عام

شبكة العنكبوت.





بريد القراء أعداد: هويدا صابر.

الطيبه صفه جميله في الأنسان ولو معاها الجدعنه بتكون أجمل وأجمل ، الأنسان دا بيكون معاك وفي ضهرك في حزنك قبل فرحك من غير أي مقابل ، بيحاول يعمل كل أللي ربنا قدره عليه معاك وبيجي علي نفسه أحيانا عشان يخفف عنك ، وممكن تكون النتيجه في الأخر عدم التقدير ليه والأستغناء عنه ودا أيه بعد أستغلاله أسوأ أستغلال.

   دي تجربة السائله غ م :أنا أنسه عندي35  سنه الحمدلله شكلي مقبول وبشتغل شغل كويس وثابته نفسي فيه ومن عيله محترمه وليها مستواها المادي والأجتماعي ، مفيش حد من أصحابي أو أي حد يحتاجلي غير لما يلاقيني ، وبالنسبه للسؤال المعتاد أنا متجوزتش ليه لدلوقتي ، لأني ملقتش حد يحبني لنفسي كل واحد كان بيدخل البيت كان ليه حسباته ولوحصل وحبيت حد ودا محصلش غير مرتين في حياتي نفس الكلام هياخد من ورايه ومن ورا عيلتي أيه هيستفيد أزاي ، المهم مؤخرا شاب راسلني علي الفيس أكتر من مره وانا أتواصلت معاه واتعرفنا علي بعض وكلمني عن نفسه ومشاكله وأن هو المسؤل عن مصاريف اهله ، وكان عامل حادثه وبيتعالج في المستشفي ، وقالي أن مفيش حد بيزوره غير فين وفين ، وفجأه قالي أنه حبني وكل أمله في الدنيا أنه لما يخرج من المستشفي يتجوزني وهيبعت أبوه وأمه يزوروا أهلي ويتقدموا رسمي عشان أكون مطمنه ليه ، فطلبت منه أشوفه ويشوفني وبالفعل زورته في المستشفي أنسان جميل جدا ونظرات الأعجاب كانت باينه أوي في عنيه وطاير بيه ، بعدها بأسبوعين أبتدي يسمعني مكالمات بيه وبين أهله سواء مع أبوه أو أمه أو واحده من اخواته وأن في مشاكل ماديه وأنه عنده أرض هيبيعها بس يقف علي رجله ويخرج بالسلامه يسدد بيها ديونه ويعمل مشروع صغير مع شغله ونتجوز من فلوسها ، وأبتدي يطلب مني فلوس ويقولي أنا عارف أنك جدعه وهتعرفي تتصرفي وأنتي حبيبتي وأيدي ورجلي لحد مخرج من هنا بالسلامه وهردلك جمايلك عليه دي كلها وهتشوفي أنك مع رجل أمين عليكي ، وبقي بيطلب مني أحتياجاته الشخصيه كلها ، دا غير طلبات لأهله وكل يوم أجيب في طلبات وأبعتها هنا وهناك ، وقبل مروحله يبعتلي رساله فيها كل أللي عايزه ، لقيت نفسي في دايره مبتخلصش ودوامه والله مكنت عارفه أبص لنفسي مفيش وقت ، وهو معاملته أبتدت تتغير لما قولتله أن كل الفلوس أللي معايه وكنت محوشاها خلصت ومفيش غير المرتب وهو مش كبير لازم يكون معايه جزء منه مصاريف ليه أجيب منين سامحني يرد يقولي أستلفي يعني أنتي أهلك فقرا وبعدين أعملي حسابك أنا مش هقدر أتجوزك لأنتي ولا غيرك خلاص أنا الظروف بقت أسوا ، أقوله أنا معاك أيدينا في ايد بعض طبعا يرد عليه بقولك مش هتجوز ومن النهارده عايزه تساعديني كأصحاب تمام لكن جواز لأ وأفتكري انك جدعه وقولتيلي أنا معاك من غير مقابل ، ألاقيه يبعتلي رسايل فيها طلباته مبردش ، أنا صرفت في شهر تلاتين ألف جنيه ، الفلوس أللي تخصني أنا وبتاعتي وليه حرية التصرف فيها ، ليه اخد من غيري أو أبص لفلوس أهلي لأني بنتهم وملزومين بيه أنا ، حسيت أنه انسان أستغلالي وبيتسول علي حس ظروفه وسقط من نظري ، فكرت وبعتله قولتله أني تعبانه جدا والدكتور منعني من الحركه وأنا كنت مصدومه فيه بصراحه وعايز أفكر براحتي وأنهي الموضوع ، يرد يقولي يعني أيه تعبانه مش فاهم أنتي بتتهربي أنتي مش جدعه ولا أيه ولا بتمثلي الجدعنه ، قفلت موبايلي وقفلت علي نفسي وأستعنت بربنا عشان أقدر أقف علي رجلي تاني وأكمل حياتي ، بحس أني مكسوره من جوايه لكن الحمدلله عندي أمل أن ربنا يعوضني وألاقي أللي يحبني لنفسي لأني محتاجه دا محتاجه أحس أني بنت تستاهل تتحب وتستاهل تكون زوجه وأم لأنسان محترم رجل يحترمها ويقدرها وتكون مسؤله منه هو دا كتير وليه كل واحد مبيبصش لدا بيبص هياخد أيه ، أنا تعبانه وبكلم ربنا كتير وبترجاه أنه يحققلي أمنيتي ومكملش حياتي لوحدي أو أعيش حياه فرضتها الظروف عليه ، والله العظيم انا عمري مبصيت لغيري أنا بفرح لصحباتي وقرايبي ومبتأخرش عنهم وبحزن لما بلاقي واحده فيهم أنفصلت أو عايشه في مشاكل وكل يوم والتاني في بيت اهلها غضبانه ، هل أنا غلطانه في أحساسي دا؟ 

