سر الطبخةعام

الفراولة و ازاي تستغلي موسم الفاكهة بافضل الطرق



كتبت / مروة كمال
الحقوا موسم الفراوله قبل ماتخلص
هنخزن شويه في الفريزر للعصير ( ودا اللي في الكيس )
وهنعمل صوص فراوله للحلويات ( اللي لونها زاهي في الطبق )
ومربي فراوله ( اللي في الطبق اللي ورا)
وشربات فراوله ( اللي موجود في الازازه واللي في الكوبايه بعد ما خففته )
الطريقة :
– أولا هنخزن شويه في الفريزر للعصير :
– هتغسلي الفراوله كويس جدا وتشيلي الجزء الأخضر اللي فيها وتحطيها في كيس ووزعي عليها وهي في الكيس معلقه او معلقتين سكر واقفلي الكيس وعلي الفريزر


– ثانيا شربات فراوله مركز:
– هنحفظه في زجاجات ويفضل في التلاجه بالشهور زي الفل وفي اي وقت او اي ضيف يجي فجأه حطي تلت الكوبايه او نص الكوبايه من الشربات علي حسب ما تحبي تقله ايه وخففي بميه ساقعه 
طريقته بقي كل كيلو فراوله هنحتاج ليه ٤ كوبايات سكر
– الفراوله هنغسلها ونشيل الجزء الاخضر ونضربها بالخلاط او بالهاند بليندر من غير ميه خااااالص عشان الميه تبوظها ونصفيها بمصفي كويس
– في حله واسعه علي النار هنحط السكر علي نار هاديه شويه لحد السكر ما يبدأ يدوب بس مش عاوزين لونه يتغير ويغمق يدوب يسيح 
– نصب عليه بيوريه الفراوله اللي صفيناه الاول هنلاقي السكر مسك في بعضه لكن بعد شويه هيفك تاني هنسيبه علي النار يقصر شويه ونشيل الريم اللي هيظهر كل شويه وممكن تضيفي معلقتين عسل جلوكوز عليهم عشان نضمن ان الشربات ما يسكرش ونسيبه لحد ما يبقي زي سمك الشربات التقيل
– نشيله من علي النار ولما يبرد خالص نصبه في زجاجات نضيفه وناشفه مفيهاش ميه خالص ونحفطها بالتلاجه

– ثالثا صوص فراوله للتشيز كيك والحلويات :
– هنجيب حله نحط فيها كيلو فراوله مغسول ونشيل منه الجزء الاخضر ونقطعه قطع ونضيف عليه كوبايه سكر او كوبايه الا ربع زي ما تحبي وعليهم نص كوبايه ميه 
– نحطهم علي النار الهاديه لما يبدأ يغلي هنضيف عصير ليمونه ونسيبها لحد ما الفراوله تطري خالص ونشيل الريم اللي هيظهر ونضربهم بالخلاط او الهاند بليندر
– نرجعهم تاني علي النار وندوب معلقتين كبار نشا متدوبين في ميه بارده ونصبها عليهم ونقلب ونشيلها من النار ولما يبرد نحفظها بالتلاجه

رابعا مربي الفراوله :-
– كل كيلو فراوله هيحتاج نص كيلو او كيلو الا ربع سكر علي حسب ما تحبي
– الفراوله هنغسلها ونشيل الجزء الاخضر ونحطها في حله وعليها السكر بحيث ان السكر يغلفها كلها ونغطيها وندخلها التلاجه ليله 
– تاني يوم هنلاقي الفراوله نزلت ميه كتير نحط الحله بكل اللي فيها علي النار لحد ما تبدأ تغلي ونشيل الرغوه كل شويه لحد ما تبدأ تتكثف نضيف عصير الليمون ونسيبه يغلي شويه
– لما تبرد نحفظها في برطمانات
– عشان نختبر المربي نجيب طبق بارد و نحط فيه شويه من المربي وندخله التلاجه لو لقينا المربي عملت طبقه ناشفه علي الوش ولما نيجي نميل الطبق نلاقيها تقيله يبقي كده تمام
– لو عاوزين قطع الفراوله تبقي موجوده في نص مرحله السوي هنشيل قطع الفراوله بمصفي ونسيب العصير يتقل ويتركز وفي قرب النهايه نرجع الفراوله تاني وبعدين نضيف الليمون
و الف هنا على قلوبكم يارب
مدير مطبخ سحر الحياة / نيفين منصور

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock
%d مدونون معجبون بهذه: