بقلم / ( شرين سعد أحمد )
شاعرة جنوب الوادي
هكتب واسجل في الورق
كل اللي هتقولوا عليه
هكتب معاق ولا يوم فرق
اسمي معاق ولا اسمي إيه
،،،،،،،،،،،،،،،،،،،،،،،،
خانة و هملاها بقلم
والخانة مليانة وجع
تفرق معاكم لو ألم
سافر بعمري أو رجع
،،،،،،،،،،،،،،،،،،
مش فارقة ويايا الخانات
ولا حتى إقرار هكتبه
مين قال بتنقصني حاجات
دا الصعب دايما بغلبه
،،،،،،،،،،،،،،،،،،،،،
لو تعرفوا معنى الحروف
كانت هتفرق بَعَدَها
واما ندقق راح نشوف
فيه ألف معنى ف بُعَدَها
،،،،،،،،،،،،،،،،،،،،،،،
الميم مافيش غير الإرادة
مالية عقلي ودنيتي
والهمة عندي دي بزيادة
دايما بقوم من وقعتي
،،،،،،،،،،،،،،،،،،،،،،،،،،،،،
والعين عنادي ويا جرجي
هو اللي خلاني أقوم
دابت همومي بعد فرحي
قادر ادوس على دي الهموم
،،،،،،،،،،،،،،،،،،،،،،،
أما الألف أنا مش هنوح
ولا هبكي عمري ف وحدتي
احساسي دايما راح يبوح
بقدر افوق من شدتي
،،،،،،،،،،،،،،،،،،،،،،،
والقاف دي قوة منيش ضعيف
والقوة فيا من زمان
والحمل مهما زاد خفيف
برسي على بر الأمان
،،،،،،،،،،،،،،،،،،،،،،،،،،،
رب العباد لما أراد
اداني ميزة وعلا شاني
وف قدره كاتب ف المعاد
وبصبري زود في إيماني
،،،،،،،،،،،،،،،،،،،،،،،،،،،
يلي بتفهم في الخلايق
ومصنف الناس في الرفوف
شوف رفك انت شكله لايق
ولا هتلعن في الظروف
،،،،،،،،،،،،،،،،،،،،،،،،
أقعد مكاني شوف كده
قلي بعيونك رحت فين
ولا عنيك متعودة
تجرح في غيرها من سنين
،،،،،،،،،،،،،،،،،،،،،،،
اوعاك بنظرة تتهم
واحد بعقله يوزنك
ساعتها ربك ينتقم
واللي جنيته هيحزنك
،،،،،،،،،،،،،،،،،،،،،،،،،،
الإنسانية مش شعار
ولا يفطة فوق متعلقة
الإنسانية دي قرار
سهلة مهيش متعقدة
،،،،،،،،،،،،،،،،،،،،،،،،،،،،
حسوا بغيركوا هتفهموا
الاختلاف حكمة أكيد
لحسن في يوم راح تندموا
بينا المسافة راح تزيد
،،،،،،،،،،،،،،،،،،،،،،،،،،،
أنا مش معاق أنا مختلف
أنا قلبي خيره ملوش حدود
هو المسمى هيختلف
لو يوم نفكر في الردود
،،،،،،،،،،،،،،،،،،
جوايا حلم وبرسمه
وعاوزه يكبر وسطكم
ومعاكوا ناوي أقسمه
وأحس إني منكم
،،،،،،،،،،،،،،،،،،،،،،،،،،،،،
مدوا الأيدين حالا قوام
أما الورق رحوا قطعوه
بينا المحبة والاحترام
أخر ندا يلا اسمعوه
،،،،،،،،،،،،،،،،،،،،،،،،،،،،
إهداء إلى الأستاذة الفاضلة
منال عبد الباسط محمد
رئيس وحدة تكافؤ الفرص
بإدارة أبو تيج التعليمية
تحت مبادرة
قادرون بلا اختلاف
( تربية خاصة بلا تنمر )
12/2/1/2019
