خير تعمل شر تلقي.
بريد القراء أعداد:هويدا صابر
أوعي تلوم نفسك علي موقف جدعه منك مع أنسان مقدروش أو رده بسوء ، أبدا أنت أتعاملت بأصلك وهو أتعامل بأصله وعمر الخير ميروح أبدا حتي لو من وجهة نظرك كان مش في محله لا هيتردلك أضعاف مضعفه..
دي قصة الأستاذه أ أ:
أنا أنسه عندي 30 سنه وكان معايه شاب زميلي في الشغل ظروفه كانت ملخبطه وعشان أحنا شغل خاص أستغنوا عنه ، كلمني وطلب المساعده لو أقدر وساعدته كلمتله والدي أللي كانت علاقاته كتيره ومحبوب ومبيرفضش ليه ولأصحابي طلب وفعلا شغل زميلي في نفس مجاله وأحسن داغير حاجات تانيه كتيره منها أن والدي شغل أخوه وفي الفتره دي أتقربنا من بعض وأنا حبيته وهو دايما كان يقولي علاقتنا دي هتجيب كل الخير بينا أن شاء الله وفهمني أنه بيحبني ، لحد ما أكتشفت أنه علي علاقه مع صديقتي المقربه ليه وأللي كنا مع بعض من أيام الجامعه وبيتكلموا مع بعض وبيتقابلوا ، ووالدي هو أللي كان مشغلها في نفس المكان معايه وهي عارفه أني بحبه ، هي أللي قالتلي بنفسها عشان خطوبتهم كمان أسبوع فكان لازم أعرف ، أنا أتصدمت وسألت نفسي بيكلموا بعض من أمتي ياترا من زمان وهو أستغل علاقات والدي أنها تسهله اموره عن طريقي ، ما أنا كان ممكن أساعده من غير ميوهمني أنه بيحبني ، وهل هي كانت مشجعاه علي دا أسأله كتير ، فعلا خير تعمل شر تلقي.
——————
أختي الكريمة: ليه الأسئله دي كلها ، خلاصة الكلام أنتي أتعاملتي بأصلك وهما أتعاملوا بأصلهم ، ويكفي أنك بينك وبين نفسك عارفه كويس جدا أنك كان ممكن تساعديه بلا مقابل ، لكن هو أنسان ملتوي وأستغلالي وطماع لذلك وهمك بالحب عشان أموره كلها تمشي علي مايرام ويكون ضامن أنك متسبيهوش في نص الطريق ، ولما أموره بقت تمام سابك وأعلن خطوبته علي أللي شبه وطباعها زي طباعه في كل شئ والأخلاق واحده ، أنتي كسبتي نفسك ومخسرتيش شئ ، لأن البعد عن صديقه زي دي وعن حبيب أستغلالي لو كان كمل معاكي كان هيفضل طول عمره يطلب وياخد منك بس وسقف المطالب كان هيعلا ويعلا ، فالحمدلله ربنا كشفهم وبعدهم عنك مكسب مش خساره ، وكل خير عملتيه هيتردلك أضعافه وهيعوضك ربنا بكل خير لأنك جدعه وتستاهلي ، وربنا ييسرلك كل خير.