———————
أستاذتي الكريمة: لا حول ولا قوة إلا بالله العلي العظيم ، أولا أنتي ربنا نجاكي من أنسان عديم الضمير عامل زي شبكة العنكبوت مش عارفه أولها من أخرها ولا عارفه تخرجي منها رغم ضعفها الشديد ، يدخل البنت في حياته ويحوطها بمشاكله وطلباته فيخليكي زي أللي دايره في ساقيه مش هتلحقي تفكري في نفسك ولا تفكري هو كويس ولا لأ ، أنتي نفسك حسيتي بكده قولتي أنا في الدايره ، الفلوس أللي خسرتيها هتتعوض أضعاف وأنا بحترم فيكي أمانتك ساعدتيه من فلوسك الخاصه أللي طالعه من شغلك وتعبك ولما خلصت رغم أنك حبتيه والحب ضعف ، رفضتي تاخدي فلوس من أهلك ليه ، أو تمدي أيدك علي شئ أهلك أدهولك زي دهب أو فلوس ، وقولتيله معيش غير مرتبي تاخد جزء منه ، وأنتي وصفتيه بأنه بيتسول علي حس ظروفه دا حقيقي وأللي زي دا خلاص خد علي مد الأيد ووشه هيبقي مكشوف ، خدي وقتك وهتنسي مع الوقت وأنتي معملتيش حاجه غلط هنعلقلك عليها المشانق ، وارد أن بنات كتير تقع فريسه لنصاب سواء حبيب أو خطيب أو زوج ، وزي مقولتلك الفلوس تتعوض لكن أللي بتخسر نفسها مفيش حاجه هتعوضها ، وهو لعب علي طيبتك وجدعنتك وأستغلهم ، هو خلاص راح وأراح ، وأقطعي أي وسيله بينك وبينه ممكن تخليه يوصلك ، ثانيا ودا الأهم أنتي مش غلطانه في أحساسك تركيبة البنت أللي زيك بتكون عايزه أنسان يحبها لنفسها ولا بتكدب علي نفسها وتاخد أي رجل من المتاح حواليها المهم تكون أتجوزت ، أحساسك دا حقك وحق كل بنت زيك لسه عندها عقل في زمانا دا وحقك أطلبيه من ربنا هيستجيب لأنك بتستعيني بيه وقت الخطر وبتحتمي بيه ، وربنا عمره مهيخذل قلب برئ طيب زيك ولا هيرضي أنك تباتي قلبك مكسور هيجبر بخاطرك وهيعوضك ، وكل أللي شوفتيهم في حياتك أشباه رجال لسه الرجل الحقيقي مظهرش والتأخير دا عشان لما يظهر تعرفي قيمته ، وهتكوني أجمل وأرق حبيبه وزوجه وأحسن أم في الدنيا كلها ، أنتي بس قولي ياااااااااااااااااااارب من قلبك الطاهر دا هيستجيب.

مقالات ذات صلة

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock