بقلم/هانى توفيق
على باب دخول الناس تصلي وتعترف
مرمِي هنا عيل رضيع بيقول كلام
من غير حروف لكن عياط وبيرتجف
من غير كسوف اسمُه ياناس ابن الحرام
ملفوف ف شال خاين لدينُه منحرف
ملفوف ف طرحة واحده عاشت ف الظلام
عيل رضيع وسط السكات وبيشتكي
وبيدعي ربُه أصل كُل الناس نيام
سامع أنا صوت العياط عالي قوي
عارف أنا إن العياط شكوي وملام
عاوز يقول البرد قاسي والهوا
وانُه انظلم وانُه إنجرح وانُه جعان
عاوز يقول أنا ذنبي إيه أدفع أنا
غلطة خسيس غلطة رخيص غلطة جبان
ترميني ليه أُمي الرخيصه المُجرمه
طاب كسبوا إيه من صرختي أو أخدوا كام
من أجل بعض من الدقايق مُمتعه
رٙح يخسروا طول الحياه معنى السلام
هُما اسمهُم أصبح بُغاه من رميتي…
وانا بعدهُم إسمي ياناس إبن الحرام
