كتبت أسماء ابو شال
مؤسسات المرأة في مصر كل يوم تنزل بيان بتعاتب فيه الأزهر علشان عارض قرارت السبسي في تونس ، وشايفين أن وضع المرأة في الإسلام يتأسس على المساواة مع الرجل ‘في الحقوق والواجبات والثواب والعقاب ،وان الاجتهاد أصبح ضرورة لإنصاف المرأة في ظل المتغيرات المجتمعية والإقتصادية والإجتماعية التي خلتها في كثير من الحالات هي المعيل الوحيد لأسرتها ..
أولاً : خليكوا في نفسكوا وخيبتكوا ومالكوش دعوة أصلاً بتونس ، الأولى بيكوا تنادوا بتقليد تونس في مستوى التعليم اللي وصلوله وانتوا عندكوا الستات بتعاني المر علشان بس تتعلم في القرى والنجوع ومش لاقيين حتى مية نضيفة يشربوها.
ثانياً : بدل ماتعاتبوا الأزهر علشان عايزيين تغيروا في ثوابت ونصوص قرانية صريحة (مافيهاش اجتهاد) مع العلم ان اللي بيورث الضعف هو الأخ بس ، ومعظم الحالات الست بتورث فيها أكثر من الرجال .. طالبوا بقوانين تحمي الأسرة المعيلة وتجيب حقها من الراجل اللي بيطلق أو يخلع من غير مايصرف على عياله ، وطالبوا بمعاش محترم للمطلقات والأرامل من الدولة .. وهيبقى دا انجاز عظيم لكم فعلاً.
ثالثاً : عارفين سبب الوكسة دي ايه !! سببها أصلاً الست .. أيوة الست اللي بتربي “الدكر” في مصر على “الفتونة” .. “أنت راجل” بمفهوم ذكوري ابن كلب .. الست في الصعيد مابتورسش الأرض .. الأرض بتاعة الرجالة .. وفي غير الصعيد الأب وام مبقوش يربوا الولد على أنه راجل له قوامه وهو اللي بيصرف على مراته واخته وامه .. اعملوا حملات توعية للستات في أصول التربية وعلموهم ازاي يربوا أولادهم على القوامة اللي بيها الست حتحس باللي ضمنه لها الشرع ..
اللي بيحصل من شوية “ذكور” مايصحش نلزقه في الدين ونقول الست بتصرف اهو زيها زيه فنخلي الشرع على جنب علشان شوية “شواذ” .. وغيرها من أفكار عقيمة تانية عايزين تمشوا وراها وفاكرين ان دي مساواة !!بلاش تقولي ماهو الدين بيقول كذا وأشباه الرجالة بتعمل كذا .. ماياكش يولعوا .. ماهم هيولعوا فعلاً في نار جهنم ساعتها قولي بقى اشمعنى .. ماهو دول اخرتهم سودة ان شاء الله .. 
