* اللي بيؤمن بحاجة بجد و بيصدقها .. بتتحقق .
* الشيء الناجح هو القادر على الإستمراية ..
* قصيدة طرف تالت مختلفة بكل المقاييس مش عارفة كتبتها ازاي .
* الحب موجود في كل مكان ينبع من قلب صافي تماماً .
حوار : مريم التهامي .
شاعرة عشرينية ذات شخصية قوية ، و قلب ينبض بالعاطفة ، و حضور مسرحي متميز .
من مواليد مدينة السحر و الجمال و الشاعرية مدينة الإسكندرية خاطفة القلوب و العقول و منبع المواهب .
قدمت العديد من الحفلات الشعرية ، و عدد من الأغاني فجذبت كتاباتها القراء و المستمعين المتابعين لها على مواقع التواصل الإجتماعي ” السوشيال ميديا”، و استطاعت في سنٍ مبكرة إصدار ديوانها الشعري الأول ” آخر بصة ” عن دار حسناء للنشر والتوزيع بالإسكندرية .
” حسناء عبدالكريم ” الشاعرة الإسكندرانية ذات الإبتسامة المبهجة ، الحسناء الكريمة المتواضعة و الجميلة . صاحبة الصفاء القلبي و العزيمة القوية .
كان لمجلة سحر الحياة حوارًا معها فسألناها :
– في البداية حدثينا أكثر عن نفسك ؟
أنا حسناء عبد الكريم 23 سنة .
مواليد اسكندرية .
خريجة اتصالات و لا سيلكي .
اشتركت في كذا حفلة ف إسكندرية وعملت اسم بين شعرا إسكندرية في وقت قصير .
وعملت عدة أغاني لشباب إسكندرية و ظهرت في أكتر من برنامج تليفزيوني و إذاعي .
وصدر ليا ديوان ” آخر بصة ” معرض الكتاب اللي فات .
– كيف اكتشفتِ موهبتك ، و من أين كانت البداية ؟
والله من و أنا في الحضانة بركب كلام علي بعضه كدا و أغنية ، و تطورت في الإذاعات المدرسية و بعد كدا في قصور الثقافة ثم الحفلات .
– نقدر نقول إن بداية الإنطلاق كانت منين ؟
الحفلات في سنة 2016 . كانت سنة المجد و الإنطلاق .
– هل واجهتِ المحبطين في طريقك ؟
أكيد طبعًا يا ما أكترهم .
– و كيف كنتِ تتعاملين معهم ؟
كانوا دافعة قوية جداً والله ، بشكرهم من كل قلبي دايماً .
– من يقوم بتشجيعك دائمًا ؟
ثقة بابا ، و أمي و اخواتي و صحابي و أهلي . الحقيقة أنا لقيت دعم نفسي من المحيطين بيا في ناس كتير للأسف مش بتلاقيه و بيبقي سبب فشلهم .. الحمد لله .
– ما الحكمة التي تؤمنين بها في حياتك ؟
إن اللي بيؤمن بحاجة بجد و بيصدقها .. بتتحقق .
– من أكثر شاعر أو كاتب عموماً أثر فيكِ ؟
الأبنودي ، و فؤاد حداد .
و الكتاب كتير جداً منهم دكتور أحمد خالد توفيق – الله يرحمه – و بعض الكتاب الأجانب زي سيسيليا أهيرن .
– من قدوتك في الشعر و في الحياة عموماً ؟
أي حد قوي و عافر لحد ما نجح ، و متأثرش بالمحبطين اللي حواليه أو الظروف .
– بالنسبة للظروف هل واجهتكِ ظروف صعبة كانت حاجز في طريق تقدمك ؟
المحسوبية و الشلل اللي محاوطة الفن عموماً هي حاجز لأي حد معتمد علي الله و علي نفسه زيي .
– ما أقوى نقاط قوتك؟ و ما أكثر نقاط ضعفك ؟
أنا أي نقطة ضعف بحولها لقوة ، لأنه مفيش وقت للضعف والهزيمة .
– ما معايير تقيمك للنجاح ؟
الشيء الناجح هو القادر على الإستمراية في النجاح و حب الناس .
– يعني بتشوفي إن حب الناس هو معيار النجاح ؟
أكيد طبعاً احنا بنطلع فن للناس وعايزين بيه حب الناس .. و الناس قادرة جداً انها تقلب جميع الموازين
– ” الكاتب يعبر عما في داخله ” ما رأيك في المقولة ؟
أحياناً كتير جداً .
– ما تعريفك للحب كشاعرة ؟ و ما مكانته عندك شخصياً ؟
الحب موجود في كل مكان ينبع من قلب صافي تماماً
مكانته عندي ان مين فينا ميحبش الحب.. ميحبش إنه يحب ويتحب من كل الناس مش شرط حبيب وحبيبة .
– هل يوجد رسالة تريدين توجيهها لإنسان بدون ذكر أسماء ؟
” آمن بنفسك وذاتك وإستمر ، إنت قوي أكتر مما تتخيل بس إنت يمكن لسة ما إكتشفتش دا ، النجاح حلو و الوصول مش نهاية الرحلة وإنت أكيد تقدر ” .
– ما أقرب قصيدة لقلبك ؟
كل القصايد بحبها جداً . بس يمكن طرف تالت كانت مختلفة بكل المقاييس أنا نفسي مش عارفة كتبتها ازاي .
قصيدة (طرف تالت ) :
في ورود في اراضيها
وحنينها لأرض بعيد
طب ليه نقول ونعيد
والذكري قتلانا
يا ورود يا ناسيانا
إمتي الحنين حيموت ونصبح أراضي حديد
طب قول ياعم الحق
لما إتكسرلك رق
إزاي زرعته كمان
وإزاي تعيش في أمان
والوردة مش حباك
تزرعها في وريدك
ويفضل حنينها هناك
تخلص محاولاتك علشان تكبرها
وهي مش فاكراك..
طب إيه اللي كان غاصبك
نفس الوريد جرحك
نفس الوريد قساك ..
تدوب وتختفي الطبلة
وملهاش بديل موصوف
أصل الطريق معروف
يامعاك..يا متسابة
الوحدة قلابة ..
وأنا ملو قلبي الخوف
لكني مش قادرة أعدي وأكمل
وعذر كل بعد عارفة
حيبقي ظروف ..
يبان الكادر من برة
وتبقي الصورة مكشوفة
لكن النتيجة مش معروفة
مين المخطيء في الحوار كله
لو يمشي تندهلة ولا تسيبه يفوت
تتذل ولا تموت !!
كل الإحتمالات ..إحتمال
وإحتمال الوجع موجود
وحق الجراح متصان
أنا أحبك فتحبها هي فتحب هي حد كمان
دايرة ومبتقفش ومبتوصلش
ومحدش عارف
مين غلطان ..
– ما أهدافك المستقبلية ؟
إني أبقي أول شاعرة في كل حاجة ، و خصوصاً كتابة الأغاني و التترات ، البنات تكاد تكون منعدمة في الحته دي .
– ما أكثر مقطع بتحبيه ؟
المقطع اللي في خاتمة الكتاب ، من قصيدة ” امتى بقيت جدو ” .
– سعدت جداً بالحوار معكِ يا طيبة القلب و جميلة الروح .
= و أنا استمتعت جداً و الله يا حبيبتي .
