والدين ابدا ..ضد انثي..طيله عملي لاكثر من 40 سنه…اكيد ربنا اعلم وادري منك..باللي ينفعها ..الولد مبقاش ..امله فالزمن ده.بالعكس ..احيانا بيكون حمل وعبء..لو نفينا فكره انه يعوق والديه اساسا…
بأت بايخة وقليلة ذوق اوي علي فكرة… واحده يكون عندها بنت مالهاش حظ من الجمال ..اللي انتي طبعا نلتي منه النصيب الاكبر ….وتقعدي تتحسري عليها وعلي مين هيبصلها ولا هيتجوزها ..ياست كيم كاردشن ..
دي بأه مش بايخة ولا قلة ذوق ولا سخافة ..دي انعدام احساس انك تشغلي بالك بالارملة اللي مكفية وشقيانة علي تربية ولادها وتسأليها بتصرفوا ازاي ومنين 
اكيد اللي بيرزق النملة فقلب الحجر مش هايغلب فيها وفضناها ..اهدي انتي بس وسيبيها فحالها
خلي بالك…طول عينيكي ماهي مش شايفه غير نواقص اللي حواليكي ..ده اكبر دليل علي ان نواقصك وعيوبك اكتر ..وكل اللي بتعمليه انك بتغطي عليها وتخلقي لنفسك مساحه ترتاح وتحس انها مش لوحدها اللي معيوبه…..بالرغم ان اللي هما في مش عيب ولا نقيصه..ده قضاء وقدر …..
من حسن اسلام المرء تركه مالا يعنيه .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: