( حلوي اللبن الهنديه )
مقدمة من / مروة كمال
وقت التحضير / 15 دقيقة
وقت القلي / 10 دقائق
المقادير :
كوب لبن بودره ( هنستخدم البودره زي ماهيا مش هندوبها في ميه )
نصف كوب دقيق ( او لو عاوزينها مرمله نشيل معلقه من الدقيق ونستبدله بمعلقه دقيق سميد)
معلقتين كبار زبده طريه او سمنه او زيت (بس الزبده أفضل )
بيضه واحده
معلقه صغيره بيكنج بودر
رشه ملح
فانيليا
رشه حبهان بودره
اللي عنده بودره زعفران يضيف رشه بسيطه بتدي لون ذهبي واللي مش عنده مش لازم
الطريقه :
– هنخلط كل المقادير مع بعض ونعجنها هنلاقيها لمت معانا بسهوله وبقت عجينه ولو حاسينا انها لسه مفروله نضيف معلقتين لبن حليب بس عليها
– هنغطي العجينه ونسيبها ترتاح نص ساعه
– نشكلها كرات صغيره قد الليمونه الصغيره
– نقليها في زيت غزير يكون دافي مش سخن أوي عشان ما تتحرقش من بره
– ممكن نختبر الزيت نحط فيه فتفوته من العجينه لو لقيناها غطست تحت يبقي كويس لكن لو طفت علي الوش يبقي الزيت سخن زياده
– الكرات اللي شكلناها هتغطس في الزيت ولما تبدأ تستوي هترتفع علي الوش نقلبها كل شويه لحد ما تتحمر من كل الجهات
– نشيلها من الزيت ونحطها علي طول في شربات تقيل ويكون سخن
– في ناس بتسيبها في الشربات يوم كامل بس انا سيبتها يدوب ربع ساعه او نص ساعه بالكتير وكفايه وشيلتها
– مقادير الشربات التقيل لكل كوبايتين سكر كوبايه ميه وعصير نص ليمونه وممكن رشه فانيليا في الاخر
و الف هنا على قلوبكم يارب
مدير مطبخ سحر الحياة / نيفين منصور
